ଲୋକମାନେ ସେମାନଙ୍କ ବିବାହକୁ ସ୍ମରଣୀୟ କରିବା ପାଇଁ କିଛି ବି କରିବାକୁ ପଛାନ୍ତି ନାହିଁ। ସେମିତି ଏକ ବିବାହ ଦେଖିବାକୁ ମିଳିଛି କୋୟମ୍ବାଟୁରରେ। ଏଠାରେ ଏକ ବର-କନ୍ୟା ୬୦ ଫୁଟ ଗଭୀର ସମୂଦ୍ର ମଝିରେ ବିବାହ କରିଛନ୍ତି।
ବର ଚିନ୍ନାଦୁରାଇ ଏବଂ କନ୍ୟା ଶ୍ୱେତା ଉଭୟ ପେସାରେ ସପ୍ଟଓୟାର ଇଞ୍ଜିନିୟର। ଶ୍ୱେତା କୋୟମ୍ବାଟୁରର ନିବାସୀ। ଭାବି ସ୍ବାମୀ ଚିନ୍ନାଦୁରାଇ ତାଙ୍କୁ ସମୁଦ୍ର ତଳେ ବିବାହ କରିବାକୁ ପ୍ରସ୍ତାବ ଦେଇଥିଲେ। ପ୍ରଥମେ ଏହା ଶୁଣିବା ପରେ ଶ୍ୱେତା ଡରିଯାଇଥିଲେ। ମାତ୍ର ପରେ ଏଥିରେ ରାଜି ହୋଇଥିଲେ। ଉଭୟ ତାମିଲନାଡୁର ନୀଳକାରାଇ ବେଳାଭୂମିରେ ଠିଆ ହୋଇ ବିବାହ ମୁହୂର୍ତ୍ତକୁ ଅପେକ୍ଷା କରିଥିଲେ। ବିବାହ ମୁହୂର୍ତ୍ତ ହେବା କ୍ଷଣି ଉଭୟ ମମୁଦ୍ରକୁ ଡେଇଁପଡ଼ିଲେ। ଏହି ଅବସରରେ ଉଭୟ ପାରମ୍ପରିକ ପୋଷାକ ପିନ୍ଧିଥିଲେ। ସମୁଦ୍ରରେ ଉଭୟ ୪୫ ମିନିଟ ବିତାଇଥିଲେ। ଏହି ସମୟରେ ସେ ପୁଣିଥରେ ଶ୍ୱେତାଙ୍କୁ ଫୁଲ ଦେଇ ପ୍ରେମ ନିବେଦନ କରିଥିଲେ। ଏହାପରେ ଉଭୟ ଫୁଲହାର ପିନ୍ଧାଇଥିଲେ। ସମୁଦ୍ରକୁ ସାକ୍ଷୀମାନି ଶପଥ ନେଲେ ଏବଂ ବିବାହ କଲେ।
ଏ ନେଇ ଚିନ୍ନାଦୁରାଇ କୁହନ୍ତି, ପିଲାଦିନୁ ସେ ପହଁରିବାକୁ ଭଲ ପାଆନ୍ତି। ୧୨ ବର୍ଷ ଧରି ସେ ସ୍କୁବା ଡ୍ରାଇଭିଂ କରୁଥିଲେ। ଏଠାରେ ସେ ସନ୍ତରଣ ତାଲିମ ନେଇଥିଲେ।
ବିବାହ ପରେ ନବ ଦମ୍ପତି କହିଛନ୍ତି ଯେ, ବିବାହ ତାରିଖ ସ୍ଥିର ହୋଇ ନ ଥିବାରୁ ସେମାନେ ନିଜ ବିବାହକୁ ବନ୍ଧୁ ଏବଂ ପରିଜନଙ୍କୁ ଡାକି ନ ଥିଲେ।
