ଇମ୍ଫାଲ,୫ ।୧: ବଳାତ୍କାର ଓ ହତ୍ୟା ଅଭିଯୋଗରେ ଜଣେ ବ୍ୟକ୍ତି ନିର୍ଦ୍ଦୋଶରେ ୮ ବର୍ଷ ଜେଲ କାଟିଥିବା ବେଳେ ଏବେ ମଣିପୁର ସରକାର ତାଙ୍କୁ ସରକାରୀ ଚାକିରି ଯୋଗାଇ ଦେବେ ବୋଲି ଜଣାପଡିଛି । ମିଳିଥିବା ସୂଚନା ଅନୁଯାୟୀ, ଉକ୍ତ ବ୍ୟକ୍ତି ଜଣକ ୨୦୧୩ରେ ରିସର୍ଚ୍ଚ ଛାତ୍ରୀଙ୍କୁ ବଳାତ୍କାର ଓ ହତ୍ୟା ଅଭିଯୋଗରେ ଗିରଫ ହୋଇଥିଲେ । ଘଟଣା ପରେ ଲୋକେ ରାଗରେ ତାଙ୍କ ଘର ମଧ୍ୟ ଜାଳି ଦେଇଥିଲେ । ଏହି ମାମଲାର ବିଚାର ହେଉ ହେଉ ଦୀର୍ଘ ୮ ବର୍ଷ ବିତି ଯାଇଥିଲା । ଯାହାଫଳରେ ବ୍ୟକ୍ତି ଜଣକ ୮ବର୍ଷ ଜେଲରେ କାଟିଥିଲେ । ସୋମବାର ଏହି ମାମଲାର ଶୁଣାଣି କରି କୋର୍ଟ ଉକ୍ତ ବ୍ୟକ୍ତିଙ୍କୁ ନିର୍ଦ୍ଦୋଷ ବୋଲି କହିଛନ୍ତି । କୋର୍ଟର ରାୟ ଆସିବା ପରେ ମଣିପୁର ମୁଖ୍ୟମନ୍ତ୍ରୀ କହିଛନ୍ତି ତାଙ୍କୁ ସରକାରୀ ଚାକିରି ଦିଆଯିବ । ତେବେ ବିଚାର ପ୍ରକ୍ରିୟା ବିଳମ୍ବ ହେବାରୁ ସେ ତାଙ୍କର ମୂଲ୍ୟବାନ ୮ ବର୍ଷ ଜେଲରେ କାଟିଛନ୍ତି । ସେହି ସମୟ ମଧ୍ୟରେ ସେ କିଛି ଭଲ କାମ କରିପାରି ଥାଆନ୍ତେ ପୁଣି ନିଜ ପରିବାରକୁ ସାହାଯ୍ୟ ମଧ୍ୟ କରିପାରି ଥାଆନ୍ତେ । ତେଣୁ ଏବେ ସରକାର ତାଙ୍କୁ ଚାକିରି ଦେବାକୁ ସ୍ଥିର କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଏହି ଅଫର ସେ ନିଶ୍ଚୟ ଗ୍ରହଣ କରିବେ ଓ ଆଗକୁ ଭଲ କାମ କରିବେ ବୋଲି ଆଶା କରାଯାଏ । ସୂଚନାଯୋଗ୍ୟ, ତୌଦମ ଜିବଲ ସିଂ ରିମ୍ସ ପ୍ୟାଥୋଲୋଜି ଡିପାର୍ଟମେଣ୍ଟରେ ଜଣେ ଜୁନିୟର ରିସର୍ଚ୍ଚ ସ୍କଲାରଙ୍କୁ ବଳାତ୍କାର ଓ ହତ୍ୟା ଅଭିଯୋଗରେ ଗିରଫ କରାଯାଇଥିଲା । ୫ ଏପ୍ରିଲ ୨୦୧୩ରେ ମୃତା ଯୁବତୀଙ୍କ ଶରୀର ବାଙ୍ଗଲଖେଇ ଲୋକୁଲ କେନାଲରେ ମିଳିଥିଲା । ହେଲେ ଘଟଣାର ଦୁଇ ଦିନ ପୂର୍ବରୁ ଯୁବତି ନିଖୋଜ ଥିବା ସେତେବେଳେ କୁହାଯାଇଥିଲା ।
