ପୁଣେ,୧୩।୧୨: ମହାରାଷ୍ଟ୍ରର ସାଙ୍ଗଲି ଜିଲାରେ ଭଲ ଗୁଣବତ୍ତା ମାଂସ ପାଇଁ ପ୍ରସିଦ୍ଧ ‘ମାଡାଗୟାଲ’ ପ୍ରଜାତିର ଏକ ମେଣ୍ଢା ୭୦ ଲକ୍ଷ ଟଙ୍କାରେ କିଣିବାକୁ ପ୍ରସ୍ତାବ ଦିଆଯାଇଥିଲା, କିନ୍ତୁ ମେଣ୍ଢା ମାଲିକ ଏହାକୁ ବିକ୍ରୟ କରିବାକୁ ମନା କରିଦେଇଥିଲେ ଏବଂ ଏହାର ମୂଲ୍ୟ ୧.୫ କୋଟି ଟଙ୍କା ଦାବି କରିଥିଲେ। ସାଙ୍ଗଲିର ଜାଟ ତହସିଲରେ ମାଡାଗିଆଲ ପ୍ରଜାତିର ମେଣ୍ଢା ମିଳିଥାଏ ଏବଂ ସେଗୁଡିକ ଅନ୍ୟ ପ୍ରଜାତି ଅପେକ୍ଷା ଆକାରରେ ବଡ଼। ଏହି ପ୍ରଜାତିର ମେଣ୍ଢାଙ୍କ ବଜାରରେ ଚାହିଦା ଅଧିକ। ସାଙ୍ଗଲିର ଅଟପାଡି ତହସିଲର ମେଷପାଳକ ବାବୁ ମେଟକାରିଙ୍କର ୨୦୦ ମେଣ୍ଢା ଅଛନ୍ତି। ଏକ ମେଳାରେ ଜଣେ ବ୍ୟକ୍ତି ବାବୁଙ୍କଠାରୁ ୭୦ ଲକ୍ଷ ଟଙ୍କାରେ ଗୋଟିଏ ମେଣ୍ଢା କିଣିବାକୁ ପ୍ରସ୍ତାବ ଦେଇଥିଲେ। ସେତେବେଳେ ସେ ଆଶ୍ଚର୍ଯ୍ୟ ହୋଇଯାଇଥିଲେ, କିନ୍ତୁ ଅଧିକ ମୂଲ୍ୟ ସତ୍ତ୍ୱେ ସେ ଏହାକୁ ବିକ୍ରି କରି ନ ଥିଲେ। ବାବୁ କହିଛନ୍ତି, ଏହି ମେଣ୍ଢାର ପ୍ରକୃତ ନାମ ହେଉଛି ସରଜା। ଲୋକମାନେ ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ତୁଳନା କରିବା ଆରମ୍ଭ କଲେ, ତେଣୁ ଏହାର ନାମ ହେଲା ‘ମୋଦି’। ଲୋକମାନେ କହିଛନ୍ତି ଯେ ମୋଦି ଯେପରି ସମସ୍ତ ନିର୍ବାଚନରେ ଜିତି ପ୍ରଧାନମନ୍ତ୍ରୀ ହୋଇଥିଲେ, ସେହିଭଳି ସରଜାଙ୍କୁ ଯେକୌଣସି ମେଳା କିମ୍ବା ବଜାରକୁ ନିଆଯାଇଥିଲା, ସେଠାରେ ସେ ନିଜ କରିସ୍ମା ଦେଖାଇଥିଲା। ବାବୁ କହିଛନ୍ତି ଯେ, ସରଜା ତାଙ୍କ ପରିବାର ପାଇଁ ‘ଶୁଭ’, ତେଣୁ ସେ ଏହାକୁ ବିକ୍ରୟ କରିବାକୁ ଚାହୁଁନାହାନ୍ତି। ସେ କହିଛନ୍ତି, ମୁଁ ଏହାକୁ ୭୦ ଲକ୍ଷ ଟଙ୍କାରେ ବିକିଲି ନାହିଁ, ସେ ଜିଦ୍ କରିବାରୁ ଏହାର ମୂଲ୍ୟ ୧.୫୦ କୋଟିକୁ ଆଣିଲି। କାରଣ ମୁଁ ଜାଣେ, ମେଣ୍ଢା ପାଇଁ ଏତେ ପରିମାଣର ଟଙ୍କା କେହି ଦେବେ ନାହିଁ। ସେ ଦାବି କରିଛନ୍ତି, ଆମେ ଦୁଇ-ତିନି ପିଢି ହେବ ପଶୁପାଳନ ବ୍ୟବସାୟରେ ରହିଛୁ, କିନ୍ତୁ ଗତ ଦୁଇ ବର୍ଷ ଧରି ସରଜା କାରଣରୁ ଆମେ ଉପକୃତ ହୋଇଛୁ। ଏହି ପ୍ରଜାତିର ମେଣ୍ଢା ୫ ଲକ୍ଷରୁ ୧୦ ଲକ୍ଷ ଟଙ୍କା ମଧ୍ୟରେ ବିକ୍ରି ହୁଏ।
