ଦିଗପହଣ୍ଡି,୬।୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅଧିନ ଏକ ଗାଁର ଜଣେ ଯୁବତୀଙ୍କୁ ଭଲ ପାଇ ବିବାହ କରିବା ପରେ ପ୍ରତାରଣା କରାଯାଇଥିବା ଅଭିଯୋଗ ହୋଇଛି। ଅଭିଯୁକ୍ତ ସୀମା ନାୟକ(୨୮) ତାଙ୍କ ଗାଁର ଜଣେ ୩୩ ବର୍ଷୀୟା ଯୁବତୀଙ୍କ ସହ ଲଭରୁ ସେକ୍ସ ଓ ପରେ ତାଙ୍କୁ ବିବାହ କରିବା ପରେ ପ୍ରତାରଣା କରିଥିବା ନେଇ ପୀଡ଼ିତା ଦିଗପହଣ୍ଡି ଏତଲା ଦେଇଥିଲେ। ଆଇଆଇସି କିଶୋର କୁମାର ସାମଲ ମାମଲା ନଂ.୨୮୧/୨୬ ଭାରତୀୟ ନ୍ୟାୟ ସଂହିତା ର ଦଫା-୬୯/୨୯୬/୩୫୧(୨)/୩(୫) ଅନୁଯାୟୀ ଅଭିଯୁକ୍ତଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏସ.ଆଇ ସୋଫିଆ ମିଶ୍ର ସୋମବାର ଅଭିଯୁକ୍ତଙ୍କୁ ଗିରଫ କରିଥିଲେ। ବ୍ରହ୍ମପୁର ବଡ଼ ଡାକ୍ତରଖାନାରେ ଉଭୟଙ୍କ ଡାକ୍ତରୀ ମାଇନା କରାଯିବା ପରେ ଥାନାରେ ପୀଡ଼ିତାଙ୍କ ବୟାନ ରେକର୍ଡ କରାଯାଇଥିଲା। ରାତି ପ୍ରାୟ ୮ଟାରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବା ପରେ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଛି।
ଗତ ପ୍ରାୟ ଦେଢ଼ବର୍ଷ ପୂର୍ବେ ଯୁବତୀଙ୍କ ସହ ଅଭିଯୁକ୍ତଙ୍କ ପ୍ରେମ ସମ୍ପର୍କ ଗଢ଼ି ଉଠିଥିଲା। ଯୁବତୀଙ୍କ ଅନିଚ୍ଛା ସତ୍ତ୍ବେ ଅଭିଯୁକ୍ତ ତାଙ୍କୁ ନିୟମିତ ବ୍ୟବଧାନରେ ବିଭିନ୍ନ ସ୍ଥାନକୁ ଡାକି ନେଇ ବଳାତ୍କାର କରି ଆସୁଥିଲେ। ପରେ ଉଭୟେ ପରସ୍ପରଙ୍କୁ ଭଲ ପାଇ ବିବାହ କରିବାକୁ ନିଷ୍ପତ୍ତି ନେଇଥିଲେ। ଅଭିଯୁକ୍ତ ଜଣକ ଯୁବତୀଙ୍କୁ ସାଥିରେ ନେଇ ଗାଁରୁ ଫେରାର ହୋଇଯାଇଥିଲେ। ଉଭୟେ ତାମିଲନାଡୁର ସିତାପୁରୀରେ ପହଞ୍ଚିବା ସହ ସେଠାକାର ଏକ ମନ୍ଦିରରେ ବିବାହ କରି ସ୍ତ୍ରୀସ୍ବାମୀ ଭାବେ ରହୁଥିଲେ।
ଗତ ପ୍ରାୟ ୩ ମାସ ପୂର୍ବେ ଭୁବନେଶ୍ବରରେ ରହୁଥିବା ଯୁବତୀଙ୍କ ଭଉଣୀର ଭୀଷଣ ଦେହ ଖରାପ ହୋଇଥିଲା। ଭଉଣୀଙ୍କୁ ଦେଖିବା ପାଇଁ ଯୁବତୀଜଣକ ଭୁବନେଶ୍ୱର ଯିବାକୁ କହିବାରୁ ଅଭିଯୁକ୍ତ ସୀମା ରାଜି ହୋଇଥିଲେ। ଉଭୟେ ଭୁବନେଶ୍ବରରେ ପହଞ୍ଚିଥିଲେ। ସେଠାରେ କିଛିଦିନ ରହିବା ପରେ ସୀମା ତାଙ୍କ ପୈତୃକ ଗାଁକୁ ଯାଇ ବୁଲି ଆସିବାକୁ ତାଙ୍କ ସ୍ତ୍ରୀଙ୍କୁ କହିବା ପରେ ସେ ରାଜି ହୋଇଥିଲେ। ପରେ ସ୍ତ୍ରୀ ସ୍ବାମୀ ସୀମାଙ୍କୁ ଫୋନ କରିବାରୁ ସେ ଫୋନ ଉଠାଇ ନ ଥିଲେ। ଗତ ରବିବାର ସ୍ତ୍ରୀ ସ୍ବାମୀଙ୍କ ଘରେ ପହଞ୍ଚିବାରୁ ସେ ତାଙ୍କୁ ଗ୍ରହଣ କରିବାକୁ ରାଜି ହୋଇ ନ ଥିଲେ। ସ୍ତ୍ରୀ ସାମୀଙ୍କ ଘର ଭିତରକୁ ଜବରଦସ୍ତ ପଶିବାକୁ ଚେଷ୍ଟା କରିବାରୁ ସ୍ବାମୀ ଓ ତାଙ୍କ ଭଉଣୀ ତାଙ୍କୁ ଆପତ୍ତିଜନକ ଭାଷାରେ ଗାଳି କରି ମାଡ଼ ମାରିବା ସହ ସେଠାରୁ ତଡ଼ି ଦେଇଥିଲେ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଥିବା ତଦନ୍ତକାରୀ ଅଧିକାରୀ କହିଛନ୍ତି।
Dharitri – Odisha’s No.1 Odia Daily
