ଭୁବନେଶ୍ୱର (କ୍ରୀଡ଼ା ପ୍ରତିନିଧି), ୨୦।୧:କଳିଙ୍ଗ ଷ୍ଟାଡିୟମରେ ଗୁରୁବାର ଅନୁଷ୍ଠିତ ହକି ବିଶ୍ୱକପ୍ର ପୁଲ୍ ‘ସି’ ମ୍ୟାଚରେ ମାଲେସିଆ ୩-୨ ଗୋଲରେ ନ୍ୟୁଜିଲାଣ୍ଡକୁ ପରାସ୍ତ କରିଛି। ଏଥିସହ ଦୁଇ ଦଳ ଗ୍ରୁପ୍ ପର୍ଯ୍ୟାୟ ଶେଷ କରିଛନ୍ତି। ମାଲେସିଆ ଅଧିନାୟକ ମାରହାନ ଜଲିଲ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି। ମାଲେସିଆ ୩ ମ୍ୟାଚରୁୁ ୨ ବିଜୟ ସହ ୬ ପଏଣ୍ଟ ପାଇ ଦ୍ୱିତୀୟ ସ୍ଥାନ ଅଧିକାର କରିଛି। ଅନ୍ୟପକ୍ଷରେ ନ୍ୟୁଜିଲାଣ୍ଡ ୩ ମ୍ୟାଚରୁ ୨ ପରାଜୟ ଓ ୧ ବିଜୟ ସହିତ ୩ ପଏଣ୍ଟ ପାଇଛି। ଫଳରେ ଏହି ଗ୍ରୁପ୍ରୁ ମାଲେସିଆ ଦ୍ୱିତୀୟ ଓ ନ୍ୟୁଜିଲାଣ୍ଡ ତୃତୀୟ ଦଳ ଭାବେ କ୍ରସ୍ ଓଭର ଖେଳିବାକୁ ଯୋଗ୍ୟ ବିବେଚିତ ହୋଇଛି। ଏହି ଗ୍ରୁପ୍ରୁ ନେଦରଲାଣ୍ଡ୍ସ ସିଧାସଳଖ କ୍ୱାର୍ଟର ଫାଇନାଲରେ ପ୍ରବେଶ କରିଛି।
ମ୍ୟାଚ ଆରମ୍ଭରେ ନ୍ୟୁଜିଲାଣ୍ଡ ପ୍ରଦର୍ଶନ ଅପେକ୍ଷାକୃତ ଧିମା ରହିଥିଲା। ଏହାର ଫାଇଦା ଉଠାଇଥିଲା ମାଲେସିଆ। ୯ମ ମିନିଟରେ ୧୦ ନମ୍ବର ଖେଳାଳି ଫୈଜଲ ସାରି ଫିଲ୍ଡ ଗୋଲଦେଇ ମାଲେସିଆକୁ ଅଗ୍ରଣୀ କରାଇଥିଲେ। ଏହାପରେ ନ୍ୟୁଜିଲାଣ୍ଡ ରଣନୀତିରେ ପରିବର୍ତ୍ତନ କରି ଆକ୍ରମଣାତ୍ମକ ଆଭିମୁଖ୍ୟ ପୋଷଣ କରିଥିଲେ ହେଁ ପ୍ରଥମାର୍ଦ୍ଧ ଶେଷସୁଦ୍ଧା ଗୋଲ ପରିଶୋଧ କରିପାରି ନ ଥିଲା। ତୃତୀୟ କ୍ୱାର୍ଟର ବେଶ୍ ସଂଘର୍ଷପୂର୍ଣ୍ଣ ହୋଇଥିଲା। ୪୨ତମ ମିନିଟରେ ମାଲେସିଆକୁ ଏକ ପେନାଲ୍ଟି କର୍ନର ମିଳିଥିଲା। ୪୩ତମ ମିନିଟରେ ଏହାକୁ ଗୋଲରେ କନଭର୍ଟ କରିଥିଲେ ରାଜି ରହିମ। ତୃତୀୟ କ୍ୱାର୍ଟରରେ ଅସଲ ଖେଳ ଦେଖିବାକୁ ମିଳିଥିଲା। କାଉଣ୍ଟର ଆଟାକ୍ କରି ସଫଳ ପ୍ରତ୍ୟାବର୍ତ୍ତନ କରିଥିଲା ନ୍ୟୁଜିଲାଣ୍ଡ। ୫୨ତମ ମିନିଟରେ ହେଡେନ ଫିଲିପ୍ସ ଏକ ଫିଲ୍ଡ ଗୋଲ ଦେଇଥିବାବେଳେ ୫୩ତମ ମିନିଟରେ ପେନାଲ୍ଟି କର୍ନରକୁ ଗୋଲରେ କନଭର୍ଟ କରି ମ୍ୟାଚକୁ ସମାନ ସ୍ତରକୁ ନେଇ ଆସିଥିଲେ ସାମ୍ ଲେନ୍। ମାତ୍ର ମାଲେସିଆକୁ ଭାଗ୍ୟ ସାଥ୍ ଦେଇଥିଲା। ମ୍ୟାଚର ଶେଷ ଭାଗରେ ନ୍ୟୁଜିଲାଣ୍ଡ ଡି’ ଏରିଆରେ ବଡ଼ ଗ୍ୟାପ୍ର ଫାଇଦା ଉଠାଇ ମାଲେସିଆର ଫୈଜଲ ସାରି ବ୍ୟକ୍ତିଗତ ଦ୍ୱିତୀୟ ଏବଂ ଦଳ ପକ୍ଷରୁ ତୃତୀୟ ଗୋଲଟି ସ୍କୋର କରିଥିଲେ। ଏହି ଗୋଲଟି ଶେଷରେ ନିର୍ଣ୍ଣାୟକ ହୋଇଥିଲା। ନ୍ୟୁଜିଲାଣ୍ଡକୁ ପଛରେ ପକାଇ ମାଲେସିଆ ଗ୍ରୁପ୍ରେ ଦ୍ୱିତୀୟ ସ୍ଥାନ ହାସଲ କରି ନେଇଥିଲା। ମାଲେସିଆ ୬ଟି ପେନାଲ୍ଟି କର୍ନର ପାଇଥିବାବେଳେ ଏଥିରୁ ଗୋଟିଏକୁ ଗୋଲରେ କନଭର୍ଟ କରିଥିଲା। ଅନ୍ୟପକ୍ଷରେ ନ୍ୟୁଜିଲାଣ୍ଡ ୩ଟି ପେନାଲ୍ଟି କର୍ନର ସୁଯୋଗ ସୃଷ୍ଟି କରିଥିଲା ଏବଂ ସେଥିରୁ ଗୋଟିଏକୁ ଗୋଲରେ ପରିଣତ କରିବାରେ ସକ୍ଷମ ହୋଇଥିଲା।
