ହାଟଡିହୀ/ଛେନାପଦୀ,୧ା୭(ଶୁଭକାନ୍ତ ନାୟକ/ନିରାକାର ପରିଡ଼ା): ପଶ୍ଚିମବଙ୍ଗ ପ୍ରେମିକାକୁ ଓଡ଼ିଶା ଡକାଇ ଝାଡ଼ଖଣ୍ଡ ପ୍ରେମିକ କେନ୍ଦୁଝର ଜିଲା ସୋସୋ ଥାନା ଅଞ୍ଚଳରେ ଗତ ମଙ୍ଗଳବାର ହତ୍ୟା କରିଥିବା ଘଟଣାରେ ପର୍ଦାଫାଶ ହୋଇଛି। ବିବାହ କରିବାକୁ ପ୍ରେମିକ ନିକଟରେ ପ୍ରେମିକା ଜଣକ ଜିଦ୍ କରିବାରୁ ଏପରି ହତ୍ୟାକାଣ୍ଡ ଘଟିଥିବା ସ୍ପଷ୍ଟ ହୋଇଛି। ଆନନ୍ଦପୁର ଏସ୍ଡିପିଓ କମଳ କୁମାର ପଣ୍ଡା କହିଛନ୍ତି ଯେ, ବୁଧବାର ଅଭିଯୁକ୍ତ ପ୍ରେମିକଙ୍କୁ ରିମାଣ୍ଡରେ ଅଣାଯାଇ ଘଟଣାସ୍ଥଳକୁ ନିଆଯାଇଥିଲା। ସେଠାରେ ସିନ୍ ରିକ୍ରିଏସନ କରାଯାଇଥିଲା। ଉଭୟଙ୍କ ମଧ୍ୟରେ ଇନ୍ଷ୍ଟାଗ୍ରାମରୁ ପ୍ରେମ ଆରମ୍ଭ ହୋଇ ଘନିଷ୍ଠତା ବଢ଼ିଥିଲା। ପ୍ରେମିକା ଜଣକ ପ୍ରେମିକଙ୍କୁ ବିବାହ କରିବାକୁ ଜିଦ ଧରିଥିଲେ। ଫଳରେ ପ୍ରେମିକ ପ୍ରେମିକାଙ୍କୁ ଓଡିଶା ଆସିବାକୁ କହିଥିଲେ। ପ୍ରେମିକା ଟ୍ରେନ୍ରେ ଆସିବା ପରେ ତାକୁ ଅଭିଯୁକ୍ତ ପ୍ରେମିକ ସୋସୋ ଥାନା ଅଞ୍ଚଳକୁ ନେଇ ଏକ ବାଉଁଶ ଲାଠିରେ ଆକ୍ରମଣ କରିଥିଲେ। ବାଉଁଶ ଲାଠିକୁ ଜବତ କରାଯାଇଛି। ହତ୍ୟା କରିବା ପରେ ପ୍ରେମିକାଙ୍କୁ ପାଣି, କାଦୁଅ ବିଲରେ ପକାଇ ଫେରାର ହୋଇଯାଇଥିଲେ।
ପ୍ରେମିକା ଜଣକ ପଶ୍ଚିମବଙ୍ଗର ବୀରଭୂମି ଜିଲା ନାଲହାଟି ଥାନା ଲୁହପୁର ବଜାର ଗ୍ରାମର ଚାନ୍ଦ ଶେଖଙ୍କ ପତ୍ନୀ ଆସମା ବିବି (୪୦)। ନାଲହାଟି ଥାନାରେ ସ୍ତ୍ରୀ ନିଖୋଜ ନେଇ ଏକ ମାମଲା ରୁଜୁ ହୋଇଛି। ମୃତ ମହିଳା ଜଣକ ପୂର୍ବରୁ ବିବାହ କରିଥିଲେ। ପରବର୍ତ୍ତୀ ସମୟରେ ନିଜ ସମୁଦୀକୁ (ଝିଅର ଶ୍ୱଶୁର) ଦିତୀୟ ଥର ପାଇଁ ବିବାହ କରିଥିଲେ। ବୁଧବାର ମୃତ ମହିଳାଙ୍କ ମା’, ବାପା, ସ୍ବାମୀ ସୋସୋ ଥାନାରେ ପହଞ୍ଚିଛନ୍ତି।
ସୂଚନାଯୋଗ୍ୟ, ଅଭିଯୁକ୍ତ ଝାଡ଼ଖଣ୍ଡ ପ୍ରେମିକଙ୍କୁ କେନ୍ଦୁଝର ଏସ୍ପିଙ୍କ ନିର୍ଦ୍ଦେଶରେ ପୋଲିସର ଏକ ସ୍ବତନ୍ତ୍ର ଟିମ୍ ଗତ ଶନିବାର ଝାଡ଼ଖଣ୍ଡରୁ ଗିରଫ କରି କେନ୍ଦୁଝର ଆଣିଥିଲା। ଅଭିଯୁକ୍ତ ଜଣକ ସାହେବଗଞ୍ଜ ଜିଲା ରାଜମହଲ ଥାନା କୋଚପଡ଼ା ପୂର୍ବୀ ନାରାୟଣପୁର ଗ୍ରାମର ତମ୍ବା ଶେଖଙ୍କ ପୁଅ ମହମଦ ଟୁନୁ ଶେଖ (୨୦)ଅଟନ୍ତି। ପୋଲିସ କେସ୍ ନଂ ୧୨୭/୨୦୨୬ରେ ଏକ ମାମଲା ରୁଜୁ କରି ମୁଖ୍ୟ ଅଭିଯୁକ୍ତ ଝାଡ଼ଖଣ୍ଡ ପ୍ରେମିକଙ୍କ ସହଯୋଗୀକୁ ଭଦ୍ରକ ଜିଲା ରୁରାଲ ଥାନା ନାରାୟଣପୁର ଗ୍ରାମର କାଳନ୍ଦୀ ଜେନାଙ୍କ ପୁଅ ଅକ୍ଷୟ(୨୨)ଙ୍କୁ ପ୍ରଥମେ ଗିରଫ କରିଥିଲା।
