ନୂଆଦିଲ୍ଲୀ,୨୩।୧୧: ଲଦାଖ ସେକ୍ଟରର ଗଲୱାନ ଘାଟିରେ ଚାଇନା ସୈନ୍ୟଙ୍କ ସହିତ ସଂଘର୍ଷରେ ଶହୀଦ୍ ହୋଇଥିବା କର୍ନଲ ସନ୍ତୋଷ ବାବୁଙ୍କୁ ମଙ୍ଗଳବାର ମହାବୀର ଚକ୍ରରେ ସମ୍ମାନିତ କରାଯାଇଛି। ତାଙ୍କ ମାତା ଓ ସ୍ତ୍ରୀଙ୍କୁ ରାଜ ଭବନରେ ରାଷ୍ଟ୍ରପତି ରାମ ନାଥ କୋବିନ୍ଦ ଏହି ମରଣୋତ୍ତର ସମ୍ମାନ ପ୍ରଦାନ କରିଛନ୍ତି।
ଗଲୱାନର ସ୍ନୋ-ଲିଓପାର୍ଡ ଅପରେଶନ୍ରେ ଶହୀଦ୍ ହୋଇଥିବା ଅନ୍ୟ ୪ ଜଣଙ୍କୁ ବୀର ଚକ୍ର ପ୍ରଦାନ କରାଯାଇଛି। ସେମାନେ ହେଉଛନ୍ତି ନାଏବ ସୁବେଦାର ନୁଡୁରାମ ସୋରେନ (୧୬ ବିହାର), ହାଭିଲଦାର କେ. ପିଲାନି (୮୧ଫିଲ୍ଡ ରେଜିମେଣ୍ଟ), ନାୟକ ଦୀପକ କୁମାର (ଆର୍ମି ମେଡିକାଲ କର୍ପସ -୧୬ ବିହାର), ସିପାହୀ ଗୁରୁଜେତ ସିଂ (୩ ପଞ୍ଜାବ)। ଚଳିତ ବର୍ଷ ଗଣତନ୍ତ୍ର ଦିବସ ଅବସରରେ ଗଲୱାନ ଘାଟିରେ ଶହୀଦ୍ ହୋଇଥିବା ଯବାନଙ୍କୁ ସମ୍ମାନୀତ କରାଯିବା ଲାଗି ଘୋଷଣା କରାଯାଇଥିଲା। ଶହୀଦ କର୍ନଲଙ୍କ ପିତା ବି ଉପେନ୍ଦ୍ର ଏହି ସମ୍ମାନରେ ସନ୍ତୁଷ୍ଟ ନୁହଁନ୍ତି। ସେ କହିଛନ୍ତି ଯେ ସନ୍ତୋଷଙ୍କୁ ପରମବୀର ଚକ୍ର ସମ୍ମାନ ଦେବା ଉଚିତ ଥିଲା।
