ଯାଜପୁର ଟାଉନ, ୧୬।୧୦ (ଡି.ଏନ୍.ଏ.): ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଏବଂ ଯାଜପୁର ଜିଲାପାଳଙ୍କ ନିଷ୍ପତ୍ତି ଆଧାରରେ ମା’ ବିରଜାଙ୍କ ଶାରଦୀୟ ଦୁର୍ଗାପୂଜା ଓ ରଥଯାତ୍ରା ରଥଯାତ୍ରା ଅନୁଷ୍ଠିତ ହେବ। ରଥଟଣା ଓ ପୂଜା ସହ ଜଡିତ ସମସ୍ତ ସେବାୟତ ଓ କର୍ମଚାରୀଙ୍କ କୋଭିଡ ପରୀକ୍ଷା କରାଯିବ। ଅକ୍ଟୋବର ୧୬, ୧୯ ଓ ୨୨ ତାରିଖରେ ତିନି ପର୍ଯ୍ୟାୟରେ ବିରଜା କଲ୍ୟାଣ ମଣ୍ଡପଠାରେ ଏହି ପରୀକ୍ଷା କରାଯିବ। ଯେଉଁମାନେ ରଥଯାତ୍ରାରେ ଦାୟିତ୍ୱ ନିର୍ବାହ କରିବେ ସେମାନେ ନିଜସ୍ବ ଗୃହରେ ସଙ୍ଗରୋଧରେ ରହିବା ସହ କାହା ସାଙ୍ଗରେ ନ ମିଶିବାକୁ ବିରଜା ମନ୍ଦିର ଟ୍ରଷ୍ଟ ବୋର୍ଡ ମ୍ୟାନେଜିଂ ଟ୍ରଷ୍ଟି ନାରାୟଣ ଚନ୍ଦ୍ର ଧଳ ସୂଚନା ଦେଇଛନ୍ତି। ଅନ୍ୟପକ୍ଷେ ମା’ବିରଜାଙ୍କ ମନ୍ଦିର ଚତୁଃପାର୍ଶ୍ୱରେ ୧୭ ରୁ ୨୪ ତାରିଖ ପର୍ଯ୍ୟନ୍ତ ରଥଯାତ୍ରା ପାଇଁ ୧୪୪ଧାରା ବଳବତ୍ତର ରହିବ। ତେବେ ମନ୍ଦିରର ପଶ୍ଚିମପାର୍ଶ୍ୱ ଯାଜପୁର-ସିଂହପୁର ରାସ୍ତାରେ ଏହି ଦିନଗୁଡ଼ିକରେ ଅପରାହ୍ନ ସାଢେ ୩ଟାରୁ ସାଢେ ୬ଟା ପର୍ଯ୍ୟନ୍ତ ୧୪୪ ଧାରା ଲାଗିବ। ମେଡିସିନ ଦୋକାନ ଓ ପାଥୋଲାବ ଅନ୍ୟ ସମୟରେ ଖୋଲା ରହିବାକୁ ନିର୍ଦ୍ଦେଶ ଥିବା ବେଳେ ଅପରାହ୍ନ ସାଢେ ୩ଟାରୁ ସାଢେ ୬ଟା ପର୍ଯ୍ୟନ୍ତ ବନ୍ଦ ରହିବ। ଏହାବାଦ ଅଠରନଳାଠାରୁ ଜାଉଁଳିବନ୍ଧ ରାସ୍ତା, ବିରଜା ମନ୍ଦିରଠାରୁ ବିରଜା ହାଇସ୍କୁଲ ଛକ ରାସ୍ତାରେ ରଥଟଣା ପାଇଁ ଗାଡ଼ିମୋଟର ଚଳାଚଳ ବନ୍ଦ ରହିବ। ଲାଖବିନ୍ଧା ପର୍ବ ଓ ମା’ ବିରଜାଙ୍କ ବିଭାନ ଶୋଭାଯାତ୍ରା ପାଇଁ ୨୪ ତାରିଖ ରାତ୍ର ୧୧ ଟାରୁ ୨୫ ତାରିଖ ସକାଳ ୭ଟା ପର୍ଯ୍ୟନ୍ତ ଲାଖବିନ୍ଧା ପଡିଆ, ବିରଜା ମନ୍ଦିରଠାରୁ ଲାଖବିନ୍ଧା ପଡିଆ ଏବଂ ବିରଜା ମନ୍ଦିର ଭାୟା-ନହରପଦା ଦେଇ ଫେରିବା ରାସ୍ତାରେ ୧୪୪ ଧାରା ଜାରି କରାଯିବା ସହ ସାଧାରଣ ଲୋକଙ୍କ ପାଇଁ ନିଷିଦ୍ଧ ଘୋଷଣା କରାଯାଇଛି। ଏହା ଉଲ୍ଲଂଘନ କ୍ଷେତ୍ରରେ ଧାରା ୧୮୮ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ନାରାୟଣ ଚନ୍ଦ୍ର ଧଳ କହିଛନ୍ତି।
