ନୂଆଦିଲ୍ଲୀ,୧।୧୧(ପିଆଇବି): କମ୍ ଖର୍ଚ୍ଚରେ ଯେପରି ଡାକ୍ତରୀ ଶିକ୍ଷା ଉପଲବ୍ଧ ହୋଇପାରିବ ସେ ଦିଗରେ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ନ୍ୟାଶନାଲ ମେଡିକାଲ କମିଶନ (ଏନ୍ଏମ୍ସି) ନୂତନ ନିୟମାବଳୀ ସମ୍ପର୍କରେ ବିଜ୍ଞପ୍ତି ଜାରି କରିଛନ୍ତି। ‘ବାର୍ଷିକ ଏମ୍ବିବିଏସ୍ ନାମଲେଖା ନିୟମାବଳୀ (୨୦୨୦) ପାଇଁ ସର୍ବନିମ୍ନ ଆବଶ୍ୟକତା’ ନାମରେ ଏହି ବିଜ୍ଞପ୍ତି ଜାରି ହୋଇଛି। ସମସ୍ତ ନୂଆ ମେଡିକାଲ କଲେଜ ଏବଂ ହେବାକୁ ଥିବା ମେଡିକାଲ କଲେଜରେ ଏହି ନୂତନ ନିୟମାବଳୀ ଲାଗୁ ହେବ।
ନୂତନ ନିୟମାବଳୀରେ ମେଡିକାଲ କଲେଜ ଏବଂ ଏହାର ସ୍ବୀକୃତିପ୍ରାପ୍ତ ଶିକ୍ଷାପ୍ରଦାନକାରୀ ହସ୍ପିଟାଲ ସ୍ଥାପନ ପାଇଁ ଆବଶ୍ୟକ ଜମି ପରିମାଣକୁ ହଟାଇ ଦିଆଯାଇଛି। ଶିକ୍ଷାନୁଷ୍ଠାନ ସ୍ଥାପନ ପାଇଁ ସର୍ବନିମ୍ନ ଆବଶ୍ୟକୀୟ ଜମି ନିଆଯାଇପାରିବ। ଉପଲବ୍ଧ ଶିକ୍ଷଣ ସ୍ଥାନକୁ ସବୁ ବିଭାଗ ବ୍ୟବହାର କରିପାରିବେ। ଏହାକୁ ଇ-ଲର୍ନିଂ ଓ ଅନ୍ୟ ବିଭାଗ ସହ ଡିଜିଟାଲ ଲିଙ୍କ୍ ପାଇଁ ବ୍ୟବହାର କରାଯାଇପାରିବ। ସେହିପରି ପିଲାମାନଙ୍କୁ ପ୍ରଶିକ୍ଷଣ ଦେବା ପାଇଁ ଅତ୍ୟାଧୁନିକ ଉପକରଣ ଥିବା ‘ସ୍କିଲ୍ସ ଲାବରେଟୋରି’ ରହିବ। ଲାଇବ୍ରେରି ସ୍ଥାନ ତଥା ବହି ଓ ପତ୍ରିକା ସଂଖ୍ୟା କମାଇ ଦିଆଯିବ। ଛାତ୍ରୀଛାତ୍ରଙ୍କ ଉପରେ ପାଠର ବୋଝ ବଢ଼ୁଥିବାରୁ ଷ୍ଟୁଡେଣ୍ଟ କାଉନସେଲିଂ ସେବାକୁ ବାଧ୍ୟତାମୂଳକ କରାଯିବ। ମେଡିକାଲ ଟ୍ରେନିଂ ପାଇଁ ଉପଯୁକ୍ତ ପରିଚାଳିତ ହସ୍ପିଟାଲ ଜରୁରୀ ହୋଇଥିବାବେଳେ ନୂଆ ନିୟମାବଳୀରେ ନୂଆ ମେଡିକାଲ କଲେଜ ସ୍ଥାପନ ନିମନ୍ତେ ଆବେଦନ ପାଇଁ ଭଲ ଚାଲୁଥିବା ୩୦୦ ଶଯ୍ୟା ବିଶିଷ୍ଟ ମଲ୍ଟି-ସ୍ପେଶିଆଲିଟି ହସ୍ପିଟାଲ ରହିଥିବା ଆବଶ୍ୟକ।
