କୋଲକାତା,୧୨ା୩(ପି.ଟି.): ପାଞ୍ଚ ରାଜ୍ୟ ବିଧାନସଭା ନିର୍ବାଚନକୁ ଭାଜପା ୪:୧ରେ ଜିତିଯିବା ପରେ ଫଳାଫଳ ୨୦୨୪ ଲୋକ ସଭାର ସଙ୍କେତ ଦେଉଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ଭାଜପା ମୁଖ୍ୟାଳୟଠାରେ ଦଳୀୟ କର୍ମୀମାନଙ୍କୁ ସମ୍ବୋଧିତ କରି କହିଥିଲେ। ଏହାର ଦିନକ ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ ନେତ୍ରୀ ମମତା ବାନାର୍ଜୀ ବିରୋଧୀ ମେଣ୍ଟକୁ ସୁଦୃଢ଼ କରିବାକୁ ପୁଣିଥରେ ଅଣ୍ଟା ଭିଡ଼ିଛନ୍ତି। ବିରୋଧୀ ମେଣ୍ଟରେ କଂଗ୍ରେସକୁ ସାମିଲ କରିବା ଲାଗି ସେ ଆମନ୍ତ୍ରଣ କରିଛନ୍ତି। ୨୦୨୪ ସାଧାରଣ ନିର୍ବାଚନକୁ ବିରୋଧୀ ଦଳଗୁଡ଼ିକ ଏକାଠି ଲଢ଼ିପାରିବା। ଏଥର ନିର୍ବାଚନରେ କଂଗ୍ରେସ ସର୍ବାଧିକ କ୍ଷତିଗ୍ରସ୍ତ ହୋଇଛି। ଆଗାମୀ ଦିନରେ ଭାଜପାକୁ ବଡ଼ ବ୍ୟବଧାନରେ ପରାଜିତ କରିବା ଲାଗି ବର୍ତ୍ତମାନର ଫଳାଫଳକୁ ସକାରାତ୍ମକ ଭାବେ ନେବା ଉଚିତ। ୨୦୨୪ ନିର୍ବାଚନ ଏକାଠି ଲଢ଼ିବା ପାଇଁ କଂଗ୍ରେସ ଯଦି ଚାହେଁ, ତେବେ ବର୍ତ୍ତମାନ ଆକ୍ରମଣାତ୍ମକ ନ ହୋଇ ସକାରାତ୍ମକ ହେଉ। ବର୍ତ୍ତମାନର ଫଳାଫଳ ୨୦୨୪ର ସଙ୍କେତ ଦେଉଛି ବୋଲି ପ୍ରଧାନମନ୍ତ୍ରୀଙ୍କ ମନ୍ତବ୍ୟକୁ ଟିଏମ୍ସି ଅଧ୍ୟକ୍ଷା ଖଣ୍ଡନ କରିଛନ୍ତି। ଏହା ବାସ୍ତବତା ନୁହେଁ। ଇଭିଏମ୍ରେ ଜାଲିଆତି ହୋଇଥିବା ମମତା ଅଭିଯୋଗ କରିଛନ୍ତି।
ବାରାଣସୀର ଏକ କେନ୍ଦ୍ରରୁ ଇଭିଏମ୍ ଚୋରି ହୋଇଥିବା ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ଅଭିଯୋଗ କରିଥିଲେ। ଉତ୍ତରପ୍ରଦେଶ ସମେତ ୪ ରାଜ୍ୟରେ ଭାଜପାର ବିଜୟକୁ ନେଇ ମମତା ସନ୍ଦେହ ପ୍ରକାଶ କରିଛନ୍ତି। ଭାଜପା ନିର୍ବାଚନ କଳ, କେନ୍ଦ୍ରୀୟ ବଳ ଏବଂ ସଂସ୍ଥାର ଅପବ୍ୟବହାର କରି ଜିତିଯାଇଛି। ସେମାନେ ନାଗରା ବଜାଉଛନ୍ତି। ଏଥିରେ ମ୍ୟୁଜିକ୍ ହୋଇପାରିବ ନାହିଁ। ମ୍ୟୁଜିକ୍ ପାଇଁ ହାରମୋନିୟମ ଦରକାର ବୋଲି ଟିଏମ୍ସି ନେତ୍ରୀ କହିଛନ୍ତି। ଇଭିଏମ୍ ସ୍ଥାନାନ୍ତର ଲାଗି ବାରାଣସୀର ଏଡିଏମ୍ଙ୍କୁ ନିଲମ୍ବନ କରାଯିବ ଏକ ବଡ଼ ଘଟଣା। ଅଖିଳେଶଙ୍କୁ ହରାଇ ଦିଆଯାଇଥିବା ସେ ଅନୁଭବ କରୁଛନ୍ତି ବୋଲି ମମତା କହିଛନ୍ତି। ଏସ୍ପି ନେତା ବିଚଳିତ ନ ହୋଇ ଲୋକଙ୍କ ପାଖକୁ ଯାଆନ୍ତୁ ଓ ଏହାର ଚ୍ୟାଲେଞ୍ଜ କରନ୍ତୁ ବୋଲି ଟିଏମ୍ସି ନେତ୍ରୀ ପରାମର୍ଶ ଦେଇଛନ୍ତି।
