ଆରଡ଼ି, ୧୦।୧୨ (ଡି.ଏନ.ଏ.): ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ସୁନ୍ଦରପୁର, ଓଳଗ, ଆରଡ଼ି ଓ ନାନ୍ଦପୁର ପଞ୍ଚାୟତରେ ଗୋରୁମାନେ ‘ଲମ୍ପି ରୋଗରେ ଆକ୍ରାନ୍ତ ହୋଇଛନ୍ତି। ୪ ପଞ୍ଚାୟତରେ ୫୦ରୁ ଅଧିକ ଗୋରୁ ଏହି ରୋଗରେ ସଂକ୍ରମିତ ହୋଇଥିବା ବେଳେ ସୁନ୍ଦରପୁର ପ୍ରାଣୀଧନ ଚିକିତ୍ସା କେନ୍ଦ୍ରରେ ଚିକିତ୍ସା ପାଇଁ କୌଣସି ବ୍ୟବସ୍ଥା ନ ଥିବାରୁ ଲୋକେ ଅର୍ଥ ଖର୍ଚ୍ଚ କରି ଘରୋଇ ଚିକିତ୍ସା କରାଉଛନ୍ତି। କୌଣସି ପ୍ରତିଷେଧକ ବ୍ୟବସ୍ଥା ନ ଥିବାରୁ ସଂକ୍ରମଣ ହାର ବଢ଼ି ଚାଲିଛି। ଦୁହଁାଳିଆ ଗାଈ ଏହି ରୋଗର ଶିକାର ହେବାରୁ ବାଛୁରୀ ମଧ୍ୟ ସଂକ୍ରମିତ ହେଉଛନ୍ତି। ଏଥିରେ ଆକ୍ରାନ୍ତ ଗୋରୁ ପ୍ରାୟ ୧୦ଦିନ ପର୍ଯ୍ୟନ୍ତ କଷ୍ଟ ଭୋଗୁଛନ୍ତି। ଆକ୍ରାନ୍ତ ଗୋରୁଙ୍କ ଗୋଡ଼ ଫୁଲିଯିବା, ଦେହର ତାପମାତ୍ରା ବୃଦ୍ଧି ପାଇବା, ଦେହସାରା ଚକଡ଼ା ଚକଡ଼ା ପରି ଘା’ ସୃଷ୍ଟି ହେବା, ସେଥିରୁ ପୂଜ ବାହାରିବା ଆଦି ଲକ୍ଷଣ ଦେଖା ଦେଉଛି। ଗୋରୁମାନେ ନିସ୍ତେଜ ରହିବା ସହ ଖାଦ୍ୟ ଖାଇବା ମଧ୍ୟ କମାଇ ଦେଉଛନ୍ତି। ଚିକିତ୍ସା ପ୍ରଣାଳୀ ଏଯାଏ ବାହାରି ନ ଥିବା ପ୍ରାଣୀଧନ ଚିକିତ୍ସାଧିକାରୀ କହୁଛନ୍ତି।
ଗର୍ଭିଣୀ ଗାଈଙ୍କୁ ଇଞ୍ଜେକ୍ସନ ଦିଆ ନ ଯିବାରୁ ମରିଯିବା ଆଶଙ୍କା ଉପୁଜିଛି। ଏଭଳି ସ୍ଥିତିରେ ଗୋରୁମାନଙ୍କୁ ଟିକାକରଣ କରାଇବାକୁ ୪ ପଞ୍ଚାୟତର ଲୋକେ ଦାବି କରିଛନ୍ତି। ଏଥିସହ ଲମ୍ପି ରୋଗରେ ଆକ୍ରାନ୍ତ ଗୋରୁଙ୍କ ଚିକିତ୍ସା ମାଗଣାରେ କରାଯିବାକୁ ଦାବି କରିଛନ୍ତି ଗୋପାଳକମାନେ। ଏ ସମ୍ପର୍କରେ ଜିଲା ପ୍ରାଣୀଧନ ଚିକିତ୍ସାଧିକାରୀ ଶୁଭେନ୍ଦୁ ମିଶ୍ରଙ୍କୁ ପଚାରିବାରୁ ଯଥାଶୀଘ୍ର ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇ ସମସ୍ୟାର ସମାଧାନ କରାଯିବ ବୋଲି କହିଛନ୍ତି।
