ମାଲକାନଗିର, ୧୦।୯(ସ୍ବ.ପ୍ର./ଡି.ଏନ୍.ଏ.): ଏମ୍ଜିଏନ୍ଆରଇଜିଏସ୍ରେ ଜାଣିବାକୁ ଚାହୁଁଥିବା କାର୍ଯ୍ୟ ସମ୍ପର୍କରେ ତଥ୍ୟ ମାଗି ନିରାଶ ହେବା ପରେ ଆବେଦନକାରୀ ଲୋକପାଳଙ୍କ ଦ୍ୱାରସ୍ଥ ହୋଇଥିଲେ। ଲୋକପାଳ ମାମଲାକୁ ଗ୍ରହଣକରି ଆବେଦନକାରୀଙ୍କୁ ଶୀଘ୍ର ତଥ୍ୟ ଯୋଗାଇଦେବାକୁ ମାଲକାନଗିରି ଜିଲାର ୨ଜଣ ବିଡିଓଙ୍କୁ ନିର୍ଦ୍ଦେଶ ଦେଇଛନ୍ତି। ଖବରରୁ ଜଣାପଡିଛି, ଏମ୍ଜିଏନ୍ଆରଇଜିଏସ୍ରେ ଉଡୁପା ପଞ୍ଚାୟତରେ ହୋଇଥିବା ଦୁର୍ନୀତି ସମ୍ପର୍କରେ ଠିକ୍ ଭାବେ ଯାଞ୍ଚକରି ଜିଲାପାଳଙ୍କ ମାଧ୍ୟମରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଲାଗି ଆଇନଜୀବୀ ଅଶୋକ ପଟ୍ଟନାୟକ ମାଥିଲି ଜନ ସୂଚନା ଅଧିକାରୀଙ୍କୁ ତଥ୍ୟ ମାଗିଥିଲେ। ମାଥିଲି ପଞ୍ଚାୟତ ସମିତିକୁ ହାତିରାମ ବିଦ୍ୟାଳୟରେ ହୋଇଥିବା କାର୍ଯ୍ୟ ସମ୍ପର୍କରେ ମଧ୍ୟ ତଥ୍ୟ ମାଗିଥିଲେ। ସେହିପରି ଏମ୍ଜିଏନ୍ଆରଇଜିଏସ୍ରେ ବିଭିନ୍ନ କାର୍ଯ୍ୟରେ ହୋଇଥିବା ଅନିୟମିତତାର ଯାଞ୍ଚ ପାଇଁ ପଟ୍ଟନାୟକ ପଞ୍ଚାୟତରେ ପହଞ୍ଚତ୍ ସମ୍ପୃକ୍ତ ଅଧିକାରୀଙ୍କୁ ରେକର୍ଡ ଯାଞ୍ଚ ଲାଗି କହିଥିଲେ। ମାତ୍ର ଗ୍ରାମ ରୋଜଗାର ସେବକଙ୍କ ପାଖରେ ରେକର୍ଡ ରହିଛି। ସେ କାମରେ ବ୍ଲକ ଯାଇଛନ୍ତି କହି ସମ୍ପୃକ୍ତ ଅଧିକାରୀ ରେକର୍ଡଗୁଡିକ ଦେଖାଇ ନ ଥିଲେ। ପରେ ପଟ୍ଟନାୟକ ଲୋକପାଳଙ୍କ ଦ୍ୱାରସ୍ଥ ହୋଇ ଏକ ମାମଲା ରୁଜୁ କରିଥିଲେ। ମାମଲାକୁ ବିଚାର ପାଇଁ ଗ୍ରହଣକରି ଲୋକପାଳ ସୁନାକର ପାଳ ମାଲକାନଗିରି ବିଡିଓ ଓ ମାଥିଲି ବିଡିଓଙ୍କୁ ସମସ୍ତ ନଥିପତ୍ର ଯାଞ୍ଚ ପାଇଁ ପଟ୍ଟନାୟକଙ୍କୁ ପ୍ରଦାନ କରିବା ନିମନ୍ତେ ନିର୍ଦ୍ଦେଶ ଦେଇଛନ୍ତି। ଏଥିରେ ଅବହେଳା କଲେ ଅର୍ଥଦଣ୍ଡ ସହ ଅନ୍ୟାନ୍ୟ ଆଇନଗତ କାର୍ଯ୍ୟାନୁୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦେଇଛନ୍ତି। ସୂଚନାଯୋଗ୍ୟ, ଏମ୍ଜିଏନ୍ଆର୍ଇଜିଏସ୍ରେ ପ୍ରତ୍ୟେକ ଗରିବ ପରିବାରଙ୍କୁ ୧୦୦ ଦିନ କାମ ଦେବାର ବ୍ୟବସ୍ଥା ସହ ଗ୍ରାମର ଉନ୍ନତି ପାଇଁ ବ୍ୟବସ୍ଥା ରହିଛି। ମାତ୍ର ଏଥିରେ ଦୁର୍ନୀତି ଯୋଗୁ ଏହାର ଅର୍ଥ ହିତାଧିକାରୀଙ୍କ ନିକଟକୁ ନ ଯାଇ ବାଟମାରଣା ହୋଇଥିବା ଜଣାପଡ଼ିଛି।
