ବରଗଡ଼,୧୩ା୧୨(ପ୍ରେମାନନ୍ଦ ଖମାରୀ): ମହାନଦୀ ଜଳ ବିବାଦ ତଥା ମହାନଦୀ ସଙ୍କଟକୁ ନେଇ ବିଜେଡ଼ି ପୁଣି ରାଜ୍ୟ, କେନ୍ଦ୍ର ସରକାରକୁ ଘେରିବା ଆରମ୍ଭ କରିଛି। ଓଡ଼ିଶା ଏବଂ ଛତିଶଗଡ଼ରେ ଭାଜପା ସରକାର ଚାଲିଛି। ସେହିପରି କେନ୍ଦ୍ରରେ ମଧ୍ୟ ଭାଜପା ନେତୃତ୍ୱାଧୀନ ସରକାର ରହିଛି। ବର୍ତ୍ତମାନ ଭାଜପାର ଏଭଳି ଟ୍ରିପଲ ଇଞ୍ଜିନ ସରକାର ଚାଲିଥିବା ସତ୍ତ୍ୱେ ଏପର୍ଯ୍ୟନ୍ତ ମହାନଦୀ ଜଳ ବିବାଦର ସମାଧାନ ନ ହେବା ନେଇ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ଉଦ୍ବେଗ ପ୍ରକାଶ କରିଛନ୍ତି। ଏକ ପ୍ରେସ ବିବୃତ୍ତିରେ ସେ କହିଛନ୍ତି, ମହାନଦୀ ଓଡ଼ିଶାର ଜୀବନ ସ୍ରୋତ। କିନ୍ତୁ କିଛି ଦଶନ୍ଧି ହେଲା, ଓଡ଼ିଶାବାସୀଙ୍କ ଏହି ଜୀବନ ସ୍ରୋତକୁ ସଂକୁଚିତ କରି ଦିଆଯାଉଛି। ଏଥିପାଇଁ ଆର୍ତ୍ତ ଚିତ୍କାର କଲେ ମଧ୍ୟ କେନ୍ଦ୍ର ସରକାର କିମ୍ବା ରାଜ୍ୟ ସରକାର ଶୁଣୁ ନାହାନ୍ତି। ଅନ୍ୟପଟେ ଓଡ଼ିଶାର ବିନା ସହମତିରେ ଆନ୍ତଃରାଜ୍ୟ ନଦୀଜଳ ସମ୍ପର୍କିତ ସମସ୍ତ ବିଧି, ବିଧାନକୁ ବେଖାତିର୍ କରି ଛତିଶଗଡ଼ ସରକାର ମହାନଦୀ ଉପରେ ଅତ୍ୟାଚାର କରୁଛନ୍ତି।
ସେହିପରି ମହାନଦୀ ଉପରମୁଣ୍ଡରେ ବ୍ୟାରେଜ ପରେ ବ୍ୟାରେଜ ନିର୍ମାଣ କରି ମହାନଦୀ ଜଳସ୍ରୋତକୁ ମନଇଚ୍ଛା ଛତିଶଗଡ଼ ସରକାର ନିଜ ଅଧୀନରେ ରଖି ଓଡ଼ିଶାର ଦାରୁଣ କ୍ଷତି ଘଟାଉଛନ୍ତି ବୋଲି ପ୍ରସନ୍ନ ଅଭିଯୋଗ କରିଛନ୍ତି।
ସେ ଆହୁରି କହିଛନ୍ତି, କେନ୍ଦ୍ର ଓ କେନ୍ଦ୍ରୀୟ ଜଳ ଆୟୋଗ ମଧ୍ୟ ଏଧିପ୍ରତି ନୀରବ ରହିଛନ୍ତି। ଛତିଶଗଡ଼ ସରକାର ମହାନଦୀ ଉପରମୁଣ୍ଡର କୂଳେକୂଳେ ଅଗଣିତ ଘରୋଇ ଶିଳ୍ପମାନଙ୍କୁ ଅଜସ୍ର ଜଳ ପ୍ରଦାନ କରୁଛନ୍ତି ଏବଂ ଓଡ଼ିଶାରେ ଜଳ ସଙ୍କଟ ସୃଷ୍ଟି