ଓ୍ବାଶିଂଟନ୍, ୧୪ା୧: ପରାଜୟ ପରେ ବି କ୍ଷମତାମୋହ ଯୋଗୁ ଦଙ୍ଗା ଉସୁକାଇବା ରିପବ୍ଲିକାନ୍ ନେତା ଡୋନାଲ୍ଡ ଟ୍ରମ୍ପ୍ଙ୍କୁ ମହଙ୍ଗା ପଡ଼ିଛି। ତାଙ୍କ ବିରୋଧରେ ଆଗତ ମହାଭିଯୋଗ ପ୍ରସ୍ତାବକୁ ନେଇ ବୁଧବାର ନିମ୍ନ ସଦନ ଅର୍ଥାତ ପ୍ରତିନିଧି ସଭାରେ ମତଦାନ ହୋଇଛି। ମହାଭିଯୋଗ ପ୍ରମାଣିତ ହେବା ପାଇଁ ୨୧୮ ଭୋଟ ଜରୁରୀ ଥିବାବେଳେ ପ୍ରସ୍ତାବ ସପକ୍ଷରେ ୨୨୦ ଭୋଟ ପଡିଛି। ଏଥିରୁ ୫ ଖଣ୍ଡ ଭୋଟ ହେଉଛି ରିପବ୍ଲିକାନ ସଦସ୍ୟଙ୍କର। ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସରେ ପ୍ରସ୍ତାବ ଗୃହୀତ ହେବା ପରେ ଏବେ ଏହାକୁ ସିନେଟକୁ ଶୁଣାଣି ପାଇଁ ପଠାଯିବ। ଉଚ୍ଚ ସଦନ ସିନେଟ୍ରେ ସଦସ୍ୟମାନେ ଜୁରି ଭଳି କାର୍ଯ୍ୟ କରିବେ ଏବଂ ଟ୍ରମ୍ପ୍ଙ୍କୁ ଦୋଷୀ ସାବ୍ୟସ୍ତ ଅଥବା ଦୋଷମୁକ୍ତ ପାଇଁ ମତଦାନ କରିବେ। ଟ୍ରମ୍ପ୍ ଦୋଷୀ ହେଲେ ତାଙ୍କୁ ରାଷ୍ଟ୍ରପତି ପଦରୁ ହଟାଯିବ। ତାଙ୍କ ସ୍ଥାନରେ ଉପରାଷ୍ଟ୍ରପତି ମାଇକ୍ ପେନ୍ସଙ୍କୁ ବର୍ତ୍ତମାନ ପାଇଁ (ଜାନୁୟାରୀ ୨୦ ପର୍ଯ୍ୟନ୍ତ) ଅବସ୍ଥାପିତ କରାଯିବ। ଏହା ସହ ଟ୍ରମ୍ପ୍ଙ୍କୁ ରାଜନୈତିକ ଅଯୋଗ୍ୟ ହେବାକୁ ପଡ଼ିବ। ଫଳରେ ୨୦୨୪ରେ ପୁଣି ଥରେ ରାଷ୍ଟ୍ରପତି ନିର୍ବାଚନ ଲଢ଼ିବା ପାଇଁ ମହତ୍ତ୍ୱାକାଂକ୍ଷୀ ନେତା ଟ୍ରମ୍ପ୍ଙ୍କ ସ୍ବପ୍ନ ଧୂଳିସାତ୍ ହୋଇଯିବ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କାର୍ଯ୍ୟକାଳ ଶେଷ ହେବାକୁ ଆଉ ୬ ଦିନ ବାକି ଥିବାବେଳେ ତାଙ୍କୁ ପଦରୁ ହଟାଇବା ପାଇଁ ସିନେଟ୍ର ନିମ୍ନ ସଦନରେ ମହାଭିଯୋଗ ପ୍ରସ୍ତାବ ଗୃହୀତ ହୋଇଛି। ବୁଧବାର ଏହା ଉପରେ ଭୋଟିଂ ପୂର୍ବରୁ ବିତର୍କ କରଯାଇଥିଲା। କ୍ୟାପିଟୋଲ ହିଲ୍ ଦଙ୍ଗା ଘଟଣାରେ ବିଦାୟୀ ରାଷ୍ଟ୍ରପତି ଟ୍ରମ୍ପଙ୍କୁ ଦାୟୀ କରାଯାଇ ତାଙ୍କୁ ପଦରୁ ହଟାଯିବାକୁ ଡେମୋକ୍ରାଟିକ ଦଳ ଦାବି କରିଥିଲା। ଜଣେ ନିର୍ବାଚିତ ରାଷ୍ଟ୍ରପତି
