ଜଗତ୍ସିଂହପୁର, ୫ା୩(ପ୍ରମୋଦ କୁମାର ନାୟକ):ବାଲିକୁଦା-ଏରସମା ବିଧାନସଭା ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ୨୦୦୯, ୨୦୧୪ ଓ ୨୦୧୯ରେ ବିଜୟଲାଭ କରିଥିଲେ। ଭାଜପା ଆସନ୍ତା ନିର୍ବାଚନରେ ଏଠାରେ ଉତ୍ତମ ପ୍ରଦର୍ଶନ କରିବ ବୋଲି ଅଣ୍ଟାଭିଡ଼ିଛି। ତୁଳନାତ୍ମକ ଭାବେ ଗତ ସାଧାରଣ ଓ ପଞ୍ଚାୟତ ନିର୍ବାଚନ ବେଳେ ଭାଜପାର ଭୋଟ ପ୍ରତିଶତ ବୃଦ୍ଧି ପାଇଥିବାରୁ ଦଳରେ ଆଶାୟୀଙ୍କ ସଂଖ୍ୟା ବଢ଼ୁଥିବା ଲକ୍ଷ୍ୟ କରାଯାଉଛି।
ନିର୍ବାଚନ ଭାଜପା ପାଇଁ ନୂଆ ସୁଯୋଗ ସୃଷ୍ଟି କରିଥିଲା। ଏହି ସମୟରେ ଦେଶରେ ଭାଜପାର ଲହର ଥିଲା। ବରିଷ୍ଠ ବିଜେଡି ନେତା ଡ. ଦାମୋଦର ରାଉତ ସେତେବେଳେ ଭାଜପାରେ ମିଶି ଏହି ଆସନରୁ ପ୍ରାର୍ଥୀ ମଧ୍ୟ ହୋଇଥିଲେ। ରାଜନୈତିକ ବିଚକ୍ଷଣତା ଦେଖାଇ ସେ ବିଜେଡିର ସିଂହଭାଗ ଭୋଟରଙ୍କୁ ପ୍ରଭାବିତ କରି ବିଜୟୀ ହେବେ ବୋଲି କୁହାଯାଇଥିଲା। କିନ୍ତୁ ସେଭଳି କିଛି ହେଲା ନାହିଁ। ଜିତିବା ତ ଦୂରର କଥା ସେ ଦ୍ୱିତୀୟ ସ୍ଥାନରେ ରହିପାରି ନ ଥିଲେ। କିନ୍ତୁ ଭାଜପା ଲାଭବାନ ହୋଇଥିଲା। ୨୦୦୯ରେ ଏହି ଦଳ ସପକ୍ଷରେ ମାତ୍ର ୩.୭୮% ଓ ୨୦୧୪ରେ ୨.୦୫% ଭୋଟ ଯାଇଥିବାବେଳେ ୨୦୧୯ରେ ୧୯.୫% ଅର୍ଥାତ୍ ୩୭,୬୧୧ ଖଣ୍ଡ ମିଳିଥିଲା। ଗତ ନିର୍ବାଚନରେ ବିଜେଡି ୫୩.୮୩% ଓ କଂଗ୍ରେସ ପ୍ରାର୍ଥୀ ୨୫.୫୩% ଭୋଟ ପାଇଥିଲେ। ସେଇଠୁ ସମୀକରଣ ବଦଳିବା ଆରମ୍ଭ କରିଥିଲା। ପରବର୍ତ୍ତୀ ସମୟରେ ଡ. ରାଉତ ଭାଜପା ଛାଡ଼ିଦେଇଥିଲେ ସୁଦ୍ଧା ଏହି ଦଳ ଉପରେ କୌଣସି ପ୍ରଭାବ ପଡ଼ି ନ ଥିଲା। ବରଂ ୨୦୨୨ ଜିଲା ପରିଷଦ ନିର୍ବାଚନ ସମୟରେ ଭାଜପା ସପକ୍ଷରେ ଅଧିକ ଭୋଟ ପଡ଼ିଥିଲା। ତା’ପରଠାରୁ ଭାଜପା ସପକ୍ଷରେ ଜନମତ ବଢୁଥିବା ଦଳୀୟ ନେତା ଓ କର୍ମୀଙ୍କ ପକ୍ଷରୁ ଯୁକ୍ତି କରାଯାଉଛି। ସମ୍ଭବତଃ ସେଥିପାଇଁ ଆଶାୟୀଙ୍କ ସଂଖ୍ୟା ବଢ଼ି ଚାଲିଥିବା ରାଜନୈତିକ ସମୀକ୍ଷକମାନେ ମଧ୍ୟ ମତ ଦେଉଛନ୍ତି। ତେବେ ଏହି ଭୋଟ ବ୍ୟାଙ୍କ ବଢ଼ିବା ପଛରେ କ୍ଷୀରୋଦ ଚନ୍ଦ୍ର ପରିଡ଼ାଙ୍କ ଭୂମିକା ଅଧିକ ଥିବା ସେତେବେଳେ ଆଲୋଚନା