ନୂଆଦିଲ୍ଲୀ,୨୪।୨: ବ୍ୟବସାୟୀ ବିଜୟ ମାଲ୍ୟା, ନୀରବ ମୋଦି ଏବଂ ମେହୁଲ ଚୋକ୍ସିଙ୍କଠାରୁ ବ୍ୟାଙ୍କକୁ ୧୮,୦୦୦ କୋଟି ଟଙ୍କା ଫେରିଥିବା କେନ୍ଦ୍ର ସରକାର ବୁଧବାର ସୁପ୍ରିମକୋର୍ଟଙ୍କୁ ଜଣାଇଛନ୍ତି। ପଳାତକ ଅର୍ଥନୈତିକ ଅପରାଧ ଆଇନରେ ଏହି ୩ ବ୍ୟବସାୟୀଙ୍କୁ ପଳାତକ ଅପରାଧୀ ଘୋଷଣା କରାଯାଇଥିଲା। ମନି ଲଣ୍ଡରିଂ ପ୍ରତିକାର ଆଇନ (ପିଏମ୍ଏଲ୍ଏ)ରେ ଇଡିକୁ ମିଳିଥିବା କ୍ଷମତାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକାଧିକ ପିଟିଶନ ଦାଏର ହୋଇଥିଲା। ଜଷ୍ଟିସ୍ ଏ.ଏମ୍.ଖାନ୍ଓ୍ବିଲକରଙ୍କ ଅଧ୍ୟକ୍ଷତାରେ ଦିନେଶ ମାହେଶ୍ୱରୀ ଏବଂ ସି.ଟି. ରବିକୁମାରଙ୍କ ଖଣ୍ଡପୀଠ ସେଗୁଡ଼ିକର ଅନୁଧ୍ୟାନ କରିଥିଲେ। ସଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ, ମନିଲଣ୍ଡରିଂ ମାମଲାରେ ଉପରୋକ୍ତ ୩ ଅପରାଧୀଙ୍କଠାରୁ ପ୍ରବର୍ତ୍ତନ ନିର୍ଦ୍ଦେଶାଳୟ ୧୮,୦୦୦ କୋଟି ଟଙ୍କା ଆଦାୟ କରିଛି।
ମେହଟ୍ଟା କହିଥିଲେ, ବର୍ତ୍ତମାନ ସୁଦ୍ଧା ଇଡି ୪,୭୦୦ ମାମଲାର ତଦନ୍ତ କରୁଛି ଓ ମନିଲଣ୍ଡରିଂରେ ସମ୍ପୃକ୍ତ ୩୧୩ ଜଣଙ୍କୁ ଗିରଫ କରିଛି। ଗତ ୫ ବର୍ଷ ମଧ୍ୟରେ ଇଡି ୨,୦୮୬ ମାମଲା ତଦନ୍ତ ପାଇଁ ଗ୍ରହଣ କରିଛି। ୩୩ ଲକ୍ଷ ସମ୍ଭାବ୍ୟ ଅପରାଧ ପଞ୍ଜୀକୃତ ହୋଇଛି। ଅପରାଧ ଓ ମନି ଲଣ୍ଡରିଂର ମୁଖ୍ୟ ଉତ୍ସ ଦୁର୍ନୀତି। ଭାରତ ବିଶ୍ୱ ମନିଲଣ୍ଡରିଂ ନିରୋଧୀ ନେଟଓ୍ବର୍କର ଅଂଶବିଶେଷ ବୋଲି ସଲିସିଟର ଜେନେରାଲ କହିଥିଲେ। ପ୍ରଥମ ବ୍ୟବସାୟୀ ଭାବେ ବିଜୟ ମାଲ୍ୟାଙ୍କୁ ପଳାତକ ଅପରାଧୀ ଘୋଷଣା କରାଯାଇଥିଲା। କିଙ୍ଗ୍ଫିସର ଏୟାରଲାଇନ୍ ଅକାମୀ ହୋଇଯିବା ପରେ ୯,୦୦୦ କୋଟି ଟଙ୍କା ବ୍ୟାଙ୍କ ଋଣ ନେଇଥିବା ମାଲ୍ୟା ଏହାକୁ ପରିଶୋଧ ନ କରି ଦେଶ ଛାଡ଼ି ପଳାଇଥିଲେ। ଏବେ ସେ ଲଣ୍ଡନରେ ରହୁଛନ୍ତି। ସେହିପରି ପଳାତକ ହୀରା ବ୍ୟବସାୟୀ ନିରବ ମୋଦି ୨୦୧୯ ମାର୍ଚ୍ଚରେ ଗିରଫ ହୋଇ ଲଣ୍ଡନର ଓ୍ବାଣ୍ଡସ୍ଓ୍ବର୍ଥ ଜେଲ୍ରେ ରହିଛନ୍ତି। ସେ ପଞ୍ଜାବ ନ୍ୟାଶନାଲ ବ୍ୟାଙ୍କରୁ ୧୩,୫୦୦ କୋଟି ଟଙ୍କା ଋଣ ନେଇ ଠକିଛନ୍ତି। ତାଙ୍କର ପ୍ରତ୍ୟର୍ପଣ ଲାଗି ଭାରତ ପକ୍ଷରୁ ଆବେଦନ କରାଯାଇଛି। ନିରବଙ୍କ ମାମୁ ମେହୁଲ ଚୋକ୍ସି ମଧ୍ୟ ଋଣ ଠକେଇ କରି ୨୦୧୮ରେ ଦେଶଛାଡ଼ି ପଳାଇଥିଲେ। ସେବେଠାରୁ ସେ ଆଣ୍ଟିଗୁଆ ଓ ବାର୍ବାଡୋସ୍ରେ ରହୁଛନ୍ତି।
