କୋଲକାତା,୨୩।୬: ବିରୋଧୀଙ୍କୁ ସବୁବେଳେ ସମାଲୋଚନା କରି ଚର୍ଚ୍ଚାରେ ରହୁଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପୁଣି ଥରେ ଚର୍ଚ୍ଚାର ପରିସରକୁ ଆସିଛନ୍ତି। ମହାରାଷ୍ଟ୍ରରେ ରାଜନୈତିକ ସଙ୍କଟକୁ ନେଇ ମମତା ବାନାର୍ଜୀ ଭାଜପା ଉପରେ ବର୍ଷି କଟାକ୍ଷ କରିଛନ୍ତି। ଗୁରୁବାର ମମତା ଟୁଇଟ କରି ଭାଜପାକୁ ଟର୍ଗେଟ କରି ସମାଲୋଚନା କରିଛନ୍ତି। ସେ କହିଛନ୍ତି, ମହାରାଷ୍ଟ୍ରର ବିଦ୍ରୋହୀ ବିଧାୟକମାନଙ୍କୁ ପଶ୍ଚିମବଙ୍ଗକୁ ପଠାନ୍ତୁ ଆମେ ସେମାନଙ୍କର ଭଲ ଯତ୍ନ ନେବୁ, ନଚେତ୍ ସେମାନେ ସମ୍ବିଧାନ ଅନୁଯାୟୀ ମହାରାଷ୍ଟ୍ର ପରେ ଅନ୍ୟ ସରକାରକୁ ହଟାଇବାକୁ ମଧ୍ୟ ଚେଷ୍ଟା କରିବେ। ଅନ୍ୟପଟେ ଭାଜପା ମହାରାଷ୍ଟ୍ରରେ ରାଜନୈତିକ ଅସ୍ଥିରତା ସୃଷ୍ଟି କରିବାକୁ ଏହା ଉପଯୁକ୍ତ ସମୟ ବାଛିଛି ବୋଲି ମୁଖ୍ୟମନ୍ତ୍ରୀ ମମତା ଅଭିଯୋଗ କରିଛନ୍ତି। ସେ କହିଛନ୍ତି, ରାଷ୍ଟ୍ରପତି ନିର୍ବାଚନରେ ସେମାନେ ଏକ ଲକ୍ଷ ଭୋଟ ପଛରେ ଅଛନ୍ତି। ଫଳରେ ଭାଜପା ଅର୍ଥବଳ ଲଗାଇ ଘୋଡା ବେପାର କରିବାକୁ ପଛଘୁଞ୍ଚା ଦେବ ନାହିଁ। ଏଭଳି ସ୍ଥିତିରେ ଟିଏମ୍ସି ଉଦ୍ଧବ ସରକାରଙ୍କ ପାଇଁ ନ୍ୟାୟ ଚାହୁଁଛି ବୋଲି ମମତା କହିଛନ୍ତି। ଏତଦ୍ ବ୍ୟତୀତ ସେ କହିଛନ୍ତି, ଭାଜପା କ୍ଷମତାରେ ରହି ଗଣତନ୍ତ୍ର ଉପରେ ବୁଲଡୋଜର ଚଢ଼ାଉଛି। କ୍ଷମତା ପାଇଁ ଭାଜପା କିଛି ବି କରିପାରେ ବୋଲି ମମତା ଟୁଇଟ କରି କହିଛନ୍ତି।
