ରାୟଗଡ଼ା,୨୦।୭(କୈଳାଶ ଚନ୍ଦ୍ର ପୃଷ୍ଟି ): ରାୟଗଡ଼ା ଏବେ ଲୁଟେରାଙ୍କ ଆଡ୍ଡାସ୍ଥଳୀ ପାଲଟିଛି l ଅଞ୍ଚଳରେ ଚୋରି, ଡକାୟତି, ରାହାଜନୀ, ଲୁଯ୍ ଭଳି ଘଟଣା ଦିନକୁ ଦିନ ବଢ଼ିବାରେ ଲାଗିଛି। ଫଳରେ ସହରରେ ରହୁଥିବା ଲୋକେ ନିଜକୁ ଅସୁରକ୍ଷିତ ମନେ କରୁଛନ୍ତି। ଯାହାକି ରବିବାର ପିଏସ୍ଆର ସିନେମା ହଲ ନିକଟସ୍ଥ ନିଉ କଲୋନୀର ତୃତୀୟ ଲେନ୍ରୁ ଜଣକ ଘର ଝରକା ଗ୍ରିଲ ଭାଙ୍ଗି ଲକ୍ଷାଧିକ ଟଙ୍କାର ସୁନା, ରୂପା ଅଳଙ୍କାର ସହ ଲକ୍ଷାଧିକ ଟଙ୍କା ଲୁଟି ନେଇଛନ୍ତି l ଲୁଟ ସମ୍ପତ୍ତି ମଧ୍ୟରେ ୧୫ ଭରି ସୁନା ଅଳଙ୍କାର, ୭୫୦ ଗ୍ରାମ ରୂପା, ୧ ଲକ୍ଷ ୫୦ ହଜାର ନଗଦ ଟଙ୍କା ରହିଛି। ଖବର ପାଇ ରାୟଗଡ଼ା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି l
ଅପରପକ୍ଷରେ ଡକାୟତମାନଙ୍କୁ ଠାବ କରିବା ପାଇଁ ସୋମବାର ସନ୍ଧାନୀ କୁକର ସହ ସାଇଣ୍ଟିଫିକ ଟିମ୍ ତନାଘନା କରି ଫେରିଛି। ଏପରିକି ପୋଲିସ ସ୍ଥାନୀୟ ଅଞ୍ଚଳରେ ଲାଗିଥିବା ସିସି ଟିଭି ଫୁଟେଜ ଆଧାର ତଦନ୍ତକୁ ଜୋରଦାର କରିଛି l ଏହି ଘଟଣା ପରେ ସୁରକ୍ଷା ବ୍ୟବସ୍ଥା, ପୋଲିସର କାର୍ଯ୍ୟ ଦକ୍ଷତା ପ୍ରତି ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି।
ସୂଚନା ଯୋଗ୍ୟ, ରାୟଗଡ଼ା ନିଉ କଲୋନୀ ତୃତୀୟ ଲେନରେ ଇପ୍ପିଲି ଚନ୍ଦ୍ରଶେଖର ରାଓଙ୍କ ଘର l ରବିବାର ସନ୍ଧ୍ୟା ପ୍ରାୟ ସାଢେ ୬ଟାରେ ଘରେ ତାଲା ପକାଇ ପରିବାର ଲୋକେ କୌଣସି କାର୍ଯ୍ୟରେ ବାହାରକୁ ଯାଇଥିଲେ। ଘରେ କେହି ନ ଥିବା ସୁଯୋଗରେ ଡକାୟତମାନେ ଘରର ଏକ ଝରକା ଭାଙ୍ଗି ଭିତରକୁ ପଶି ଥିଲେ।
ପରେ ଘର ଭିତରେ ଥିବା ୨ଟି ଆଲମାରି ଖୋଲି ଥିବା ସୁନା, ରୁପା ଅଳଙ୍କାର ସହ ନଗଦ ଟଙ୍କା ଲୁଟି ନେଇଥିଲେ l ସେହିପରି ବକ୍ସ ଖଟ ଭିତର ଥିବା ସୁନାକୁ ମଧ୍ୟ ଲୁଟି ନେଇଥିଲେ l ଡକାୟତମାନେ ପାଖାପାଖି ମୋଟ ୧୫ ଭରି ସୁନା, ୭୫୦ ଗ୍ରାମ ରୂପା ଏବଂ ନଗଦ ପ୍ରାୟ ୧ ଲକ୍ଷ ୫୦ ହଜାର ଟଙ୍କା ଲୁଟି ନେଇଥିବା ଥାନାରେ ଅଭିଯୋଗ ହୋଇଛି l
ସବୁଠୁ ଗୁରୁତ୍ୱ ପୂର୍ଣ୍ଣ କଥା ହେଉଛି, ରବିବାର ରାତି ପ୍ରାୟ ୮ଟାରେ ପରିବାର ଲୋକେ ଘରେ ପହଞ୍ଚି ଘରୁ ଲୁଯ୍ ହୋଇଥିବା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ l ତେବେ ସନ୍ଧ୍ୟାରେ ଏଭଳି ଲୁଟ୍ ଘଟଣା ପୋଲିସର ପାରିବାପଣିଆ ପ୍ରତି ଚ୍ୟାଲେଞ୍ଜ ସୃଷ୍ଟି କରିଛି। ଅନ୍ୟପକ୍ଷେ ଅଞ୍ଚଳରେ ପାଟ୍ରୋଲିଂ ବ୍ୟବସ୍ଥାକୁ କଡାକଡି କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି।
