ପୁରୀ ଅଫିସ,୯।୮:ଶ୍ରୀମନ୍ଦିର ରତ୍ନଭଣ୍ଡାରର ଯାଞ୍ଚ ଓ ମରାମତି ପାଇଁ ସବୁ ମହଲରେ ଦାବି ହେଉଥିବା ସତ୍ତ୍ବେ ପ୍ରଶାସନ କର୍ଣ୍ଣପାତ କରୁନାହିଁ। ଫଳରେ ରତ୍ନଭଣ୍ଡାର ଓ ସେଥିରେ ଥିବା ଦାରୁଦିଅଁଙ୍କ ଦୁର୍ମୂଲ୍ୟ ଅଳଙ୍କାରର ସ୍ଥିତିକୁ ନେଇ ସାଧାରଣରେ ପ୍ରଶ୍ନ ଉଠୁଛି। ଆଇନ ବିଭାଗ ଅଧୀନରେ ଶ୍ରୀମନ୍ଦିର ପ୍ରଶାସନ କାର୍ଯ୍ୟରତ। ତେବେ ୨୦୧୮ ଏପ୍ରିଲରେ ୧୭ଜଣିଆ ପ୍ରାଧିକୃତ କମିଟି ଶ୍ରୀମନ୍ଦିର ପ୍ରଶାସନକୁ ରତ୍ନ ଭଣ୍ଡାରର ରୁଗ୍ଣ ସ୍ଥିତି ସମ୍ପର୍କରେ ରିପୋର୍ଟ ଦେଇଥିଲେ ମଧ୍ୟ ତା’ର ମରାମତି ଲାଗି ଆଇନ ବିଭାଗକୁ ପରିଚାଳନା କମିଟି ସୁପାରିସ କରୁନାହିଁ। ଭିତର ରତ୍ନଭଣ୍ଡାରରେ ପାଣି ଗଳୁଥିବା, ଲୁହାଛଡ଼ ଦେଖାଯାଉଥିବା ଏବଂ ଭଗ୍ନାବସ୍ଥାରେ ରହିଥିବାରୁ ସାନି ଯାଞ୍ଚ ଓ ମରାମତି ଆବଶ୍ୟକ ବୋଲି ପ୍ରାଧିକୃତ କମିଟି ଯାଞ୍ଚ ରିପୋର୍ଟରେ ଉଲ୍ଲେଖ କରିଥିଲେ। ତେବେ ସମ୍ପୃୃକ୍ତ ରିପୋର୍ଟ ଏପର୍ଯ୍ୟନ୍ତ ପରିଚାଳନା କମିଟି ବୈଠକରେ ଉପସ୍ଥାପନ ହୋଇପାରିନାହିଁ। ୨୦୧୮ ଏପ୍ରିଲରେ ଦାଖଲ ହୋଇଥିବା ଯାଞ୍ଚ ରିପୋର୍ଟ ସମ୍ପର୍କରେ ଗତ ୪ବର୍ଷ ଭିତରେ ଥରୁଟିଏ ମଧ୍ୟ ପରିଚାଳନା କମିଟି ବୈଠକରେ ଆଲୋଚନା କରାଯାଇନାହିଁ। ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟ ଅନୁଯାୟୀ, ଆଇନ ବିଭାଗ ୨୦୧୮ ଏପ୍ରିଲରୁ ୨୦୨୨ ଏପ୍ରିଲ ମଧ୍ୟରେ ଶ୍ରୀମନ୍ଦିର ପରିଚାଳନା କମିଟିକୁ ରତ୍ନଭଣ୍ଡାର ସମ୍ପର୍କିତ କୌଣସି ପତ୍ର ଲେଖିନାହିଁ। ଶ୍ରୀମନ୍ଦିର ପ୍ରଶାସନର ଜଣେ ଅଧିକାରୀ କହିଛନ୍ତି, ଏନେଇ ଶ୍ରୀମନ୍ଦିର ପ୍ରଶାସନ କିମ୍ବା ଆଇନ ବିଭାଗକୁ ଦୋଷ ଦେବା ପରିବର୍ତ୍ତେ ପରିଚାଳନା କମିଟିକୁ ପ୍ରଶ୍ନ କରାଯିବା ଦରକାର। ଯାଞ୍ଚ ରିପୋର୍ଟ ମିଳିବା ପରେ ଶ୍ରୀମନ୍ଦିର ପରିଚାଳନା କମିଟି ନିଜ ଦାୟିତ୍ୱ ସମ୍ପାଦନରେ ଅବହେଳା କରିଛି। ପରିଚାଳନା କମିଟି ଏନେଇ ଆଇନ ବିଭାଗକୁ ସୁପାରିସ ନ କରିବା ପର୍ଯ୍ୟନ୍ତ ପ୍ରକ୍ରିୟା ଆଗେଇପାରିବ ନାହିଁ। ପରିଚାଳନା କମିଟି ଯାଞ୍ଚ ରିପୋର୍ଟ ସଂକ୍ରାନ୍ତରେ ଆଲୋଚନା କରି ଆଇନ ବିଭାଗକୁ ସୁପାରିସ କରିବା ଦରକାର। ଏହାପରେ ଆଇନ ବିଭାଗ ଶ୍ରୀମନ୍ଦିର ସହ ଜଡ଼ିତ ଅଂଶୀଦାରଙ୍କୁ ରିପୋର୍ଟ ମାଗିବେ ଓ ପ୍ରକ୍ରିୟା ତ୍ୱରାନ୍ବିତ ହୋଇପାରିବ। ଅନ୍ୟପକ୍ଷରେ ବିଧାନସଭାର ଚଳିତ ମୌସୁମୀ ଅଧିବେଶନରେ ବଲାଙ୍ଗିର ବିଧାୟକ ସନ୍ତୋଷ ସିଂ ସାଲୁଜା ରତ୍ନଭଣ୍ଡାର ମରାମତି ଓ ଯାଞ୍ଚ ଦାବି କରିଥିଲେ। ତେଣୁ ଗତ ୬ତାରିଖରେ ଅନୁଷ୍ଠିତ ପରିଚାଳନା କମିଟି ବୈଠକରେ ଏହି ପ୍ରସଙ୍ଗରେ ଆଲୋଚନା ହେବ ବୋଲି ଜଗନ୍ନାଥପ୍ରେମୀ ଆଶାବାଦୀ ଥିଲେ। ମାତ୍ର ଆଲୋଚନା ତ ଦୂରର କଥା, ଏହି ପ୍ରସଙ୍ଗରେ ପ୍ରତିକ୍ରିୟା ଦେବାକୁ ପରିଚାଳନା କମିଟି ମନା କରିଦେଇଥିଲେ ବୋଲି ସୂଚନା ଅଧିକାର କର୍ମୀ ଦିଲୀପ ବରାଳ ଅଭିଯୋଗ ଆଣିଛନ୍ତି। ଗତ ୬ତାରିଖର ଶ୍ରୀମନ୍ଦିର ପରିଚାଳନା କମିଟି ବୈଠକରେ ସମୟ ଅଭାବରୁ ରତ୍ନଭଣ୍ଡାର ପ୍ରସଙ୍ଗ ଆଲୋଚନା ହୋଇପାରି ନ ଥିବା ପରିଚାଳନା କମିଟି ସଦସ୍ୟ ମାଧବ ପୂଜାପଣ୍ଡା ସ୍ପଷ୍ଟ କରିଛନ୍ତି।