ହୋଇଥିଲା। ପରିଡ଼ା ନିର୍ବାଚନମଣ୍ଡଳୀରେ ଅନ୍ୟତମ ସୁସଙ୍ଗଠକ ଭାବେ ଜଣାଶୁଣା। ତାଙ୍କ ପୃଷ୍ଠଭୂମି ଦେଖିଲେ ଜଣାଯାଏ ସେ ୧୯୮୦ରୁ ଆର୍ଏସ୍ଏସ୍ ଏବଂ ୧୯୮୨ରୁ ଏବିଭିପି ସହ ସଂଶ୍ଳିଷ୍ଟ। ୨୦୨୧ରୁ ସରକାରୀ ଚାକିରିରୁ ଅବସର ନେବା ପରେ ଭାଜପାରେ ପୂର୍ଣ୍ଣକାଳୀନ କାର୍ଯ୍ୟକର୍ତ୍ତା ଭାବେ ସେ କାର୍ଯ୍ୟ କରି ଆସୁଛନ୍ତି। ଏଥିସହ ବାଲିକୁଦା-ଏରସମା ନିର୍ବାଚନମଣ୍ଡଳୀ ଦଳୀୟ ସାଙ୍ଗଠନିକ କାର୍ଯ୍ୟ ପରିଚାଳନା ପାଇଁ ସଂଯୋଜକ ଦାୟିତ୍ୱରେ ଅଛନ୍ତି। ୨୦୨୪ ନିର୍ବାଚନରେ ଦଳୀୟ ପ୍ରାର୍ଥୀ ହେବା ପାଇଁ ଆଶାୟୀ ଥିବା ପରିଡ଼ା କହିଛନ୍ତି।
ଦଳ ଜିଲା କାର୍ଯ୍ୟକାରିଣୀ ସଦସ୍ୟ ଶିବବ୍ରତ ଦାସ ମଧ୍ୟ ଆଶାୟୀ ତାଲିକାରେ ଅଛନ୍ତି। ସେ ଗତ ନିର୍ବାଚନ ସମୟରେ କଂଗ୍ରେସ ଛାଡ଼ି ଭାଜପାରେ ମିଶିଥିଲେ। ପୂର୍ବରୁ କଂଗ୍ରେସ ଜିଲା ପରିଷଦ ସଭ୍ୟ ଥିଲେ। ବାଲିକୁଦା ଅଞ୍ଚଳରେ ଜଣେ ଜଣାଶୁଣା ବ୍ୟକ୍ତି। ଭାଜପା ସ୍ବତନ୍ତ୍ର ନିମନ୍ତ୍ରିତ ରାଜ୍ୟ କାର୍ଯ୍ୟକାରିଣୀ ସଦସ୍ୟ ସଞ୍ଜୟ ମହାନ୍ତିଙ୍କ ନାମ ମଧ୍ୟ ଆଲୋଚନାକୁ ଆସିଛି। ସେ ୨୦୧୯ ନିର୍ବାଚନ ସମୟରେ ଭାଜପାରେ ସାମିଲ ହୋଇଥିଲେ। ଜିଲା କାର୍ଯ୍ୟକାରିଣୀ ସଦସ୍ୟ ଶଶିକାନ୍ତ ପରିଡ଼ା ଦଳୀୟ ଟିକେଟ ଦୌଡ଼ରେ ଅଛନ୍ତି। ଅନୁରୂପ ଭାବେ ହରିୟାଣାରେ ରହୁଥିବା ସତ୍ୟ ସାରଥି ମହାନ୍ତି ୨/୩ ମାସ ପୂର୍ବରୁ ନିର୍ବାଚନମଣ୍ଡଳୀରେ ପହଞ୍ଚତ୍ ଭାଜପା ସାଙ୍ଗଠନିକ କାର୍ଯ୍ୟରେ ମନୋନିବେଶ କରୁଛନ୍ତି। ସେ ଏଥର ପ୍ରାର୍ଥୀ ହେବା ପାଇଁ ଆଶାୟୀ। କିନ୍ତୁ ସେ କେତୋଟି ଘଟଣାରେ ବିବାଦୀୟ ହୋଇ ପଡ଼ିଥିବା ଚର୍ଚ୍ଚା ହେଉଛି। ଗତ ଜାନୁଆରୀ ୨୯ରେ ଏରସମାରେ ତାଙ୍କ ନେତୃତ୍ୱରେ ଏକ ମିଶ୍ରଣ ପର୍ବ କରାଯିବାକୁ ସ୍ଥିର ହୋଇଥିଲା। କିନ୍ତୁ ତାହା ହଠାତ୍ ବାତିଲ ହେବା ଭିନ୍ନ ବାର୍ତ୍ତା ଦେଇଛି। ପୁଣି ମାର୍ଚ୍ଚ ୩ରେ ଏହି ପର୍ବ ଏରସମା ନୁହେଁ, ବାଲିକୁଦାରେ ଅନୁଷ୍ଠିତ ହୋଇଥିଲେ ହେଁ ରାଜ୍ୟ ସଭାପତି ମନମୋହନ ସାମଲ ସେଠାକୁ ନ ଆସିବା ଦଳ କାହା ଉପରେ ଆସ୍ଥା ପ୍ରକଟ କରି ଟିକେଟ ଦେଉଛି ତାହା ଦେଖିବାରେ ଅଛି।
