ସମ୍ବଲପୁର,୨୦ା୫(ବ୍ୟୁରୋ): ମହାନଦୀ ଜଳ ବିବାଦକୁ ନେଇ ଗଠିତ ହୋଇଥିବା ଟ୍ରିବ୍ୟୁନାଲ ଟିମ୍ ଶୁକ୍ରବାର ସମ୍ବଲପୁରରେ ପହଞ୍ଚିଛି। ଆସନ୍ତା ୨୨ ତାରିଖ ପର୍ଯ୍ୟନ୍ତ ଏହି ଟିମ୍ ବିଭିନ୍ନ ସ୍ଥାନ ପରିଦର୍ଶନ ସହ ସମୀକ୍ଷା କରିବା କାର୍ଯ୍ୟକ୍ରମ ରହିଛି। ଶୁକ୍ରବାର ସନ୍ଧ୍ୟା ୭ଟାରେ ଝାରସୁଗୁଡା ବିମାନବନ୍ଦରରେ ଟିମ୍ ସଦସ୍ୟ ଓହ୍ଲାଇ ସମ୍ବଲପୁର ବୁର୍ଲା ଅଶୋକ ନିବାସକୁ ଆସିଥିଲେ। ଏହି ୩ ଜଣିଆ ଟିମ୍ରେ ଟ୍ରିବ୍ୟୁନାଲ ଅଧ୍ୟକ୍ଷ ଜଷ୍ଟିସ ଏ.ଏମ୍. ଖନୱାଲିକର, ସଦସ୍ୟ ଜଷ୍ଟିସ ରବି ରଞ୍ଜନ, ସଦସ୍ୟ ଜଷ୍ଟିସ ଇନ୍ଦ୍ରଜିତ କୌର କୋଚିହାର ରହିଛନ୍ତି। ଏମାନେ ଦୁଇଦିନ ଧରିି ହୀରାକୁଦ ଡ୍ୟାମ, ଚିପିଲିମା ପାୱାର ହାଉସ, ମହାନଦୀ ତଳମୁଣ୍ଡ ପରିଦର୍ଶନ କରିବେ। ଏହାସହ ଜଳବିଭାଗ ଓ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିବେ। ମେ ୨୨ରେ ଟିମ୍ ଝାରସୁଗୁଡା ଜିଲା ଗସ୍ତ କରିବା କାର୍ଯ୍ୟକ୍ରମ ରହିଛି। ଓପିଜିସି ଇନ୍ଟେନ ପଏଣ୍ଟ, ଇବ ଥର୍ମାଲ ପାୱାର ପ୍ଲାଣ୍ଟ, ଆଇବି ଡ୍ୟାମ୍ ପରିଦର୍ଶନ କରି ସମ୍ବଲପୁର ଫେରି ଆସିବେ। ସୁରକ୍ଷା ଦୃଷ୍ଟିରୁ ହୀରାକୁଦ ଜବାହର ଉଦ୍ୟାନକୁ ମେ ୧୯ ଓ ୨୦ ତାରିଖ ସର୍ବସାଧାରଣ ପାଇଁ ବନ୍ଦ କରି ଦିଆଯାଇଛି ା ହୀରାକୁଦ ଡ୍ୟାମ୍ ମୁଖ୍ୟଯନ୍ତ୍ରୀ ଏ ନେଇ ନିର୍ଦ୍ଦେଶ ଦେଇଛନ୍ତି ା ସେହିପରି ମେ ୨୧ରେ ଟିମ ସଦସ୍ୟମାନେ ସମଲେଇ ମନ୍ଦିର ଦର୍ଶନ କରିବାର କାର୍ଯ୍ୟକ୍ରମ ରହିଛି। ସମଲେଇ ମନ୍ଦିରରେ ଥିବା ଲାଇଟ୍ ଆଣ୍ଡ ସାଉଣ୍ଡ ଶୋ ମଧ୍ୟ ଦେଖିବେ। ଲୋକମାନଙ୍କୁ ସହଯୋଗ କରିବାକୁ ଅନୁରୋଧ କରାଯାଇଛି। ସୂଚନାଯୋଗ୍ୟ, ମହାନଦୀ ଜଳ ବିବାଦକୁ ନେଇ ଓଡ଼ିଶା ଓ ଛତିଶଗଡ ଦୁଇ ରାଜ୍ୟ ମଧ୍ୟରେ ବିବାଦ ଲାଗିରହିଛି। ଏହି ବିବାଦର ସମାଧାନ ପାଇଁ ଗଠିତ ହୋଇଥିବା ଟ୍ରିବ୍ୟୁନାଲ ଟିମ୍ ପ୍ରଥମେ ଛତିଶଗଡ ଯାଇ ସ୍ଥିତି ଅନୁଧ୍ୟାନ କରିଥିଲା।
