ଭୁବନେଶ୍ୱର,୧୦।୧୧(ବ୍ୟୁରୋ): ବିଗତ ୨୦ ବର୍ଷରେ ଓଡ଼ିଶାରେ ବିକାଶର ବିଭିନ୍ନ କ୍ଷେତ୍ରରେ ଦ୍ରୁତ ପରିବର୍ତ୍ତନ ଘଟିଛି ବୋଲି ମୁଖ୍ୟ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି। ମଙ୍ଗଳବାର ଲୋକସେବା ଭବନରେ ଆଇଏସ୍ ଶିକ୍ଷାନବିସମାନେ ମୁଖ୍ୟ ଶାସନ ସଚିବଙ୍କୁ ଭେଟିଥିଲେ। ଏହି ଅବସରରେ ଗ୍ରାମୀଣ ଯୋଗାଯୋଗ, ଗ୍ରାମୀଣ ଆବାସ, ଇକୋ-ଟୁରିଜିମ୍ ପରିଚାଳନା, ଜଳସେଚନ ସମ୍ଭାବନା ସୃଷ୍ଟି, କୃଷିକ୍ଷେତ୍ରରେ ବିକାଶ ଏବଂ ସ୍ବାସ୍ଥ୍ୟସେବା ବିଶେଷକରି କୋଭିଡ୍-୧୯ ପରିଚାଳନା ଦେଖିବାକୁ ମୁଖ୍ୟ ଶାସନ ସଚିବ ଶିକ୍ଷାନବିସମାନଙ୍କୁ ପରାମର୍ଶ ଦେଇଥିଲେ।
ମୁଖ୍ୟ ସଚିବ କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ କୋଭିଡ୍-୧୯ ପରିଚାଳନା ବେଶ୍ ସଫଳ ହୋଇଛି। ସ୍ଥିତିର ବାସ୍ତବ ଆକଳନ, ଆଗୁଆ ପ୍ରସ୍ତୁତି, ତଳସ୍ତରରୁ ଉପରସ୍ତର ଯାଏ ଟିମ୍ ଗଠନ, ଏସ୍ଓପି, ଟେକ୍ନୋଲୋଜିର ଉପଯୋଗ ଏବଂ ତ୍ୱରିତ ରେସ୍ପନ୍ସ ସିଷ୍ଟମ ତଥା ସର୍ବୋପରି ବିଭିନ୍ନ ସ୍ତରରେ ଜନସାଧାରଣଙ୍କ ଅଂଶଗ୍ରହଣ ହେଉଛି ଏହି ସଫଳତାର ମୂଳମନ୍ତ୍ର। ଓଡ଼ିଶାର ବିପର୍ଯ୍ୟୟ ଏବଂ ମହାମାରୀ ପରିଚାଳନା ଆନ୍ତର୍ଜାତିକ ସ୍ତରରେ ଶ୍ରେଷ୍ଠ ବିବେଚିତ ହୋଇଛି। ଭବିଷ୍ୟତରେ ଯେକୌଣସି ଜନସ୍ବାସ୍ଥ୍ୟ ସଙ୍କଟର ମୁକାବିଲା ଲାଗି ପ୍ରଶାସନକୁ ପ୍ରସ୍ତୁତ ରଖିବାରେ ଏହା ଆପଣମାନଙ୍କ ପାଇଁ ସହାୟକ ହେବ ବୋଲି ସେ କହିଥିଲେ। ଉନ୍ନୟନ କମିଶନର ପ୍ରଦୀପ କୁମାର ଜେନା କଳାହାଣ୍ଡି, ନୂଆପଡ଼ା ଏବଂ କୋରାପୁଟ ଭଳି ଜିଲାରେ ୨ରୁ ୩ ଦିନ ରହଣି କରିବାକୁ ଶିକ୍ଷାନବିସମାନଙ୍କୁ ପରାମର୍ଶ ଦେଇଥିଲେ। ଦାରିଦ୍ର୍ୟ ଏବଂ ଅନାହାର ପାଇଁ ଏକଦା ପରିଚିତ ଥିବା କଳାହାଣ୍ଡି ଆଜି ଖାଦ୍ୟ ଶସ୍ୟ ଏବଂ ପନିପରିବା ଉପତ୍ାଦନରେ ମୁଖ୍ୟ ଭୂମିକା ନେଉଛି। ସେହିପରି ୧୯୯୯ ମହାବାତ୍ୟାଠାରୁ ଆରମ୍ଭ କରି ୨୦୧୯ରେ ‘ଫନି’ ଏବଂ ୨୦୨୧ରେ ‘ଗୁଲାବ’ ବାତ୍ୟା ଯାଏ କିପରି ପରିର୍ବନ ହୋଇଛି, ସେ ବିଷୟରେ ଜାଣିବାକୁ ପ୍ରଦୀପ ପରାମର୍ଶ ଦେଇଥିଲେ। ଗୋପବନ୍ଧୁ ଏକାଡେମୀ ଅଫ୍ ଆଡ୍ମିନିଷ୍ଟ୍ରେଶନ୍ର ଅତିରିକ୍ତ କମିଶନର ହିମାଂଶୁ ପଣ୍ଡା କହିଛନ୍ତି, ୨୦୨୦ ବ୍ୟାଚ୍ର ୫ ଅଧିକାରୀଙ୍କୁ ନେଇ ଏହି ଶିକ୍ଷାନବିସ ଗ୍ରୁପ୍।
