ପାଟନା, ୧।୩: ୨୦୨୦ ଗଲଓ୍ବାନ ଶହୀଦ ଯବାନ ଜୟ କିଶୋରଙ୍କ ବାପାଙ୍କୁ ସୋମବାର ରାତିରେ ପୋଲିସ ଗିରଫ କରିନେଇଛି। ସରକାରୀ ଜାଗାରେ ଯବାନଙ୍କ ସ୍ମାରକୀ ହୋଇଥିବାବେଳେ ଯବାନଙ୍କ ବାପା ରାଜ କପୁର ସିଂ ଉକ୍ତ ଜାଗାକୁ ଜବରଦଖଲ କରି ରଖିଥିବା ଅଭିଯୋଗ ହୋଇଥିଲା। ୧୫ ଦିନ ମଧ୍ୟରେ ସ୍ମାରକୀକୁ ସ୍ଥାନାନ୍ତର କରିବା ନେଇ ପୋଲିସ କହିଥିଲା। କିନ୍ତୁ ସୋମବାର ରାତିରେ ରାଜ କପୁରଙ୍କୁ ପୋଲିସ ଜୋରଜବରଦସ୍ତ ଗିରଫ କରିନେଇଥିବା ତାଙ୍କ ଘରଲୋକେ ଅଭିଯୋଗ ଆଣିଛନ୍ତି। ପୋଲିସ ତାଙ୍କୁ ମାଡ଼ ମାରିବା ସହ ଘୋଷାରି ଘୋଷାରି ନେଇଥିବା ତାଙ୍କ ସାନପୁଅ ନନ୍ଦ କିଶୋର ସିଂ କହିଛନ୍ତି। ଏ ନେଇ ଗ୍ରାମବାସୀ ପୋଲିସ ବିରୋଧରେ ଜୟ କିଶୋରଙ୍କ ସ୍ମାରକୀ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ଅନ୍ୟପକ୍ଷେ ସରକାରୀ ଜମିରୁ ଜବରଦଖଲ ହଟାଇବା ପାଇଁ ବାରମ୍ବାର ରାଜକପୁରଙ୍କୁ କୁହାଯାଇଥିଲେ ସୁଦ୍ଧା ସେ ବେଆଇନ ନିର୍ମାଣ କରିଥିବା ଯୋଗୁ ତାଙ୍କୁ ଗିରଫ କରାଯାଇଥିବା ପୋଲିସ ଅଫିସର ପୁନମ କେଶରୀ କହିଛନ୍ତି।
