ନାଉଗାଁ ,୧୭ା୧୦(ସ୍ବ.ପ୍ର.): ପୁଷ୍ଟିକର ଖାଦ୍ୟ ସହ ପିଲାଙ୍କୁ ବିଦ୍ୟାଳୟାଭିମୁଖୀ କରିବା ପାଇଁ ସରକାରଙ୍କ ତରଫରୁ ପ୍ରତି ବିଦ୍ୟାଳୟରେ ମଧ୍ୟାହ୍ନଭୋଜନ ବ୍ୟବସ୍ଥା କରାଯାଇଛି। ଏହି ପରିପ୍ରେକ୍ଷୀରେ ନାଉଗଁା ବ୍ଲକର ୭୮ ବିଦ୍ୟାଳୟରେ ହାରାହାରି ୭ ହଜାରରୁ ଊର୍ଦ୍ଧ୍ୱ ପିଲାଙ୍କ ପାଇଁ ପ୍ରତ୍ୟହ ମଧ୍ୟାହ୍ନ ଭୋଜନ ରୋଷେଇ କରାଯାଉଛି। ରୋଷେଇ ସମୟରେ ରୋଷେଇଶାଳ ପରିଷ୍କାର ରଖିବା, ଖାଇବା ସ୍ଥାନ ପରିଷ୍କାର ସହ ବିଶୁଦ୍ଧ ପାନୀୟ ଜଳର ବ୍ୟବସ୍ଥା କରାଯାଇଛି। ଏହି ମଧ୍ୟାହ୍ନଭୋଜନ ପ୍ରସ୍ତୁତି ପାଇଁ ପାଚିକା ଓ ସହାୟିକାଙ୍କୁ ମଧ୍ୟ ନିଯୁକ୍ତି ଦିଆଯାଇଛି।। ପୂର୍ବରୁ ଏହି ଭୋଜନ ପ୍ରସ୍ତୁତି ପାଇଁ ବିଦ୍ୟାଳୟଗୁଡ଼ିକରେ କାଠଚୁଲାର ବ୍ୟବହାର କରାଯାଉଥିଲା। ଏନେଇ ସବୁବେଳେ କାଠର ଆବଶ୍ୟକ ହେଉଥିବାବେଳେ କାଠଚୁଲାରୁ ଅତ୍ୟଧିକ ଧୂଆଁ ନିର୍ଗତ ହେଉଥିଲା। ଫଳରେ ବିଦ୍ୟାଳୟ ପରିସର ଧୂଆଁମୟ ହୋଇଯାଉଥିଲା। ବିଦ୍ୟାଳୟ ପରିବେଶକୁ ସ୍ବଚ୍ଛ ଓ ନିର୍ମଳ ରଖିବା ପାଇଁ ଏବଂ ବାୟୁ ପ୍ରଦୂଷଣ ରୋକିବା ପାଇଁ ସରକାରଙ୍କ ତରଫରୁ ପ୍ରତ୍ୟେକ ବିଦ୍ୟାଳୟରେ ରୋଷେଇ ପାଇଁ ଗ୍ୟାସ ବ୍ୟବହାର କରିବାକୁ ନିର୍ଦ୍ଦେଶାନାମା ଜାରି ହୋଇଛି। ଏହି ନିର୍ଦ୍ଦେଶ ବଳରେ ପ୍ରତ୍ୟେକ ବିଦ୍ୟାଳୟକୁ ଗ୍ୟାସ ଚୁଲା ସହ ୨ଟି ଲେଖାଏ ଗ୍ୟାସ ସିଲିଣ୍ଡର ପ୍ରଦାନ କରାଯାଇଛି, ମାତ୍ର ବ୍ଲକର ଅନେକ ବିଦ୍ୟାଳୟରେ ଏବେବି ଗ୍ୟାସ ପରିବର୍ତ୍ତେ କାଠଚୁଲାରେ ରୋଷେଇ ହେଉଛି। ଏହାର ଜ୍ୱଳନ୍ତ ଉଦାହରଣ ଶିଖର ପଞ୍ଚାୟତ ନଳାଙ୍ଗ ପ୍ରାଥମିକ ବିଦ୍ୟାଳୟ ଓ ବଛାଳୋ ପଞ୍ଚାୟତ ଅଲଣା-୨ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି। ଯଦି ଏଠାରେ କାଠଚୁଲାରେ ରୋଷେଇ କରାଯାଉଛି, ତେବେ ଗ୍ୟାସଚୁଲା କି କାର୍ଯ୍ୟରେ ଲାଗୁଛି ସେନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଦ୍ୟାଳୟଗୁଡିକରେ ମଧ୍ୟାହ୍ନ ଭୋଜନରୋଷେଇ ତଦାରଖ କରିବା ପାଇଁ ବିଭିନ୍ନ କ୍ଲଷ୍ଟରରେ ସିଆରସିସିମାନେ ରହିଛନ୍ତି। ମାତ୍ର ସେମାନେ ଠିକ ଭାବେ ଏହାର ଯାଞ୍ଚ କରୁ ନ ଥିବା ନେଇ ସ୍ଥାନୀୟ ଲୋକେ କହିଛନ୍ତି । ଏ ସମ୍ପର୍କରେ ବ୍ଲକ ଅତିରିକ୍ତ ଶିକ୍ଷାଧିକାରୀ ଅକ୍ଷୟ ବେହେରା କହିଛନ୍ତି, ସେ ସିଆରସିସିଙ୍କ ସହ କଥା ହୋଇ ପରବର୍ତ୍ତୀ ପଦକ୍ଷେପ ନେବେ।
