ମନ ସହ ଯେବେ ମନ ମିଶିଯାଏ ପ୍ରେମ ହେଇଯାଏ। ଆଉ ଏଇ ପ୍ରେମ ନା ଦେଖେ ଜାତି, ଧର୍ମ ଅବା ବର୍ଣ୍ଣ। ତା’ସହ ଉଚ୍ଚତାର ତାରତମ୍ୟ ବି ଦେଖେନା। ଯେମିତିକି ବ୍ରିଟେନ୍ର ଏଇ ଦମ୍ପତି। ଜେମ୍ସ ଓ କ୍ଲୋଇ ଲଷ୍ଟେଡ ନାମକ ଏହି ଦମ୍ପତିରେ ସ୍ବାମୀ ଜେମ୍ସଙ୍କର ଉଚ୍ଚତା ହେଉଛି ୩ ଫୁଟ ୭ ଇଞ୍ଚ ଏବଂ ପତ୍ନୀ କ୍ଲୋଇଙ୍କ ଉଚ୍ଚତା ୫ ଫୁଟ ୫.୪ ଇଞ୍ଚ। ଦୁହିଁଙ୍କ ଉଚ୍ଚତା ଭିତରେ ୧ ଫୁଟ ୧୦ ଇଞ୍ଚର ବ୍ୟବଧାନ ରହିଛି। ଏହି ବ୍ୟବଧାନ ପାଇଁ ଉକ୍ତ ଦମ୍ପତି ଉଚ୍ଚତାରେ ସବୁଠାରୁ ବେଶି ତାରତମ୍ୟ ଥିବା ଦମ୍ପତିଭାବେ ଓ୍ବାର୍ଲଡ ରେକର୍ଡରେ ସାମିଲ ହୋଇପାରିଛନ୍ତି। ଜେମ୍ସ ଜନ୍ମରୁ ଡାୟଏଷ୍ଟ୍ରାଫିକ୍ ଡାୟସ୍ପେଲିସିଆ ନାମକ ରୋଗରେ ଆକ୍ରାନ୍ତ ଥିଲେ। ଏହି ରୋଗରେ ଶରୀରର ଉଚ୍ଚତା ବଢି ନ ଥାଏ। ଏହି ଦୁଇଜଣଙ୍କର ଦେଖା ୨୦୧୨ରେ ହୋଇଥିଲା। ଆଉ ୨୦୧୬ରେ ବିବାହ। ତାଙ୍କର ଏକ କୁନି ଝିଅଟିଏ ବି ଅଛି। ଜୁନ ୨୦୨୨ରେ ଓ୍ବାର୍ଲଡ ରେକର୍ଡ ତାଙ୍କ ନାମରେ ହୋଇଥିଲା। କ୍ଲୋଇ କହନ୍ତି, ‘ଜେମ୍ସ ଅନ୍ୟ ସ୍ବାମୀଙ୍କ ପରି ସବୁ କାମ କରି ପାରନ୍ତି। ତେବେ ତାଙ୍କ କରିବାର ତରିକା ଟିକେ ଭିନ୍ନ ଥାଏ। ଆଉ ଏକ କଥା ହେଲା- କୌଣସି ବହିର ମଲାଟ ଦେଖି ବହିଟି ଖରାପ କି ଭଲ ଯେମିତି କହି ହେବନି, ସେମିତି ଜେମ୍ସଙ୍କ ଉଚ୍ଚତାକୁ ନେଇ ତାଙ୍କ ବ୍ୟକ୍ତିତ୍ୱକୁ ମାପିବା ଠିକ୍ ନୁହେଁ। ସେ ଜଣେ ବହୁତ ଭଲ ସ୍ବାମୀ ଓ ଭଲ ବାପା ବି। ’
