ମୁନିଗୁଡା,୧୬।୨(ନନ୍ଦ କିଶୋର ପଟ୍ଟନାୟକ): ରାୟଗଡା ଜିଲା ମୁନିଗୁଡା ବ୍ଲକ ଅନ୍ତର୍ଗତ ଅମ୍ବାଦଳାର ଅମ୍ଳାଭଟା ଅଞ୍ଚଳରେ ଜାଗର ଦିନ ଏକ ଅନନ୍ୟ ଦୃଶ୍ୟ ଦେଖିବାକୁ ମିଳିଛି । ଜଣେ ପ୍ରେମିକ ନିଜ ପ୍ରେମିକାକୁ ପାଇବା ପାଇଁ ୪ କି.ମି ରାସ୍ତାରେ ଗଡ଼ିଗଡ଼ି କପିଳେଶ୍ବର ମନ୍ଦିରକୁ ଯାଇଥିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । ଯୁବକ ଜଣକ ହେଲେ ମୁନିଗୁଡା ବ୍ଲକ ଇଚ୍ଛାପୁର ପଞ୍ଚାୟତ ଅନ୍ତର୍ଗତ ଡାଙ୍ଗବାଡ଼ି ଗ୍ରାମର ଗୁରୁଦାସ ଡଙ୍ଗରି ଓ ମରିଚ ଡଙ୍ଗରିଙ୍କ ପୁଅ ଲୋକନାଥ ଡଙ୍ଗରି ।
ସୂଚନା ଅନୁସାରେ, ସେ ଜଣେ ଯୁବତୀକୁ ପ୍ରେମ କରୁଛନ୍ତି । ପ୍ରେମକୁ ସାକାର ରୂପ ଦେବାକୁ ସେ ଏଭଳି କରିଥିବା ଜଣାପଡିଛି । ଲୋକନାଥ ଜଣେ ଶିକ୍ଷିତ ଯୁବକ ସହ ଚେନ୍ନାଇର ଏକ କମ୍ପାନୀରେ ଅପରେଟର ଭାବେ କାର୍ଯ୍ୟ କରନ୍ତି । ସେ ନିଜ ପ୍ରେମିକାକୁ ପାଇବା ପାଇଁ ଡାଙ୍ଗବାଡ଼ି ଠାରୁ ଅମ୍ନାଭଟା ଶିବ ମନ୍ଦିରକୁ ପ୍ରାୟ ୪ କିଲୋମିଟର ରାସ୍ତାରେ ଗଡ଼ିଗଡ଼ି ଆସି ମହାଦେବଙ୍କ ଦର୍ଶନ କରି ମାନସିକ ପୂରଣ କରିଥିଲେ ।
ଭୋର ୩ଟାରୁ ସେ ରାସ୍ତାରେ ଗଡିବା ଆରମ୍ଭ କରିଥିଲେ। ଏହି ପ୍ରକ୍ରିୟା ସମାପ୍ତ ପାଇଁ ତାଙ୍କୁ ୮ ଘଣ୍ଟା ସମୟ ଲାଗି ଯାଇଥିଲା। ପୁଅର ଶାଶ୍ବତ ପ୍ରେମକୁ ସାର୍ଥକ କରିବା ପାଇଁ ଉଭୟ ପିତାମାତା ଓ ସମ୍ପର୍କୀୟ ରାସ୍ତାରେ ଗଡ଼ିଗଡ଼ି ଯାଉଥିବା ସମୟରେ ବସ୍ତ୍ର ପକାଇ ତାଙ୍କୁ ସହାୟତା କରିଥିବା ଦେଖାଯାଇଥିଲା । ତେବେ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ଯୁବକଙ୍କ ପ୍ରେମକୁ ନେଇ ଚର୍ଚ୍ଚା ବଢ଼ିବାରେ ଲାଗିଛି ।
