ସାଧାରଣତଃ ପିଲାଦିନେ ପ୍ରଥମେ ସ୍କୁଲ ଗଲେ ଶିକ୍ଷକ ପଣିକିଆ ଘୋଷିବାକୁ ଦେଇଥାନ୍ତି। ପିଲାମାନେ ଅତିବେଶୀରେ ୨୫ ପର୍ଯ୍ୟନ୍ତ ପଣିକିଆ ମନେ ରଖିବାକୁ ସକ୍ଷମ ହୋଇଥାନ୍ତି। କିନ୍ତୁ ନିକଟରେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ଜଣେ କୁନି ଛାତ୍ରୀ ୭୩, ୪୮ ଏବଂ ୬୭ ପଣିକିଆ କହିଦେଉଛନ୍ତି।
ଉତ୍ତରପ୍ରଦେଶର ମେନପୁରୀରେ ରହୁଥିବା ଏହି କୁନି ଝିଅଟି ଏବେ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି। ଏହି ଝିଅଟି ମେନପୁରୀର ଲଲୁପୁରର କେଡି ଟିଆର ପବ୍ଲିକ ସ୍କୁଲରେ ପଢନ୍ତି। ଏଠାରେ ଜଣେ ଶିକ୍ଷକ ଝିଅକୁ କଳାପଟାରେ କଠିନ ସଂଖ୍ୟାର ପଣିକିଆ ଲେଖିବାକୁ କହିଥିଲେ। ଶିକ୍ଷକ ଛାତ୍ରୀଟିକୁ ପଚାରିଥିଲେ, ତୁମେ କେତେ ପର୍ଯ୍ୟନ୍ତ ପଣିକିଆ ଜାଣିଛ? ଝିଅଟି ୮୦ ପର୍ଯ୍ୟନ୍ତ ଜାଣିଥିବା କହିଥିଲେ। ଏହା ପରେ ଶିକ୍ଷକ ୭୩, ୪୮ ଏବଂ ୬୭ର ପଣିକିଆ ଲେଖିବା ପାଇଁ ଝିଅଟିକୁ କହିଥିଲେ। ସେ ତୁରନ୍ତ ପଣିକିଆ ପାଟିରେ କହିବା ସହ କଳାପଟାରେ ଲେଖିବା ଆରମ୍ଭ କରିବା ମାତ୍ରେ ଶିକ୍ଷକ ଆଶ୍ଚର୍ଯ୍ୟ ହୋଇଯାଇଥିଲେ।
ଏହି ଭିଡିଓକୁ ‘ଦ ମିଡିଆ ୱାଲା’ ନାମକ ଫେସବୁକ ଆକାଉଣ୍ଟରେ ଶେୟାର କରାଯାଇଛି। ଝିଅଟି ଏକ ହଜାରରୁ ଅଧିକ ଶବ୍ଦର ଅର୍ଥ ମଧ୍ୟ ମନେ ରଖିଛନ୍ତି। ସୋସିଆଲ ମିଡିଆରେ ଶିଶୁର ଭିଡିଓକୁ ଲୋକମାନେ ବହୁତ ପସନ୍ଦ କରୁଛନ୍ତି।
