ବିଷମକଟକ,୨୯ା୮(ଡି.ଏନ୍.ଏ.): ରାୟଗଡ଼ା ଜିଲା ବିଷମକଟକ ବ୍ଲକ ସଦର ସ୍ଥିତ କଳିଙ୍ଗ ମଡେଲ ରେସିଡେନ୍ସିଆଲ ସ୍କୁଲ ପରିସରରେ ସିସି(ସିମେଣ୍ଟ କଂକ୍ରିଟ)ରୋଡ୍ କାମ ଅତି ନିମ୍ନମାନର କରାଯାଉଥିବା ଅଭିଯୋଗ ହୋଇଛି। ପୋଲିସ ହାଉସିଂ ବୋର୍ଡ ପକ୍ଷରୁ ୨୦୨୨ ରେ ୧ କୋଟିରୁ ଊର୍ଦ୍ଧ୍ୱ ଟଙ୍କା ଅନୁଦାନରେ ସିସି ରୋଡ୍, ସୁରକ୍ଷା କାନ୍ଥ ଓ ପାଚେରୀ ପାଇଁ ଟେଣ୍ଡର କରାଯାଇଥିଲା। ଏକ ଘରେଇ ଠିକା ସଂସ୍ଥାକୁ କାର୍ଯ୍ୟାଦେଶ ପ୍ରଦାନ କରାଯାଇଥିଲା। ହେଲେ ରାସ୍ତାକାମ ସମୟରେ ବିଭାଗ ପକ୍ଷରୁ କେହିି ଯନ୍ତ୍ରୀ କିମ୍ବା କର୍ମଚାରୀ ଉପସ୍ଥିତ ନ ରହିବାର ସୁଯୋଗ ନେଇ ଘରୋଇ ଠିକାସଂସ୍ଥା ନିମ୍ନମାନର କାମ କରିଥିବା ଅଭିଯୋଗ ହୋଇଛି।
ନିୟମ ଅନୁଯାୟୀ, ରାସ୍ତାକାମ ବେଳେ ପ୍ରଥମେ ମାଟିତଳେ ୨ ଇଞ୍ଚ ବାଲି ବିଛାଇବା ଆବଶ୍ୟକ। ଏହାପରେ ପାଣି ପକାଇବା ପରେ ୪ ଇଞ୍ଚର ମେଟାଲ କଂକ୍ରିଟ ଦେବା ସହ କାମକୁ ମଜବୁତ କରିବା ପାଇଁ ଅତ୍ୟାଧୁନିକ ଭାଇବ୍ରେଟର ମେଶିନ ବ୍ୟବହାର କରିବା ନିୟମ ରହିଛି। ପରେ ୪ ଇଞ୍ଚର ଚିପ୍ସ କଂକ୍ରିଟ ମଜବୁତ କରିବା ପାଇଁ ଏଠରେ ମଧ୍ୟ ଭାଇବ୍ରେଟର ମେଶିନ ବ୍ୟବହାର ହେବା କଥା। ହେଲେ ଏହି ଏଠାରେ ଚାଲିଥିବା ସିସିରୋଡ୍ କାମରେ ସେଭଳି କରାଯାଉନାହିଁ। ଭାଇବ୍ରେଟର ମେଶିନ ବ୍ୟବହାର କରାଯାଉନି। ସେହିପରି ମାଟିତଳେ ବାଲି ନ ବିଛାଇବା, ୪ ଇଞ୍ଚ ମେଟାଲ ଓ ଚିପ୍ସ ବଦଳରେ ୩ ଇଞ୍ଚ ବ୍ୟବହାର କରିଥିବା ଜଣାପଡ଼ିଛି। ଏହି ସ୍କୁଲର ୩ ଶହ ମିଟର ସିସି ରୋଡ୍ର କାମ ଆରମ୍ଭ ହେବା ସମୟରୁ ପୋଲିସ ହାଉସିଂ ବୋର୍ଡ ପକ୍ଷରୁ କୌଣସି ଯନ୍ତ୍ରୀ କିମ୍ବା ଅଧିକାରୀ କାର୍ଯ୍ୟ ସମୟରେ ଉପସ୍ଥିତ ନ ଥିବାରୁ ଠିକାସଂସ୍ଥା ବେନିୟମରେ କାମ କରୁଥିବା ଅଭିଯୋଗ ହେଉଛି। ଏ ନେଇ ଅଭିଯୋଗ ହେବା ପରେ କନିଷ୍ଠ ଯନ୍ତ୍ରୀ କାର୍ଯ୍ୟସ୍ଥଳରେ ପହଞ୍ଚି ନିମ୍ନମାନର କାମ ହେଉଥିବା ଦେଖି ନିର୍ମାଣ କାମ ବନ୍ଦ ରଖିବାକୁ ନିର୍ଦ୍ଦେଶ ଦେଇଥିଲେ। ଏ ନେଇ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିଲେ। ତେବେ ଏଭଳି କାର୍ଯ୍ୟକୁ ବିଷମକଟକ ଅଞ୍ଚଳବାସୀ ନାପସନ୍ଦ କରିଛନ୍ତି। ରାସ୍ତାକାମର ତଦନ୍ତ ପାଇଁ ସେ ଦାବି କରିଛନ୍ତି। ସ୍ଥାନୀୟ ଲୋକଙ୍କ ଅଭିଯୋଗକୁ ନେଇ ଦାୟିତ୍ୱରେ ଥିବା ପୋଲିସ ହାଉସିଂ ବୋର୍ଡର ଜଏଣ୍ଟ ମ୍ୟାନେଜର ସୁବାସ ପଣ୍ଡାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, କାର୍ଯ୍ୟସ୍ଥଳକୁ ଯାଇ ତଦନ୍ତ କରିବା ପରେ ନିମ୍ନମାନର କାମ ହୋଇଥିବା ଜଣାପଡ଼ିଥିଲା ବୋଲି କହିଛନ୍ତି। ଏଥିସହ ଠିକାଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ତେବେ ଅଧାକାମ ସରିଥିବାବେଳେ ନିମ୍ନମାନର କାମ ନେଇ କେହି ଜାଣି ନ ପାରିବା ପ୍ରଶ୍ନବାଚୀ ସୃଷ୍ଟି କରିଛି। ପୋଲିସ ହାଇସିଂ ବୋର୍ଡ ପକ୍ଷରୁ କରାଯାଉଥିବା କାମ ସବୁବେଳେ ଉନ୍ନତମାନର ହେଉଥିବା ନଜିର ରହିଛି। ହେଲେ ଏଠାରେ ନିମ୍ନମାନର କାମ ଜଣାପଡ଼ିବା ପରେ ପୋଲିସ ହାଉସିଂ ବୋର୍ଡର କାର୍ଯ୍ୟକୁ ନେଇ ମଧ୍ୟ ପ୍ରଶ୍ନ ଉଠିଛି।
