ଜମ୍ମୁ, ୨୫।୧୨: ଜମ୍ମୁ-କଶ୍ମୀରରେ ଗତ ଅଢ଼େଇ ବର୍ଷ ହେବ ବ୍ୟବସାୟ ଏବଂ ବିକାଶମୂଳକ କାର୍ଯ୍ୟ ଅଟକିଯାଇଛି। ଜନସାଧାରଣଙ୍କୁ ଦାରିଦ୍ର୍ୟ ମଧ୍ୟକୁ ଠେଲି ଦିଆଯାଇଛି ବୋଲି ବରିଷ୍ଠ କଂଗ୍ରେସ ନେତା ଗୁଲାମ ନବୀ ଆଜାଦ କହିଛନ୍ତି।
କେନ୍ଦ୍ରର ଭାଜପା ନେତୃତ୍ୱାଧୀନ ସରକାରଙ୍କୁ ସମାଲୋଚନା କରି ଗୁଲାମ ନବୀ କହିଛନ୍ତି, ମହାରାଜାମାନଙ୍କ ସ୍ବେଚ୍ଛାଚାରୀ ଶାସନ ବର୍ତ୍ତମାନର ବ୍ୟବସ୍ଥାଠାରୁ ବହୁତ ଭଲ ଥିଲା। ଜମ୍ମୁ-କଶ୍ମୀରରେ ଦୀର୍ଘବର୍ଷରୁ ଚଳିଆସୁଥିବା ଦରବାର ପରିବର୍ତ୍ତନ ପରମ୍ପରାକୁ ବର୍ତ୍ତମାନର ସରକାର ଉଚ୍ଛେଦ କରିଦେଇଛନ୍ତି। ଦରବାର ପରିବର୍ତ୍ତନରେ ସଚିବାଳୟ ଓ ଅନ୍ୟ ପ୍ରମୁଖ କାର୍ଯ୍ୟାଳୟଗୁଡ଼ିକ ଗ୍ରୀଷ୍ମ ୬ ମାସ ଶ୍ରୀନଗରରେ ଏବଂ ବର୍ଷର ଅବଶିଷ୍ଟ ସମୟ ଜମ୍ମୁରେ କାର୍ଯ୍ୟ କରୁଥିଲା। ୧୮୭୨ରେ ମହାରାଜା ଗୁଲାବ ସିଂ ଏହି ପରମ୍ପରା ଆରମ୍ଭ କରିଥିଲେ। ଗତ ଜୁନ୍ ୨୦ରେ ଉପରାଜ୍ୟପାଳ ମନୋଜ ସିହ୍ନା ଉକ୍ତ ପରମ୍ପରା ଉଚ୍ଛେଦ ହେଲା ବୋଲି ଘୋଷଣା କରିଥିଲେ। ମହାରାଜାମାନେ ୩ଟି ବ୍ୟବସ୍ଥା ଛାଡ଼ିଯାଇଥିଲେ, ଯାହା ଉଭୟ ଜମ୍ମୁ ଓ କଶ୍ମୀର ଅଞ୍ଚଳର ଜନସାଧାରଣଙ୍କ ହିତ ପାଇଁ ଉଦ୍ଦିଷ୍ଟ ଥିଲା। ସେଥିରୁ ଗୋଟିଏ ଦରବାର ପରିବର୍ତ୍ତନ ବୋଲି ଗୁଲାମ ନବୀ କହିଛନ୍ତି। ସେହିପରି ମହାରାଜା ହରି ସିଂ ରାଜ୍ୟ ବାହାର ଲୋକଙ୍କଠାରୁ ଜମି ଓ ନିଯୁକ୍ତି ସୁରକ୍ଷା ପାଇଁ ବ୍ୟବସ୍ଥା କରିଥିଲେ। ବର୍ତ୍ତମାନର ସରକାର ଦରବାର ପରିବର୍ତ୍ତନ, ଜମି ଓ ନିଯୁକ୍ତି ସୁରକ୍ଷା ଏବଂ ସମ୍ବିଧାନର ଅନୁଚ୍ଛେଦ ୩୭୦ ରାଜ୍ୟବାସୀଙ୍କଠାରୁ ଛଡ଼ାଇ ନେଇଛନ୍ତି। ସେତେବେଳେ ଏକଚ୍ଛତ୍ରବାଦୀ କୁହାଯାଉଥିବା ଏହି ମହାରାଜାମାନେ ବର୍ତ୍ତମାନର ସରକାରଠାରୁ ବହୁଗୁଣରେ ଭଲ ଥିଲେ ବୋଲି ଏବେ ଅନୁଭୂତ ହେଉଥିବା ବରିଷ୍ଠ କଂଗ୍ରେସ ନେତା କହିଛନ୍ତି।