କରୁଛନ୍ତି। ଫଳରେ ଏକଦା ବର୍ଷତମାମ ଜଳପୂର୍ଣ୍ଣ ରହିଥିବା ମହାନଦୀ ଆଜି ଶୁଖିଲା ପଡ଼ୁଛି ଏବଂ ହୀରାକୁଦ ଜଳଭଣ୍ଡାର ଦିନେ ଜଳଶୂନ୍ୟ ହୋଇ ଅନିଶ୍ଚିତ ସଙ୍କଟ ଭିତରକୁ ଠେଲି ହୋଇଯିବାର ଆଶଙ୍କା ଦେଖାଦେଇଛି। ବର୍ତ୍ତମାନ ଓଡ଼ିଶା ଏବଂ ଛତିଶଗଡ଼ରେ ଗୋଟିଏ ସରକାର ରହିଥିବା ଯୋଗୁ ଏହାର ଶୀଘ୍ର ସମାଧାନ ପାଇଁ ଲୋକେ ଆଶା ରଖିଥିଲେ। ମାତ୍ର ଫଳ ଶୂନ। କେବଳ କମିଟି ପରେ କମିଟି ଗଠନ ସହିତ ରାଜ୍ୟର ରାଜକୋଷରୁ କୋଟିକୋଟି ଟଙ୍କା ଖର୍ଚ୍ଚ ହେଉଛି। ମହାନଦୀ ଜଳ ଟ୍ରିବ୍ୟୁନାଲ ନିକଟରେ ମାମଲାଟି ୭ ବର୍ଷରୁ ଊର୍ଦ୍ଧ୍ୱ ସମୟ ପଡ଼ି ରହିଛି। କିନ୍ତୁ ପ୍ରଗତି ନୈରାଶ୍ୟଜନକ ବୋଲି ପ୍ରସନ୍ନ ଅଭିଯୋଗ କରି ସରକାର ଟ୍ରିବ୍ୟୁନାଲରୁ ଓହରିଯିବେ ନା ଆପୋସ ସମାଧାନ ପାଇଁ ଆଲୋଚନାର କ’ଣ ସର୍ତ୍ତାବଳୀ ରହିବ ବୋଲି ପ୍ରଶ୍ନ କରିଛନ୍ତି। ଏହା ସହିତ ଆପୋସ ସମାଧାନ ପାଇଁ ଆଲୋଚନାକୁ ଯିବା ପୂର୍ବରୁ ରାଜ୍ୟର ସମସ୍ତ ପ୍ରମୁଖ ରାଜନୈତିକ ଦଳ, ମହାନଦୀ ବଞ୍ଚାଅ ଆନ୍ଦୋଳନ ସଂଗଠନମାନଙ୍କୁ ବିଶ୍ୱାସକୁ ନେଇ ସେମାନଙ୍କ ସହିତ ଆଲୋଚନା କରିବେ କି ବୋଲ ପ୍ରସନ୍ନ ରା୍ଯଯ ସରକାରଙ୍କୁ ପ୍ରଶ୍ନ କରିଛନ୍ତି। ଛତିଶଗଡ଼ ସରକାର ଏବେ ସୁଦ୍ଧା ମହାନଦୀ ଏବଂ ଶାଖାନଦୀରେ ଚାଲୁ ରଖିଥିବା ନିର୍ମାଣାଧୀନ କାର୍ଯ୍ୟକୁ ବନ୍ଦ ରଖାଯିବ ନା ନାହିଁ ତାର ଉତ୍ତର ମଧ୍ୟ ପ୍ରସନ୍ନ ଲୋଡ଼ଥିବାବେଳେ ମହାନଦୀ ଟ୍ରିବ୍ୟୁନାଲର ଦୈନନ୍ଦିନ କାର୍ଯ୍ୟ ବସ୍ତୁତଃ ବନ୍ଦ ରହିଥିବା ଯୋଗୁ ଏହାକୁ ତ୍ୱରାନ୍ବିତ କରିବା ପାଇଁ ରାଜ୍ୟ ସରକାର ପୁଣି ଟ୍ରିବ୍ୟୁନାଲ ନିକଟରେ ଆବେଦନ କରିବେ ବୋଲି ସେ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି।
