ମୁମ୍ବାଇ,୨୩।୧୧: ମହାରାଷ୍ଟ୍ର ବିଧାନସଭା ନିର୍ବାଚନଫଳାଫଳ ପାଇଁ ଗଣନା ଚାଲିଛି ଏବଂ ପ୍ରାରମ୍ଭିକରେ ଭାରତୀୟ ଜନତା ପାର୍ଟି, ଜାତୀୟତାବାଦୀ କଂଗ୍ରେସ ପାର୍ଟି (ଅଜିତ ପାୱାର ଦଳ) ଏବଂ ଶିବସେନା (ଏକନାଥ ଶିନ୍ଦେ) ଆଗରେ ଅଛନ୍ତି। ଏପର୍ଯ୍ୟନ୍ତ ଟ୍ରେଣ୍ଡରେ୨୧୬ଟି ଆସନରେ ଆଗୁଆ ରହିଛି। ଅନ୍ୟପକ୍ଷରେ କଂଗ୍ରେସର ମହା ବିକାଶ ଅଗାଡି ମିଳିତ ମଞ୍ଚ, ଜାତୀୟତାବାଦୀ କଂଗ୍ରେସ ପାର୍ଟି (ଶରଦ ପାୱାର ଦଳ) ଏବଂ ଶିବସେନା (ଉଦ୍ଧବ ଠାକରେ ଦଳ) ୫୪ଟି ଆସନରେ ଆଗୁଆ ଅଛନ୍ତି। ଯଦି ଶେଷ ପର୍ଯ୍ୟନ୍ତ ଏହି ଧାରା ଜାରି ରହେ, ତେବେ ମହାରାଷ୍ଟ୍ରରେ ଏକ ମହାୟୁତି ସରକାର ହେବ, କିନ୍ତୁ ମୁଖ୍ୟମନ୍ତ୍ରୀ ପୁଣିଥରେ ଏକନାଥ ଶିନ୍ଦେ ହେବେ କି ନାହିଁ ତାହା କହିବା କଷ୍ଟକର।
ମୁଖ୍ୟମନ୍ତ୍ରୀ ପଦ ପାଇଁ ମହାୟୁତିରୁ ଏପର୍ଯ୍ୟନ୍ତ କୌଣସି ଚେହେରା ଆସିନାହିଁ। ଏଭଳି ପରିସ୍ଥିତିରେ ସିଏମ ପଦ ପାଇଁ ଦେବେନ୍ଦ୍ର ଫଡନ୍ଭିସ, ଅଜିତ ପାୱାର ଏବଂ ଏକନାଥ ଶିନ୍ଦେ ତିନି ଜଣ ମୁଖ୍ୟ ପ୍ରତିଦ୍ୱନ୍ଦ୍ୱୀ ଅଛନ୍ତି ବୋଲି କୁହାଯାଉଛି। ଏହି ସମୟରେ ଅଜିତ ପାୱାରଙ୍କ ସମର୍ଥନରେ ପୋଷ୍ଟର ଲଗାଯିବା ଆରମ୍ଭ ହୋଇଛି। ରାଜ୍ୟର ୨୮୮ଟି ସିଟ ମଧ୍ୟରୁ ମହାୟୁତି ୨୧୬ ଟି ଆସନରେ ଆଗୁଆ ଅଛନ୍ତି, ସେଥିମଧ୍ୟରୁ ଭାଜପା ୧୨୨ଟିରେ, ଏକନାଥ ଶିନ୍ଦେଙ୍କ ସେନା ୫୭ଟି ଆସନରେ ଏବଂ ଅଜିତ ପାୱାରଙ୍କ ଦଳ ଏନସିପି ୩୭ଟି ସିଟରେ ଆଗୁଆ ରହିଛି।
