କାନ୍ବେରା,୧୩।୧୧: ବିବାହ ପରେ ଛାଡ଼ପତ୍ର। ପରବର୍ତ୍ତୀ ସମୟରେ ପ୍ରେମରେ ପଡ଼ି ପୁଣି ସମ୍ପର୍କ ସ୍ଥାପନ। ଆଉ ଶେଷରେ ପୂନର୍ବିବାହ। ସୋସିଆଲ ମିଡିଆରେ ଭାଇରାଲ ହେବାରେ ଲାଗିଥିବା ଏହି ଲଭ୍ଷ୍ଟୋରି ଅଷ୍ଟ୍ରେଲିଆର ଏକ ଯୋଡ଼ିଙ୍କ କ୍ଷେତ୍ରରେ ଦେଖିବାକୁ ମିଳିଛି। କୁର୍ଟିସ୍ ଏବଂ ଟିମ୍ କୁର୍ଟିସ୍ ୨୦୦୪ରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ୧୧ ବର୍ଷର ଦାମ୍ପତ୍ୟ ଜୀବନରେ ମନୋମାଳିନ୍ୟ ଯୋଗୁ ୨୦୧୫ରେ ଦୁହେଁ ପରସ୍ପରକୁ ଛାଡ଼ପତ୍ର ଦେଇଥିଲେ। ଡାନିଏଲ୍ ୨୦୧୯ରେ ଅନ୍ୟତ୍ର ବିବାହ କରିଥିଲେ। ଦୁଇବର୍ଷ ଯାଏ ଦୁହେଁ ପରସ୍ପର ସହ କଥା ହୋଇ ନ ଥିଲେ। ସିଙ୍ଗଲ୍ ମଦର ଡାନିଏଲ୍ ୨୦୧୭ରେ ପୂର୍ବତନ ସ୍ବାମୀ ଟିମ୍ଙ୍କ ନିକଟକୁ ଏକ ଇ-ମେଲ୍ ପଠାଇଥିଲେ। ଉଭୟଙ୍କ ଔରସରୁ ଜନ୍ମିତ ଦୁଇ ପିଲାଙ୍କ ଯତ୍ନ ନେବାରେ ବର୍ତ୍ତମାନର ସ୍ବାମୀ କେତେ ପାରଙ୍ଗମ ସେ ନେଇ ଡାନିଏଲ୍ ମେଲ୍ରେ ଉଲ୍ଲେଖ କରିଥିଲେ। ଏଇଠୁ ପୁଣି ଆରମ୍ଭ ହୋଇଥିଲା ଇ-ମେଲ୍ ରୋମାନ୍ସ। ଦୁଇବର୍ଷ ଧରି ଦୁହେଁ ଦୁହିଁଙ୍କୁ ମେଲ୍ ଏବଂ ମେସେଜ୍ ଆଦାନପ୍ରଦାନ କରିବା ପରେ ୨୦୧୯ରେ ପୂନର୍ବିବାହ କରିଥିଲେ। ନିକଟରେ ଆୟୋଜିତ ଏକ କାର୍ଯ୍ୟକ୍ରମରେ ଡାନିଏଲ୍ ହଲିଉଡ୍ ଫିଲ୍ମର କାହାଣୀ ସଦୃଶ ସେମାନଙ୍କ ୟୁନିକ୍ ଲଭ୍ଷ୍ଟୋରି ବଖାଣିବା ପରେ ଏହା ଆଲୋଚ୍ୟର ବିଷୟ ପାଲଟିଛି। ଡାନିଏଲ୍ କହିଛନ୍ତି, ୨୦୦୨ ଜାନୁୟାରୀ ୯ରେ ଅନ୍ଲାଇନ୍ ଡେଟିଂ କରୁଥିବାବେଳେ ସେ ଟିମ୍ଙ୍କୁ ଭେଟିଥିଲେ। ଅନେକ ଡିନର୍ ଡେଟ୍ସ ପରେ ୨୦୦୩ ଏପ୍ରିଲ ୯ରେ ଟିମ୍ ଡାନିଏଲ୍ଙ୍କୁ ପ୍ରପୋଜ୍ କରିଥିଲେ। ପ୍ରଥମ ସାକ୍ଷାତର ଠିକ୍ ୨ ବର୍ଷ ପରେ ଅର୍ଥାତ୍ ୨୦୦୪ ଜାନୁୟାରୀରେ ବିବାହ କରିଥିଲେ। ଏହାର ଦେଢ଼ ବର୍ଷ ପରେ ଡାନିଏଲ୍ଙ୍କ ପିଲାଙ୍କୁ ଟିମ୍ ଗ୍ରହଣ କଲେ। ୨୦୧୨ରେ ବୈଶ୍ୱିକ ଆର୍ଥିକ ସଙ୍କଟ ଏହି ଯୋଡ଼ିଙ୍କୁ ପ୍ରଭାବିତ କରିଥିଲା। ଉଭୟଙ୍କ ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଦୁହିଁଙ୍କ ମନରେ ମଧ୍ୟ ପରସ୍ପର ପ୍ରତି ଘୃଣାଭାବ ଜାତ ହୋଇଥିଲା। ମା’ବାପାଙ୍କ ପୁନର୍ମିଳନକୁ ନେଇ ଦୁଇ ପିଲା ଖୁସି।
