ଦିଗପହଣ୍ଡି,୧୧ା୧(ଡି.ଏନ.ଏ.): ଗଞ୍ଜାମ-ଗଜପତି ଜିଲା ସୀମାନ୍ତ ଘୋଡାହାଡ଼ ଡ୍ୟାମ୍ରେ ଗତ ୩ ଦିନ ଧରି ଚାଲିଥିବା କୁମ୍ଭୀର ଗଣନା ମଙ୍ଗଳବାର ଶେଷ ହୋଇଛି। ଦିଗପହଣ୍ଡି ବନ ବିଭାଗ ପକ୍ଷରୁ ଡ୍ୟାମ୍ର ୧୦ ଅଞ୍ଚଳରେ ଗଣନା କାର୍ଯ୍ୟ କରାଯାଇଥିଲା। ସତନ୍ତ୍ର ତାଲିମପ୍ରାପ୍ତ ବନ କର୍ମଚାରୀମାନେ ୧୦ଟି ଦଳରେ ବିଭକ୍ତ ହୋଇ ଡଙ୍ଗା ସାହାଯ୍ୟରେ ଡ୍ୟାମ୍ ଅଞ୍ଚଳରେ କୁମ୍ଭୀର ଗଣନା କରିଥିଲେ। ଚଳିତବର୍ଷ ୬୪ଟି କୁମ୍ଭୀର ରହିଥିବା ଗଣନା ପରେ ରିପୋର୍ଟରୁ ଜଣାପଡିଛି ବୋଲି ବ୍ରହ୍ମପୁର ବନଖଣ୍ଡ ଡିଏଫ୍ଓ ଅମ୍ଳାନ କୁମାର ନାୟକ କହିଛନ୍ତି। ସେହିପରି ଡ୍ୟାମ୍ ସଂଲଗ୍ନ ବିଭିନ୍ନ ଗ୍ରାମର ଜଳାଶୟଗୁଡିକରେ ୧୭ଟି କୁମ୍ଭୀର ଥିବା ଚିହ୍ନଟ କରାଯାଇଛି। ଅପରପକ୍ଷରେ ଡ୍ୟାମ୍ରେ ବହୁ ସଂଖ୍ୟକ ଗୋମୁହଁା ପ୍ରଜାତିର କୁମ୍ଭୀରଥିବା ଗବେଷକ ଡ.ଅନନ୍ତ ରାମ କର କହିଛନ୍ତି। ୧୯୬୭ରେ ପ୍ରତିଷ୍ଠା କରାଯାଇଥିବା ଘୋଡାହାଡ଼ ଡ୍ୟାମ୍କୁ ଶୀତ ଋତୁରେ ବହୁ ସଂଖ୍ୟକ ଦେଶୀ ବିଦେଶୀ ପକ୍ଷୀ ଆସିଥାନ୍ତି। ଏଠାରେ ବନ ବିଭାଗ ପକ୍ଷରୁ ପରିବେଶଭିତ୍ତିକ ପର୍ଯ୍ୟଟନସ୍ଥଳ ଇକୋ ଟୁରିଜମ୍ ପ୍ରତିଷ୍ଠା କରାଯାଇଛି ବୋଲି ରେଞ୍ଜର କାହ୍ନୁଚରଣ ପଟ୍ଟନାୟକ କହିଛନ୍ତି। କୁମ୍ଭୀର ଗଣନା କାର୍ଯ୍ୟରେ ବନପାଳ ସନ୍ତୋଷ ମଲ୍ଲିକ,ସୋମନାଥ ମଲ୍ଲିକ,ଡି.ପ୍ରଶାନ୍ତ ରାଓ,ଅରୁଣ କୁମାର ଦାସଙ୍କ ସମେତ ୫୦ ରୁ ଊର୍ଦ୍ଧ୍ୱ ବନ କର୍ମଚାରୀ ସାମିଲ ଥିଲେ। ଗତ ବର୍ଷ ଡ୍ୟାମ୍ରେ ୫୮ କୁମ୍ଭୀର ଥିବାବେଳେ ପାର୍ଶ୍ୱବର୍ତ୍ତୀ ଗ୍ରାମ ଜଳାଶୟଗୁଡିକରେ ୧୮ କୁମ୍ଭୀର ଚିହ୍ନଟ କରାଯାଇଥିଲା। ଡ୍ୟାମ୍ରେ ୫ଟି କୁମ୍ଭୀର ବଢ଼ିଥିବା ଜଣାପଡିଛି।
