କୋଲକାତା,୫।୫: ୨୦୨୪ ସାଧାରଣ ନିର୍ବାଚନ ପୂର୍ବରୁ ଦକ୍ଷିଣ ରାଜ୍ୟରେ ମେ’ ୧୦ରେ ହେବାକୁ ଥିବା ବିଧାନସଭା ନିର୍ବାଚନରେ ଯଦି ଭାଜପାର ପତନ ଆରମ୍ଭ ହୁଏ, ତେବେ ମୁଁ ଖୁସି ହେବି। ରାଜ୍ୟରେ ଜନସମ୍ପର୍କ ଅଭିଯାନକୁ ସମ୍ବୋଧିତ କରି ଏଭଳି କହିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଏଥିସହ କର୍ନାଟକବାସୀଙ୍କୁ ରାଜ୍ୟ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି (ଭାଜପା) ବ୍ୟତୀତ ଅନ୍ୟ କୌଣସି ଦଳକୁ ଭୋଟ ଦେବାକୁ ମମତା ଅନୁରୋଧ କରିଛନ୍ତି।
ସେ ଆହୁରି କହିଛନ୍ତି, ଭାଜପା ଯେତେ ଶୀଘ୍ର କ୍ଷମତାରୁ ଦୂରେଇ ଯିବ, ଦେଶ ପାଇଁ ସେତେ ଭଲ ହେବ। କର୍ନାଟକ ବିଧାନସଭା ନିର୍ବାଚନରେ ଲୋକେ ଭାଜପାକୁ ଭୋଟ ନ ଦେଇ ନିଜ ପସନ୍ଦର ଅନ୍ୟ କୌଣସି ଦଳକୁ ଭୋଟ ଦେବା ଉଚିତ୍। ଯଦି କର୍ନାଟକରୁ ଭାଜପାର ପତନ ଆରମ୍ଭ ହୁଏ ତେବେ ମୁଁ ଖୁସି ହେବି। ନିର୍ବାଚନ ପାଖେଇ ଆସିବା ପରେ ଭାଜପା ମିଥ୍ୟା ପ୍ରଚାର କରୁଥିବା ଅଭିଯୋଗ କରିଛନ୍ତି ମମତା। ସୂଚନାଯୋଗ୍ୟ, ମେ’୧୦ରେ କର୍ନାଟକ ନିର୍ବାଚନ ଅନୁଷ୍ଠିତ ହେବ। ଯାହାକୁ ନେଇ ରାଜନୈତିକ ଦଳ ଜୋରଦାର ପ୍ରଚାର କରୁଛନ୍ତି।
