ବାରଙ୍ଗ,୧୧।୧(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନରେ ମଙ୍ଗଳବାର ସିଂହୀ ରେୱା ପ୍ରଥମଥର ମା’ ହୋଇଥିବା ବେଳେ ୪ଟି ଛୁଆକୁ ଜନ୍ମ ଦେଇଛି। ହେଲେ ଜନ୍ମଦେବାର କିଛି ସମୟ ମଧ୍ୟରେ ନବଜାତକ ଛୁଆଙ୍କୁ ମା’ସ୍ନେହରୁ ବଞ୍ଚତ୍ତ ହେବାକୁ ପଡିଛି। ମା’ ରେୱା ଜନ୍ମ ଦେଇଥିଲେ ମଧ୍ୟ ଛୁଆଙ୍କୁ ଗ୍ରହଣ ନ କରିବାରୁ ମଣିଷ କୋଳରେ ଲାଳନପାଳନ ହେବା ପାଇଁ ଲାଳନପାଳନ କେନ୍ଦ୍ରରେ ଛଡ଼ାଯାଇଛି। ଶୁକ୍ରବାର ଅନ୍ୟତମ ଆକର୍ଷଣ ସାଜିଥିବା ଧଳା ବାଘୁଣୀ ରୂପା ୩ ଶାବକକୁ ଜନ୍ମ ଦେବାର ୪ଦିନ ପରେ ମଙ୍ଗଳବାର ସିଂହୀ ରେୱା ତା’ର ପ୍ରଥମଗର୍ଭସ୍ଥ ସନ୍ତାନକୁ ଜନ୍ମ ଦେଇଛି। ଏସିଆଟିକ୍ ସିଂହ ଜିତ୍ ସହ ମିଳନ ଘଟି ପ୍ରଥମକରି ମା’ ହେବାର ସୌଭାଗ୍ୟ ଅର୍ଜନ କରିଥିବା ରେୱା ଗର୍ଭଧାରଣ କରିଥିବାର ଜଣାପଡିବା ପରେ ତା’ପ୍ରତି କର୍ମଚାରୀମାନେ ସତର୍କ ଦୃଷ୍ଟି ରଖିଥିଲେ। ପ୍ରଥମକରି ସିଂହୀ ରଓ୍ବୋ ମା’ ହେଉଥିବାରୁ ସିଂହସଫାରୀର ଏକ ସେଲରେ ସ୍ବତନ୍ତ୍ର ଭାବେ ତାକୁ ରଖାଯାଇ ସିସିକ୍ୟାମେରା ଦ୍ୱାରା ଗତିବିଧିକୁ ଲକ୍ଷ୍ୟ କରାଯାଇଥିଲା। ଆବଶ୍ୟକ ନ ଥିଲେ ରେୱା ରହୁଥିବା ସେଲ୍ ପାଖକୁ କର୍ମଚାରୀମାନଙ୍କ ଯାତାୟାତକୁ ସମ୍ପୂର୍ଣ୍ଣ ରୂପେ ବାରଣ କରାଯାଇଥିଲା। ଶେଷରେ ମଙ୍ଗଳବାର ରେୱା ପର୍ଯ୍ୟାୟକ୍ରମେ ୪ ଛୁଆକୁ ଜନ୍ମ ଦେଇଥିଲା। କିନ୍ତୁ ପ୍ରଥମ ଛୁଆଟି ଜନ୍ମହେବାର କିଛି ସମୟ ପରେ ମୃତ୍ୟୁବରଣ କରିଥିଲା। ଦ୍ୱିତୀୟ ଛୁଆକୁ ଜନ୍ମଦେଇ ସାରିଲା ପରେ ରେୱା ଗ୍ରହଣ କରି ନଥିଲା। ପ୍ରାୟ ୫ ଘଣ୍ଟା ପର୍ଯ୍ୟନ୍ତ ଅପେକ୍ଷା କରିବା ପରେ ମଧ୍ୟ ରଓ୍ବୋ ଛୁଆକୁ ଗ୍ରହଣ କଲା ନାହିଁ। ବାଧ୍ୟ ହୋଇ କର୍ମଚାରୀମାନେ ମା’ଠାରୁ ଅଲଗା କରି ଛୁଆଟିକୁ ଚିକିତ୍ସାଳୟ ପାଖରେ ଥିବା ଲାଳନପାଳନ କେନ୍ଦ୍ରକୁ ସ୍ତାନାନ୍ତର କରିଥିଲେ। ତୃତୀୟ ଛୁଆଟି ମଧ୍ୟ ଜନ୍ମ ପରେ ମରିଯାଇଥିଲା। ଶେଷରେ ଚତୁର୍ଥ ଛୁଆକୁ ଜନ୍ମ ଦେବାର କିଛି ସମୟ ମଧ୍ୟରେ ଗ୍ରହଣ କରି ନ ଥିଲା। ପ୍ରାୟ ଅଧଘଣ୍ଟା ପରେ ତାକୁ ମଧ୍ୟ ମା’ଠାରୁ ଅଲଗା କରି ଲାଳନପାଳନ କେନ୍ଦ୍ରକୁ ଆଣିଥିଲେ। ନବଜାତକ ୨ଟିକୁ ବଞ୍ଚାଇ ରଖିବା ପାଇଁ ନନ୍ଦନକାନନ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଉଭୟ ଛୁଆଙ୍କୁ ଇନକ୍ୟୁବେଶନ ଚାମ୍ବରରେ ରଖାଯିବା ସହ ବଞ୍ଚାଇ ରଖିବାର ପ୍ରୟାସ ଜାରି ରହିଛି। ଏହାସହ ପ୍ରଥମକରି ମା’ ହୋଇଥିବା ସିଂହୀ ରେୱାର ଏଭଳି ଆଚରଣ ପରେ ତା’ପ୍ରତି କର୍ମଚାରୀମାନେ ସତର୍କ ଦୃଷ୍ଟି ରଖିଥିବାର ଉପନିର୍ଦେଶକ ସଞ୍ଜିତ କୁମାର କହିଛନ୍ତି। ତେବେ ଏହି ନବଜାତକକୁ ମିଶାଇବା ପରେ ନନ୍ଦନକାନନରେ ସିଂହ ସଂଖ୍ୟା ସମୁଦାୟ ୨୩ରେ ପହଞ୍ଚତ୍ଛି। ସେଥିମଧ୍ୟରେ ଏସିଆ ଟିକ-୧୩, ଆଫ୍ରିକାନ-୧, ହାଇବ୍ରିଡ-୭ ଓ ଛୁଆ-୨।
