ନୂଆଦିଲ୍ଲୀ,୨୩।୧୨: ମହାରାଷ୍ଟ୍ରର ପାଲଘର ଜିଲାରୁ ଏକ ଚାଞ୍ଚଲ୍ୟକର ହତ୍ୟା ମାମଲା ସାମ୍ନାକୁ ଆସିଛି। ବ୍ୟକ୍ତିଗତ ବିବାଦ ପରେ ଜଣେ ଯୁବକ ତାଙ୍କ ଅଫିସ ସହକର୍ମୀଙ୍କୁ ହତ୍ୟା କରି ତାଙ୍କ ମୃତଦେହ କମ୍ପାନୀ ପରିସରରେ ଥିବା ପାଣି ଟାଙ୍କିରେ ଫିଙ୍ଗି ଦେଇଛନ୍ତି। ଘଟଣାର କିଛି ଘଣ୍ଟା ମଧ୍ୟରେ ପୋଲିସ ଅଭିଯୁକ୍ତକୁ ଗିରଫ କରିଛି ।
ପୋଲିସ ଅନୁଯାୟୀ, ସୋମବାର ଭାସାଇର ଏକ ଶିଳ୍ପାଞ୍ଚଳରେ ଥିବା କମ୍ପାନୀ ପରିସରରେ ଏହି ଘଟଣା ଘଟିଛି। ଗିରଫ ଅଭିଯୁକ୍ତଙ୍କ ନାମ ୨୭ ବର୍ଷୀୟ ଆଶାରାମ ରାକେଶ । ମୃତକଙ୍କ ନାମ ତାଙ୍କ ସହକର୍ମୀ ରାକେଶ ସିଂହ। ଉଭୟେ ଗୋଟିଏ କମ୍ପାନୀରେ କାମ କରୁଥିଲେ। ପ୍ରାଥମିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତ ଏବଂ ମୃତକଙ୍କ ମଧ୍ୟରେ କୌଣସି କଥାକୁ ନେଇ ବିବାଦ ହୋଇଥିଲା। ବିବାଦ ଏତେ ବୃଦ୍ଧି ପାଇଥିଲା ଯେ, କ୍ରୋଧରେ ଆଶାରାମ ତାଙ୍କ ସହକର୍ମୀଙ୍କୁ ଲୁହା ରଡ୍ ସାହାଯ୍ୟରେ ଆକ୍ରମଣ କରିଥିଲେ। ଆକ୍ରମଣ ପରେ ପ୍ରମାଣ ଲୁଚାଇବା ପାଇଁ ଅଭିଯୁକ୍ତ ମୃତଦେହକୁ କମ୍ପାନୀ ପରିସରରେ ଥିବା ପାଣି ଟାଙ୍କିରେ ଫିଙ୍ଗି ଦେଇଥିଲେ।
କମ୍ପାନୀର ଅନ୍ୟ କର୍ମଚାରୀମାନେ କିଛି ସନ୍ଦେହଜନକ କାର୍ଯ୍ୟକଳାପ ଦେଖି ଘଟଣାଟି ସାମ୍ନାକୁ ଆସିଥିଲା। ସହକର୍ମୀମାନେ ତୁରନ୍ତ ମୃତକଙ୍କ ପରିବାର ଏବଂ ପୋଲିସକୁ ସୂଚନା ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ପାଣି ଟାଙ୍କିରୁ ମୃତଦେହକୁ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଛି । ପାଲଘରର ଜଣେ ପୋଲିସ ଅଧିକାରୀ କହିଛନ୍ତି ଯେ ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରି କିଛି ଘଣ୍ଟା ମଧ୍ୟରେ ଅଭିଯୁକ୍ତକୁ ଅଟକ ରଖିଥିଲା। ପଚରାଉଚରା ସମୟରେ ଅଭିଯୁକ୍ତ ଅପରାଧ ସ୍ୱୀକାର କରିଥିଲା। ପୋଲିସ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୧୦୩ ଅନୁଯାୟୀ ଏକ ମାମଲା ରୁଜୁ କରିଛି ଏବଂ ଅଧିକ ତଦନ୍ତ ଚାଲିଛି। ପୋଲିସ ବିବାଦର ମୂଳ କାରଣ ଏବଂ ଅନ୍ୟ କୌଣସି ବ୍ୟକ୍ତି ଏଥିରେ ସମ୍ପୃକ୍ତ ଅଛନ୍ତି କି ନାହିଁ ତାହା ମଧ୍ୟ ତଦନ୍ତ କରୁଛି।