ଦାୟିତ୍ୱ ତୁଲାଇବାରେ ସକ୍ଷମ ନ ଥିବାରୁ ଉପରାଷ୍ଟ୍ରପତି ମାଇକ୍ ପେନ୍ସ କ୍ଷମତାର ଉପଯୋଗ କରି ସଂଶୋଧନ ୨୫ ମାଧ୍ୟମରେ ଟ୍ରମ୍ପଙ୍କୁ ବହିଷ୍କାର କରନ୍ତୁ ବୋଲି ପେନ୍ସଙ୍କୁ ବାଚସ୍ପତି ନାନ୍ସି ପେଲୋସି ପତ୍ର ଲେଖିଥିଲେ। ହେଲେ କ୍ୟାବିନେଟ ସଦସ୍ୟମାନେ ଏହି ପଦକ୍ଷେପ ନେବାକୁ ରାଜି ନ ଥିବା କହି ପେନ୍ସ ସଂଶୋଧନ ୨୫ ଲାଗୁ କରିବାକୁ ମନା କରିଦେଇଥିଲେ। ଏ ନେଇ ମଙ୍ଗଳବାର ପେନ୍ସ ଚିଠି ଲେଖି ଉତ୍ତର ରଖିଥିଲେ। କାର୍ଯ୍ୟକାଳ ଶେଷ ହେବା ପୂର୍ବରୁ ରାଷ୍ଟ୍ରପତିଙ୍କୁ ବହିଷ୍କାର କରିବା ଦେଶ ପାଇଁ ଲଜ୍ଜାଜନକ ବିଷୟ। ଏହା ଆଦୌ ରାଷ୍ଟ୍ର ସପକ୍ଷରେ ନୁହେଁ ବୋଲି ପେନ୍ସ କହିଥିଲେ। ଫଳରେ ଟ୍ରମ୍ପଙ୍କ ବିରୋଧରେ ଆମେରିକା ସଂସଦରେ ମହାଭିଯୋଗ ଉପରେ ବିତର୍କ ଆରମ୍ଭ ହୋଇଥିଲା। ଟ୍ରମ୍ପଙ୍କ ରିପବ୍ଲିକାନ ଦଳର କେତେଜଣ ସଦସ୍ୟ ମଧ୍ୟ ମହାଭିଯୋଗ ସପକ୍ଷରେ ଭୋଟ ଦେବେ ବୋଲି ପୂର୍ବରୁ ଘୋଷଣା କରିଥିଲେ।
ଟ୍ରମ୍ପ୍ ଆମେରିକାର ଏକ ମାତ୍ର ରାଷ୍ଟ୍ରପତି ଯାହାଙ୍କ ବିରୋଧରେ ଦୁଇଥର ମହାଭିଯୋଗ ଆଗତ ହୋଇଛି। ୨୦୨୦ ରାଷ୍ଟ୍ରପତି ନିର୍ବାଚନ ପ୍ରକ୍ରିୟାବେଳେ ଡେମୋକ୍ରାଟ ପ୍ରାର୍ଥୀ ଜୋ ବାଇଡେନ୍ଙ୍କ ଛବିକୁ ମଳିନ କରିବାକୁ ଟ୍ରମ୍ପ୍ ଉଦ୍ୟମ କରିଥିଲେ। ଅଭିଯୋଗ ଆସିଥିଲା ଯେ, ଟ୍ରମ୍ପ ଏଥିପାଇଁ ୟୁକ୍ରେନର ସହାୟତା ନେଇଥିଲେ। ଜୋ ବାଇଡେନ୍ ଓ ତାଙ୍କ ପୁଅ ହଣ୍ଟର ବାଇଡେନ୍ ୟୁକ୍ରେନ ସହ ବେଆଇନ ଭାବେ ବ୍ୟାପକ ଅର୍ଥ କାରବାର କରିଥିବା କହି ଟ୍ରମ୍ପ୍ ନିଜ ଛବିକୁ ସୁଦୃଢ଼ କରିବାକୁ ଚାହୁଁଥିଲେ। ଏ ନେଇ ଟ୍ରମ୍ପ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କାଏଙ୍କ ସହ କଥା ହେବା ଘଟଣା ଗୋଇନ୍ଦା ବିଭାଗ ଜାଣିବା ପରେ ଏହା ସାମ୍ନାକୁ ଆସିଥିଲା। ଏପରିକି ଟ୍ରମ୍ପ ଏଥିପାଇଁ ୟୁକ୍ରେନ ରାଷ୍ଟ୍ରପତିଙ୍କ ଉପରେ ଚାପ ପକାଉଥିଲେ ବୋଲି କୁହାଯାଇଥିଲା। ଏହା ନ କଲେ ୟୁକ୍ରେନକୁ ଦିଆଯାଉଥିବା ସାମରିକ ସହାୟତା ରୋକିଦେବାକୁ ଟ୍ରମ୍ପ୍ ଧମକ ମଧ୍ୟ ଦେଇଥିଲେ। ଏହି ଘଟଣାକୁ ନେଇ ତାଙ୍କ ବିରୋଧରେ ମହାଭିଯୋଗ ଚାଲିଥିଲେ ହେଁ ତାହା ସାବ୍ୟସ୍ତ ହୋଇପାରି ନ ଥିଲା। ସୂଚନାଯୋଗ୍ୟ, ଗତ ୬ ତାରିଖରେ କ୍ୟାପିଟୋଲ ବିଲ୍ଡିଂରେ ଟ୍ରମ୍ପଙ୍କ ସମର୍ଥକମାନେ ଧସେଇ ପଶି ହିଂସାକାଣ୍ଡ ଘଟାଇଥିଲେ। ଏଥିରେ ୫ ଜଣଙ୍କ ମୃତ୍ୟୁ ଘଟିଥିଲା।
