ବଲାଙ୍ଗୀର,୩୦।୯(ବୀରେନ୍ଦ୍ର କୁମାର ଝାଙ୍କର): ଜୀବନ ସାରା ଓଟ ପିଠିରେ ବସାଇ ଟଙ୍କା କମାଇ ଥିବା ମାଲିକ ଶେଷରେ ପୋଷା ଅସୁସ୍ଥ ଓଟକୁ ବଲାଙ୍ଗୀର ରାଜରାସ୍ତାରେ ଅସହାୟ ଅବସ୍ଥାରେ ଛାଡି ଫେରାର ମାରିବା ଘଟଣା ହଇଚଇ ସୃଷ୍ଟି କରିଛି। ଅସୁସ୍ଥ ଓଟଟି ଦୀର୍ଘ ଘଣ୍ଟା ଧରି ଛଟପଟ ହେବା ପରେ ମୃତ୍ୟୁବରଣ କରିବା ଦୃଶ୍ୟ ଅନେକଙ୍କୁ ବିଚଳିତ କରିଛି। ଶନିବାର ରାତିରୁ ବଲାଙ୍ଗୀର ବ୍ରାହ୍ମଣପଡାସ୍ଥିତ କରଙ୍ଗାକଟା ହିଡ ଉପରେ ଏକ ଅସୁସ୍ଥ ଓଟକୁ ଛାଡି ତାର ମାଲିକ କୁଆଡେ ଫେରାର ହୋଇଯାଇଥିଲା। ରବିବାର ସକାଳେ ଓଟଟି ସେଠାରେ ପଡି ରହି ଜୀବନ ସହ ସଂଘର୍ଷ କରୁଥିବା ଦେଖି ସ୍ଥାନୀୟ ସ୍ବେଚ୍ଛାସେବୀ ପ୍ରଶାନ୍ତ ମହାକୁର ପଶୁପକ୍ଷୀଙ୍କ ସୁରକ୍ଷା ଦିଗରେ କାର୍ଯ୍ୟ କରୁଥିବା କର୍ତ୍ତବ୍ୟ ଫାଉଣ୍ଡେଶନ ଏବଂ ବଲାଙ୍ଗୀର ମ୍ୟୁନିସିପାଲିଟି ନିର୍ବାହୀ ଅଧିକାରୀଙ୍କୁ ସୂଚନା ଦେଇଥିଲେ। କର୍ତ୍ତବ୍ୟ ଫାଉଣ୍ଡେଶନର ସ୍ବେଚ୍ଛାସେବୀ କାହ୍ନା ଶତପଥୀ ଘଟଣାସ୍ଥଳରେ ପହଞ୍ଚତ୍ ଛଟପଟ ହେଉଥିବା ଓଟର ଚିକିତ୍ସା ପାଇଁ ପ୍ରାଣୀଧନ ଚିକିତ୍ସାଧିକାରୀଙ୍କୁ ଯୋଗଯୋଗ କରିଥିଲେ। ବହୁ ଉଦ୍ୟମ ସତ୍ତ୍ୱେ ମଧ୍ୟାହ୍ନ ପ୍ରାୟ ୧୨ଟା ବେଳେ ଓଟଟି ମୃତ୍ୟୁବରଣ କରିଥିଲା। ରାଜସ୍ଥାନ, ମଧ୍ୟପ୍ରଦେଶ ଏବଂ ଗୁଜରାଟ ଅଞ୍ଚଳରୁ ଅନେକ ମାଲିକ ଓଟ, ଗଧ ଓ ଘୋଡା ନେଇ ଏହି ଅଞ୍ଚଳକୁ ଆସିଥାନ୍ତି। ଏଠାକାର ପିଲାଛୁଆ ତଥା ଲୋକଙ୍କୁ ମରୁଭୂମିର ଜାହାଜ କୁହାଯାଉଥିବା ଓଟ ପିଠିରେ ବସାଇ ମାଲିକ ବେଶ୍ କିଛି ଟଙ୍କା ରୋଗଜାର କରିଥାନ୍ତି। ତେବେ କିଛିବର୍ଷ ହେଲା କେତେଜଣ ମାଲିକ ଅସୁସ୍ଥ ଓ ବୟସ୍କ ଓଟକୁ ଆଣି ଏଭଳି ଖଟାଇବା ପରେ ଏଠାରେ ଅସହାୟ ଅବସ୍ଥାରେ ଛାଡି ଦେଇ ଫେରାର ମାରିବା ଭଳି ଘଟଣା ଘଟୁଛି। ଅସୁସ୍ଥ ଓଟଟି ମୃତ୍ୟୁବରଣ କରିବା ପରେ କାହ୍ନା ଶତପଥୀଙ୍କ ନେତୃତ୍ୱରେ ସହର ଉପକଣ୍ଟ ବିଜାଖମନ ଜଙ୍ଗଲ ଭିତରେ ତାକୁ ପୋତି ଦିଆଯାଇଛି। ପ୍ରାଣୀଧନ ଉପନିର୍ଦ୍ଦେଶକ ଜଳଧର ପ୍ରଧାନ ଘଟଣାସ୍ଥଳକୁ ଆସି ଅସୁସ୍ଥ ଓଟର ସ୍ବାସ୍ଥ୍ୟବସ୍ଥା ଯାଞ୍ଚ କରିଥିଲେ। ମ୍ୟୁନିସିପାଲିଟି ନିର୍ବାହୀ ଅଧିକାରୀ ବିଶ୍ୱମ୍ବର ମିଶ୍ର ଜେସିବି ପଠାଇ ମୃତ ଓଟକୁ ଉଠାଇବା ବ୍ୟବସ୍ଥା କରିଥିବା ଜଣାପଡିଛି। ପାର୍ବଣ, ଯାନିଯାତ୍ରା ସମୟରେ ଓଟ, ଘୋଡା, ଗଧ ଭଳି ପୋଷା ପଶୁଙ୍କୁ ଟଙ୍କା କମାଇବା ପାଇଁ ନ ଆଣିବା ଦିଗରେ ପଦକ୍ଷେପ ନେବାକୁ ସ୍ବେଚ୍ଛାସେବୀ ଶତପଥୀ ଓ ମହାକୁର ପ୍ରଶାସନକୁ ଅନୁରୋଧ କରିଛନ୍ତି।
