ଚାନ୍ଦବାଲି, ୧୦।୧୨ (କିଷାନ ପାତ୍ର)ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଉତୁକୁଡ଼ା ପଞ୍ଚାୟତର ଚକିଆସାହି ଗ୍ରାମ ଏବେବି ଅବହେଳିତ ଅବସ୍ଥାରେ ରହିଛି। ଉକ୍ତ ଗ୍ରାମକୁ ଯାତାୟାତ କରିବା ପାଇଁ ଭଲ ରାସ୍ତା ଖଣ୍ଡେ ନ ଥିବାବେଳେ ପିଇବା ପାଣି ପାଇଁ ସରକାରୀ ନଳକୂପ ପାଖରେ ଲମ୍ବାଧାଡ଼ି ଲାଗୁଛି। ଗଁାକୁ ପକ୍କାରାସ୍ତା ଓ ଅଧିକ ନଳକୂପ ବସାଇବା ପାଇଁ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ ସତ୍ତ୍ୱେ କୌଣସି ପଦକ୍ଷେପ ନିଆଯାଉ ନାହିଁ। ସରକାରଙ୍କ ପକ୍ଷରୁ ଚାନ୍ଦବାଲିରେ ମେଗା ପ୍ରକଳ୍ପ ମାଧ୍ୟମରେ ବିଭିନ୍ନ ଗ୍ରାମକୁ ପାଇପ୍ ଯୋଗେ ବିଶୁଦ୍ଧ ପାଣି ଯୋଗାଇବା ବ୍ୟବସ୍ଥା ହୋଇଥିବା ବେଳେ ଏହି ଗ୍ରାମକୁ ସଂଯୋଗ କରାଯାଇ ନାହିଁ। ଗ୍ରାମର ଲୋକେ ପାଣି ଆଣିବାକୁ ବହୁ ଅସୁବିଧାର ସମ୍ମୁଖୀନ ହେଉଥିବା ବେଳେ ସେମାନଙ୍କ ଦାବିକୁ ଅଣଦେଖା କରାଯାଉଥିବା ଅଭିଯୋଗ ଆଣି ଅସନ୍ତୋଷ ପ୍ରକାଶ କରିଛନ୍ତି।
ଉକ୍ତ ଗ୍ରାମରେ ୬୫ ପରିବାର ବସବାସ କରୁଛନ୍ତି। ମୋଟ ୫ଶହରୁ ଊର୍ଦ୍ଧ୍ୱ ଜନସାଧାରଣଙ୍କୁ ଏବେ ମାତ୍ର ଗୋଟିଏ ସରକାରୀ ନଳକୂପ ଅଛି। ଏତେସଂଖ୍ୟକ ଲୋକ ଯୋଗୁ ଗ୍ରାମର ମହିଳାମାନେ ଗୋଟିଏ ନଳକୂପରୁ ପାଣି ନେବାକୁ ରାତି ୩ଟାରୁ ସେଠାରେ ଲମ୍ବାଧାଡ଼ିରେ ରହି ଅପେକ୍ଷା କରିବାକୁ ପଡ଼ୁଛି। ଓ୍ବାର୍ଡମେମ୍ବର ମମତା ବେହେରା କହନ୍ତି, ଗ୍ରାମରେ ପୂର୍ବରୁ ଦୁଇଟି ସରକାରୀ ନଳକୂପ ଥିଲା। ସେଥିମଧ୍ୟରୁ ଗୋଟିଏ ନଳକୂପ ଦୁଇବର୍ଷରୁ ଊର୍ଦ୍ଧ୍ୱ ହେଲା ହେଲା ଅଚଳ ହୋଇପଡ଼ିଛି। ଏହାର ମରାମତି ପାଇଁ ସ୍ଥାନୀୟ ପ୍ରଶାସନର ଦୃଷ୍ଟି ଆକର୍ଷଣ କରାଯାଇଥିଲେ ହେଁ କୌଣସି ସୁଫଳ ମିଳିନାହିଁ। ତେବେ ଗ୍ରାମରେ ପିଇବା ପାଣି ସମସ୍ୟା ମାସକର କିମ୍ବା ବର୍ଷକର ନୁହେଁ ଦୀର୍ଘ ୧୦ବର୍ଷ ଧରି ଏଭଳି ଅସୁବିଧାର ସମ୍ମୁଖୀନ ହେଉଛନ୍ତି। ଶାସକ ଦଳ ପକ୍ଷରୁ ଦୁଇ ଦୁଇଥର ଲଗାତର ବିଧାୟକ ହେବା ପରେ ମଧ୍ୟ ଏହି ଗ୍ରାମର ମୌଳିକ ସମସ୍ୟା ସମାଧାନ ହୋଇପାରୁ ନାହିଁ। ଆଗାମୀ ନିର୍ବାଚନ ପୂର୍ବରୁ ରାସ୍ତା ଓ ପାଣି ସମସ୍ୟା ସମାଧାନ ନ ହେଲେ ଏଥର ଭୋଟ୍ ଦେବେ ନାହିଁ। ଏଥିସହ ଆନ୍ଦୋଳନକୁ ଓହ୍ଲାଇବେ ବୋଲି ଗ୍ରାମବାସୀ ନିଷ୍ପତ୍ତି ନେଇଥିବା ଗ୍ରାମର କାହ୍ନୁଚରଣ ବେହେରା କହିଛନ୍ତି। ଏ ସମ୍ପର୍କରେ ଉତୁକୁଡ଼ା ସରପଞ୍ଚ ସ୍ବର୍ଣ୍ଣଲତା ପୁହାଣ କହିଛନ୍ତି, ଗ୍ରାମବାସୀଙ୍କ ଅଭିଯୋଗ ପରେ ୩ଥର ପଞ୍ଚାୟତ ସମିତି ବୈଠକରେ ସେ ପ୍ରସଙ୍ଗ ଉପସ୍ଥାପନ କରିଛନ୍ତି। ସେହିପରି ଗ୍ରାମବାସୀଙ୍କ ସହ ଯାଇ ଏନେଇ ବିଡିଓଙ୍କୁ ମଧ୍ୟ ଲିଖିତ ଭାବେ ଜଣାଇଛନ୍ତି।
