ବ୍ରହ୍ମପୁର,୨୦।୩(ସୁବାସ ଚନ୍ଦ୍ର ପାଢ଼ୀ): ଅନଲାଇନରେ ଓଏସଆରଟିସି କଷ୍ଟମର କେୟାର ନମ୍ବର ସଂଗ୍ରହ କରି ଯୋଗାଯୋଗ ବେଳେ ଠକେଇର ଶିକାର ହୋଇଛନ୍ତି ଜଣେ ଯୁବତୀ। ଓଏସଆରଟିସି ବସର ଟିକଟ ମୂଲ୍ୟ ଫେରସ୍ତ ପାଇବାକୁ ଉଦ୍ୟମ କରି ବ୍ରହ୍ମପୁରରେ ରହୁଥିବା କଟକର ଜଣେ ଯୁବତୀ ଓ ତାଙ୍କ ଭଉଣୀଙ୍କ ଆକାଉଣ୍ଟରୁ ସାଇବର ଗ୍ୟାଙ୍ଗ ୧ ଲକ୍ଷ ଟଙ୍କା ଠକି ନେଇଛନ୍ତି । ଏ ନେଇ ବୈଦ୍ୟନାଥପୁର ଥାନାରେ ମାମଲା ରୁଜୁ ହୋଇଥିବା ବେଳେ ପୋଲିସ ତଦନ୍ତ କରିଛି । ଅଯୋଧ୍ୟାନଗର ଅଞ୍ଚଳରେ ରହୁଥିବା ଏହି ଯୁବତୀ ଜଣଙ୍କ କିଛି ଦିନ ତଳେ ଓଏସଆରଟିସି ଆପ ଜରିଆରେ ବସରେ କଟକ ଯିବା ପାଇଁ ଏକ ଟିକଟ ବୁକ କରିଥିଲେ । ପରେ ସେ ଉକ୍ତ ଟିକଟ କ୍ୟାନସଲ କରି ଦେଇଥିଲେ। ହେଲେ ତାଙ୍କ ଆକାଉଣ୍ଟକୁ ଟିକଟ ମୂଲ୍ୟ ୨୧୮ ଟଙ୍କା ଫେରସ୍ତ ଆସିନଥିଲା। କିଛି ଘଣ୍ଟା ଅପେକ୍ଷା କରିବା ପରେ ଟଙ୍କା ନ ଫେରିବାରୁ ସେ ଓଏସଆରଟିସି ଆପକୁ ଯାଇ ଯୋଗଯୋଗ କରିବାକୁ ଉଦ୍ୟମ କରିଥଲେ ବି ସମ୍ଭବ ହୋଇନଥିଲା। ପରେ ଯୁବତୀ ଜଣଙ୍କ ଗୁଗଲକୁ ଯାଇ ଅନଲାଇନରେ ଓଏସଆରଟିସି କଷ୍ଟମର କେୟାର ନମ୍ବର ବାହାର କରିଥିଲେ।ଗୁଗଲରୁ ମିଳିଥିବା ନମ୍ବରରେ ଯୋଗାଯୋଗ ପରେ ଜଣେ ବ୍ୟକ୍ତି ଫୋନ ଗ୍ରହଣ କରି ଟଙ୍କା ଫେରସ୍ତ ଦିଗରେ ସମସ୍ତ ପ୍ରକାର ସହଯୋଗ କରିବେ ବୋଲି କହିଥିଲେ । ଏହାପରେ ଜଣେ ବ୍ୟକ୍ତି ଫୋନ କରି ଓଏସଆରଟିସି କଷ୍ଟମର କେୟାରରୁ କହୁଥିବା ଯୁବତୀଙ୍କୁ ଜଣାଇଥିଲେ । ଫୋନ କରିଥିବା ବ୍ୟକ୍ତି ଜଣଙ୍କ ଯୁବତୀଙ୍କୁ ଫୋନ-ପେ ଆପ ଖୋଲିବାକୁ କହିବା ସହ ମୋବାଇଲ ନମ୍ବରର ଶେଷ ୫ଟି ନମ୍ବର ଡାଏଲ କରିବାକୁ କହିଥିଲେ । ଯୁବତୀ ଜଣଙ୍କ ତାହା କରିବା ପରେ ତାଙ୍କ ଫୋନ-ପେ ଆକାଉଣ୍ଟରୁ ହଜାର ହଜାର ଟଙ୍କା କଟି ଯାଇଥିଲା । ଏ ନେଇ ଯୁବତୀ ଜଣଙ୍କ ପ୍ରଶ୍ନ କରିବାରୁ ତାଙ୍କ ଆକାଉଣ୍ଟରୁ କଟିଥିବା ସମସ୍ତ ଟଙ୍କା ଅନ୍ୟ ଏକ ଆକାଉଣ୍ଟକୁ ପଠାଇ ଦିଆଯିବ ବୋଲି କହିଥିଲେ । ଟଙ୍କା ଫେରିପାଇବା ଲୋଭରେ ଯୁବତୀ ଜଣଙ୍କ ନିଜ ଭଉଣୀର ବ୍ୟାଙ୍କ ଆକାଉଣ୍ଟର ସମସ୍ତ ତଥ୍ୟ ପ୍ରଦାନ କରିଥିଲେ । ଏହାପରେ ଯୁବତୀଙ୍କ ଭଉଣୀର ଆକାଉଣ୍ଟରୁ ମଧ୍ୟ ଟଙ୍କା କଟି ଯାଇଥିଲା । ଉଭୟଙ୍କ ଆକାଉଣ୍ଟରୁ ୫ଟି ନେଣଦେଣ ଜରିଆରେ ୧ ଲକ୍ଷ ଟଙ୍କା କଟିଯାଇଥିଲା। ପରେ ଯୁବତୀ ଜଣଙ୍କ ସାଇବର ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ । ଏହାପରେ ସେ ସାଇବର ସେଲକୁ ଯାଇ ଅଭିଯୋଗ କରିବା ସହ ବୈଦ୍ୟନାଥପୁର ଥାନାରେ ମଧ୍ୟ ଏନେଇ ଲିଖିତ ଅଭିଯୋଗ କରିଥିଲେ।
