କେନ୍ଦୁଝର, ୧୭|୫ (ସ୍ବ.ପ୍ର.) କେନ୍ଦୁଝର ଜିଲାରେ ବିନା ଅଗ୍ନି ନିରାପତ୍ତା ବ୍ୟବସ୍ଥାରେ ରହିଛି ହୋଟେଲ, ସପିଂ ମଲ, ମାର୍କେଟ କମ୍ପ୍ଲେକ୍ସ, ସିନେମା ହଲ, ସରକାରୀ, ଘରୋଇ ଓ ବ୍ୟବସାୟିକ ଅନୁଷ୍ଠାନ କୋଠାଘର। ଏଥିପାଇଁ ସ୍ବତନ୍ତ୍ର ଗାଇଡଲାଇନ ରହିଛି। ଏପରିକି ପ୍ଲାନ ଅନୁମୋଦନ ସମୟରେ ଏହି ଗାଇଡ ଲାଇନକୁ ମାନିବା ଜରୁରୀ ା କିନ୍ତୁ ପାଳନ ହେଉ ନ ଥିବାରୁ କୌଣସି ଅଘଟଣ ଘଟିଲେ ଲୋକଦେଖାଣିଆ ଭାବରେ ସେସବୁ ଅଗ୍ନିଶମ ସେବା ବିଭାଗ ପକ୍ଷରୁ ଲୋକ ଦେଖାଣିଆ ଭାବେ ଚଢାଉ ହୁଏ। ଏବଂ ଏହା ନୋଟିସ ମଧ୍ୟରେ ସୀମିତ ରହିଯାଏ ା ଆଇନଗତ କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଅନେକ ଏହି ଗୁରୁତ୍ୱପୂର୍ଣ୍ଣ ନୀତିନିୟମକୁ ପାଳନ କରୁନାହାନ୍ତି ବୋଲି ମତପ୍ରକାଶ ପାଉଛି ା ଲୋକଙ୍କ ଧନଜୀବନର ସୁରକ୍ଷା ସରକାରଙ୍କ ହାତରେ ରହିଛି। ଏଣୁ ଏଥିପାଇଁ ଓଡିଶା ଫାୟାର ପ୍ରିଭେନସନ ରୁଲ ୨୦୧୯ ପ୍ରଣୟନ କରାଯାଇଛି। ତଦନୁଯାୟୀ ସମସ୍ତ କମର୍ସିଆଲ ସଂସ୍ଥା ମାନେ ଏହି ରୁଲ ପାଳନ କରିବା ବାଧ୍ୟତା ରହିଛି। କୋଠା ପ୍ଲାନିଂ, ଜାତୀୟ ନ୍ୟାଶନାଲ ବିଲ୍ଡିଂ କୋଡ, ନିଆଁ ଲିଭା ସରଞ୍ଜାମ ବ୍ୟବସ୍ଥା ଆଦି ଯାଞ୍ଚ କରାଯାଇ ଲାଇସେନ୍ସ ପ୍ରଦାନ କରିବା ପରେ ସେସବୁ ଖୋଲିବା କଥା। ଏଥିପାଇଁ ଫାୟାର ଅଡିଟ କରାଯାଇଥାଏ। କିନ୍ତୁ ସେସବୁ ଠିକ୍ ଭାବେ ପାଳନ ହେଉନାହିଁ। ଏସବୁର ତଦାରଖ ସୂଦୁର ୧୮୦ କି.ମି. ଦୂର ରାଉରକେଲାରେ ଥିବା ଅଗ୍ନିଶମ ସେବା ବିଭାଗ ବୁଝିଥାଏ। ଏଣୁ କମର୍ସିଆଲ ସଂସ୍ଥାଗୁଡିକ ଉପରେ ଲଗାମ ଲାଗିପାରୁନାହିଁ। ତେବେ ଅନେକଙ୍କ ବାହାରକୁ ଯିବାକୁ ସ୍ବତନ୍ତ୍ର ଆପାତ୍ତକାଳୀନ ରାସ୍ତା ନାହିଁ। ସେହିପରି ପ୍ରଶସ୍ତ ପ୍ରବେଶ ପଥ ମଧ୍ୟ ନାହିଁ। ଅନେକ କୋଠା ଚାରିପାଖ ଖୋଲା ନ ଥିବାରୁ ଦମକଳ ଗାଡ଼ି ମଧ୍ୟ ସେସବୁ କୋଠାର ଚାରିପାଖ ବୁଲି ପାଣି ସିଞ୍ଚନ କରିପାରିବ ନାହିଁ। ଫଳରେ ନିଆଁ ଆଖପାଖ ଘରୋଇ କୋଠାବାଡି ଆଦିକୁ ବ୍ୟାପିବା ସମ୍ଭାବନା ରହିଛି। ସେହିପରି ଗାନ୍ଧୀ ଛକ ନିକଟରେ ଦୁଇଟି ସପିଂ ମଲ ଲାଗି ଲାଗି ରହିଥିବାରୁ ଅଘଟଣ ଘଟିଲେ ବ୍ୟାପକ କ୍ଷୟକ୍ଷତି ହେବା ଆଶଙ୍କା ରହିଛି। ଏସମ୍ପର୍କରେ ଆସିଷ୍ଟାଣ୍ଟ ଫାୟାର ଅଫିସର କେ.ସି.ସାମଲ କହିଛନ୍ତି, ବିଭିନ୍ନ ସମୟରେ ବିଭିନ୍ନ ସରକାରୀ ଓ ବେସରକାରୀ ସଂସ୍ଥାର ଫାୟାର ସେଫଟି ବ୍ୟବସ୍ଥା ଯାଞ୍ଚ କରାଯାଇ ଜିଲା ମାଜିଷ୍ଟ୍ରେଟ ତଥା ଡିଜିଙ୍କୁ ରିପୋର୍ଟ କରାଯିବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥାଏ ା
