ଛତିଶଗଡ଼ର ଯଶପୁର ଜିଲାର ଉଦ୍ୟାନ ବିକାଶ ବ୍ଲକ ଛିପତାଲା ବାସିନ୍ଦା ସନ୍ତୋଷ ଲାକ୍ରାଙ୍କ ନାମ ଏବେ ବେଶ୍ ଚର୍ଚ୍ଚାରେ। କାରଣ ସନ୍ତୋଷ ଦୀର୍ଘ ୧୨ ବର୍ଷ ହେଲା ଅନ୍ନ ସ୍ପର୍ଶ ନ କରି କେବଳ ଗୋଡ଼ି, ପଥର ଖାଇ ଜୀବନ ବଞ୍ଚାଇଛନ୍ତି। ଈଶ୍ୱରଙ୍କ ନାମ ପ୍ରାର୍ଥନା କରି ସେ ଏପରି ଖାଉଛନ୍ତି ବୋଲି କହିଛନ୍ତି। ତାଙ୍କର ବିଶ୍ୱାସ ଗୋଡ଼ି ପଥର ଖାଇଲେ କୌଣସି ରୋଗ ବ୍ୟାଧି ହେବ ନାହିଁ। ଖାଲି ସେତିକି ନୁହେଁ, ସେ ଅନେକ ରୋଗରେ ପୀଡ଼ିତ ଲୋକଙ୍କୁ ଏପରି ଗୋଡ଼ି ପଥର ଖାଇବାକୁ ପରାମର୍ଶ ଦେଇ ଭଲ କରିଥିବା ବି ଦାବି କରନ୍ତି।
ସେ କହିଛନ୍ତି, ତାଙ୍କର ଏପରି କଳା ପଛରେ ଏକ ଐଶ୍ୱରୀୟ ଶକ୍ତି ଅଛି। ଫଳରେ ଏହାକୁ ଖାଇବା ଦ୍ୱାରା କୌଣସି ଅସୁବିଧା ହୁଏ ନାହିଁ। ପଥର ଖାଇବା ଦ୍ୱାରା ତାଙ୍କୁ ଅନ୍ୟ ଖାଦ୍ୟ ଦରକାର ପଡ଼େ ନାହିଁ। ତାଙ୍କ ପେଟ ପଥରରେ ପୂରିଯାଏ ଆଉ ପଥରଗୁଡିକ ସହଜରେ ହଜମ ମଧ୍ୟ ହୋଇଯାଏ ବୋଲି ସନ୍ତୋଷ କୁହନ୍ତି।
ସେ ଦୀର୍ଘ ୧୨ ବର୍ଷ ଧରି କ୍ରମାଗତ ଭାବରେ ଏହି ପଥର ଖାଇ ଆସୁଛନ୍ତି। ତାଙ୍କର ପଥର ଖାଇବା କଳା ଦେଖି ସ୍ଥାନୀୟ ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି। ସେମାନେ କୁହନ୍ତି, ଜୀବନରେ ଆଜି ପର୍ଯ୍ୟନ୍ତ ଏମିତି ପଥର ଖାଉଥିବା କେବେ କାହାକୁ ଦେଖିନାହାନ୍ତି।
ପ୍ରଥମେ ପରିବାର ଲୋକେ ଭୟ କରୁଥିଲେ। କାରଣ ପଥର ଖାଇବା କାଳେ କ’ଣ ଅଘଟଣ ଘଟିବ। କିନ୍ତୁ ବର୍ତ୍ତମାନ ସେ ଏହାକୁ ଅଭ୍ୟାସରେ ପରିଣତ କରିଛନ୍ତି। ସନ୍ତୋଷଙ୍କ ସ୍ତ୍ରୀ ଆଲିଶା କୁହନ୍ତି, ଥରକରେ ସେ ୧ ହଜାରରୁ ଅଧିକ ପଥର ଖାଇପାରନ୍ତି। ତଥାପି ତାଙ୍କର କିଛି ଅସୁବିଧା ହୋଇନାହିଁ କିମ୍ବା ଆଜି ପର୍ଯ୍ୟନ୍ତ ତାଙ୍କୁ ଡାକ୍ତରଙ୍କ ନିକଟକୁ ନିଆଯାଇନାହିଁ।
ଅବସରପ୍ରାପ୍ତ ସିଏମ୍ଏଚ୍ଓ ଡାକ୍ତର ସିଡି ବାଖ୍ଲା ପଥର ଖାଉଥିବା ସନ୍ତୋଷଙ୍କୁ ନେଇ ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ଏହା ସାଂଘାତିକ ହୋଇପାରେ ବୋଲି ସେ କହିଛନ୍ତି। ଏହି ଘଟଣାର ଅନୁସନ୍ଧାନ କରାଯିବା ଉଚିତ୍। କିଛି ଲୋକ କହିଛନ୍ତି, ପ୍ରଶାସନ ଏହି ପ୍ରସଙ୍ଗରେ ହସ୍ତକ୍ଷେପ କରିବା ଉଚିତ ଏବଂ ଏହାକୁ ବନ୍ଦ କରିବା ଉଚିତ୍। କାରଣ ଏହାକୁ ଅନ୍ୟ ଲୋକମାନେ ଅନୁସରଣ କରିବେ ଏବଂ ଏହା ସେମାନଙ୍କ ଜୀବନକୁ ବିପଦରେ ପକାଇପାରେ।
