କୋରେଇ,୬।୫( ଚନ୍ଦ୍ରକାନ୍ତ ପତି): ଯାଜପୁର ଜିଲା ବ୍ୟାସନଗର ତହସିଲ ଅଧୀନ ବୈତରଣୀ ନଦୀର ବିଭିନ୍ନ ବାଲି ଖାଦାନରୁ ଦୀର୍ଘ ଦିନ ହେବ ବ୍ୟବସାୟୀମାନେ ବିପୁଳ ମାତ୍ରାରେ ବାଲି ଉତ୍ତୋଳନ କରି ଚୋରା ଚାଲାଣ କରୁଥିବା ଅଭିଯୋଗ ହୋଇଛି ା ରାଜସ୍ବ କିମ୍ବା ଖଣି ବିଭାଗ ପକ୍ଷରୁ ଏ ସଂକ୍ରାନ୍ତରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଜିଲାର ଜଣେ ପ୍ରଭାବଶାଳୀ ବ୍ୟକ୍ତିଙ୍କୁ ହାତ କରି ବାଲି ବ୍ୟବସାୟୀମାନେ ପ୍ରତିଦିନ ହାଇୱାରେ ଶତାଧିକ ଟ୍ରିପ ବାଲି ପଡୋଶୀ ରାଜ୍ୟକୁ ଚୋରା ଚାଲାଣ କରୁଛନ୍ତି । ଗତ ୪ରୁ୫ ବର୍ଷ ହେବ ଜିଲା ପ୍ରଶାସନ ଓ ବାଲି ବ୍ୟବସାୟୀଙ୍କ ଅସାଧୁ ମେଣ୍ଟ ଯୋଗୁ ସରକାର ପ୍ରାୟ ୧୦୦ କୋଟି ଟଙ୍କାର ରାଜସ୍ବ ହରାଇଥିବା ଆକଳନ କରାଯାଉଛି ।
ବ୍ୟାସନଗର ତହସିଲ ଅଧୀନ ଶାଳବା ଘାଟରୁ ଦୀର୍ଘ ମାସ ହେବ ଲିଜ୍ ଅବଧି ସରିଥିଲେ ହେଁ ବ୍ୟବସାୟୀମାନେ ଏହାକୁ ମାନିବାକୁ ପ୍ରସ୍ତୁତ ନାହାଁନ୍ତି । ପ୍ରତିଦିନ ୫ରୁ ୬ଟି ପ୍ରୋକୋଲିନ ଲଗାଇ ହାଇୱା ଯୋଗେ ଶତାଧିକ ଟ୍ରିପ ବାଲି ଅନ୍ୟ ଜିଲା ତଥା ପଡୋଶୀ ରାଜ୍ୟକୁ ଚୋରା ଚାଲାଣ କରୁଛନ୍ତି । ସେହିପରି କଣ୍ଟାବଣିଆ ଘାଟରୁ ମଧ୍ୟ ଅନୁରୂପ ଭାବେ ଏକାଧିକ ମେଶିନ ଲଗାଇ ରୀତିମତ ବାଲି ଚୋରାଚାଲାଣ କରାଯାଇଛି । ଜଳ ପ୍ରବାହ ମୁଖ୍ୟପଥରେ ବନ୍ଧ ପକାଇ ବାଲି ଉତ୍ତୋଳନ କରାଯାଉଛି। ଏହା କେବଳ ନଦୀର ପ୍ରାକୃତିକ ସମତୁଲ ପ୍ରକ୍ରିୟାକୁ ବ୍ୟାହତ କରୁନାହିଁ ବରଂ ଲୋକଙ୍କ ଜୀବନଚର୍ଯ୍ୟା ଉପରେ ନକରାତ୍ମକ ପ୍ରଭାବ ପକାଉଛି । ଅନେକ ସ୍ଥାନରେ ଘାଇ ସୃଷ୍ଟି ହେବା ସହ ନଦୀବନ୍ଧ କ୍ରମଶଃ ଦୁର୍ବଳ ହେବାରେ ଲାଗିଛି, ଯାହାକୁ ନେଇ ଆଖପାଖ ଅଞ୍ଚଳର ଲୋକେ ବନ୍ୟାକୁ ନେଇ ଭୟଭୀତ ଅଛନ୍ତି ।
ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ( ଏସ୍ପିସିବି )ଠାରୁ ପରିଚାଳନା ଅନୁମତି ବା କନସେଣ୍ଟ ଟୁ ଅପରେଟ ( ସିଟିଓ ) ଏବଂ ପରିବେଶଗତ ଅନୁମତି ଏନ୍ଭାଇରନମେଣ୍ଟ କ୍ଲିଅରାନ୍ସ ( ଇସି ) ନ ଥାଇ ବ୍ୟବସାୟୀମାନେ ଦୀର୍ଘ ମାସ ହେଲା ବେଆଇନ ଭାବେ ଏହି ୨ ଘାଟରୁ ବାଲି ଉତ୍ତୋଳନ କରି ଚୋରା ଚାଲାଣ କରୁଥିଲେ ମଧ୍ୟ ଖଣି ବିଭାଗ କିମ୍ବା ରାଜସ୍ବ ବିଭାଗ କାହା ବିରୋଧରେ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ନେଉନାହାନ୍ତି। ସବୁଠାରୁ ବଡ଼କଥା ହେଉଛି ଏହି ବାଲିଗାଡ଼ିଗୁଡ଼ିକ ଚଳପ୍ରଚଳ ପାଇଁ ନକଲି ଟ୍ରାନ୍ଜିଟ୍ ପାସ୍ ( ଟିପି ) ବ୍ୟବହାର ହେଉଛି। ଯାହା ଖଣି ବିଭାଗ ଜାଣି ମଧ୍ୟ ଅଜଣା ହୋଇଥିବା ମତପ୍ରକାଶ ପାଇଛି । ଏପରି ବ୍ୟବସାୟୀଙ୍କ ବିରୋଧରେ କେହି ମୁହଁ ଖୋଲିଲେ ଆକ୍ରୋଶର ଶିକାର ହେଉଛନ୍ତି। ଲୋକଙ୍କ ସୁରକ୍ଷା ଦିଗରେ ଦୃଷ୍ଟି ନ ଦେଇ ଜିଲା ପ୍ରଶାସନ ବାଲି ବ୍ୟବସାୟୀଙ୍କ ସହଯୋଗୀ ସାଜିଥିବା ଅଭିଯୋଗ ହେଉଛି ।
ଜିଲାର ଜଣେ ପ୍ରଭାବଶାଳୀ ବ୍ୟକ୍ତି, ଖଣି ବିଭାଗ ଓ ରାଜସ୍ବ ବିଭାଗର କେତେଜଣ ବରିଷ୍ଠ ଅଧିକାରୀଙ୍କୁ ମୋଟା ଅଙ୍କର ମୁନାଫା ଦେଇ ବ୍ୟବସାୟୀମାନେ ଦିନରାତି ବାଲି ଚୋରିରେ ଲିପ୍ତ ରହୁଛନ୍ତି। ଅଧିକାରୀଙ୍କ ଲାଭଖୋର ମନୋଭାବ ପାଖରେ ସରକାରଙ୍କ ସ୍ବଚ୍ଛତା ଫେଲ୍ ମାରିଥିବା ଚର୍ଚ୍ଚା ହେଉଛି । ଏହାର ଭିଜିଲାନ୍ସ ତଦନ୍ତ କରାଗଲେ ବିପୁଳ ପରିମାଣରେ ଆୟବର୍ହିଭୁତ ସମ୍ପତ୍ତି ଜବତ ହୋଇପାରନ୍ତା ବୋଲି ଆକଳନ କରାଯାଉଛି । ଏନେଇ ଜିଲା ଖଣି ଉପନିର୍ଦ୍ଦେଶକ ଜୟପ୍ରକାଶ ନାୟକଙ୍କ ମତାମତ ନେବାକୁ ଫୋନ୍ କରିଥିଲେ ହେଁ ସେ କଲ ଗ୍ରହଣ କରିନାହାନ୍ତି ା
