ଓ୍ବାଶିଂଟନ,୧୫ା୪: ୧୯୭୭ ଫେବୃୟାରୀ ୨୦ରେ ଜର୍ମାନୀର ଅଗ୍ସବର୍ଗରେ କ୍ରିଷ୍ଟିନ୍ ଡେନାଇସ୍ ସ୍ମାର୍ଟଙ୍କ ଜନ୍ମ। ବଞ୍ଚତ୍ଥିଲେ ଏବେ ତାଙ୍କୁ ୪୪ ବର୍ଷ ହୋଇଥାଆନ୍ତା। ହେଲେ ୨୫ ବର୍ଷ ତଳେ ଆମେରିକାର କାଲିଫର୍ନିଆରେ ରହସ୍ୟମୟ ଭାବେ ହଠାତ୍ ନିଖୋଜ ହୋଇଯାଇଥିଲେ ଷ୍ଟକ୍ଟନର ଏଇ ୧୯ ବର୍ଷୀୟା ଛାତ୍ରୀ। ସ୍ମାର୍ଟଙ୍କୁ ଉଦ୍ଧାର କିମ୍ବା ତାଙ୍କ ମୃତଦେହ ଠାବ କରାଯାଇପାରି ନାହିଁ। ହତ୍ୟା ଅଭିଯୋଗରେ ଏତେ ବର୍ଷ ପରେ ଦୁଇ ବାପପୁଅଙ୍କୁ ଗିରଫ କରିଛି କାଲିଫର୍ନିଆ ପୋଲିସ। ପାଉଲ୍ ଫ୍ଲୋରେସ୍(୪୪)ଙ୍କୁ ହତ୍ୟା ଓ ତାଙ୍କ ବାପା ରୁବେନ୍ ଫ୍ଲୋରେସ୍(୮୦)ଙ୍କୁ ଏହି ଅପରାଧରେ ସହଯୋଗ କରିବା ଅଭିଯୋଗରେ ଗିରଫ କରାଯାଇଥିବା ମଙ୍ଗଳବାର ତଦନ୍ତକାରୀ ଅଧିକାରୀମାନେ ସୂଚନା ଦେଇଛନ୍ତି।
୨୦୦୨ ମେ ୨୫ରେ ସ୍ମାର୍ଟଙ୍କ ନିଖୋଜ ଘଟଣାକୁ ୬ ବର୍ଷ ପୂରିଥିବାବେଳେ ପୋଲିସ ତାଙ୍କୁ ଆଇନତଃ ମୃତ ଘୋଷଣା କରିଥିଲା। ସାନ୍ ଲୁଇସ୍ ଓବିସ୍ପୋ କାଉଣ୍ଟି କର୍ତ୍ତପକ୍ଷ (ଶେରିଫ୍) ଇଆନ୍ ପାର୍କିନ୍ସନ୍ ମଙ୍ଗଳବାର ଏକ ଖବରଦାତା ସମ୍ମିଳନୀରେ କହିଛନ୍ତି, ୧୯୯୬ ମେ’ ୨୫ ରାତି ୨ଟାରେ ଆମେରିକୀୟ ଲାଇଫ୍ ଗାର୍ଡ କ୍ରିଷ୍ଟିନ୍ ସ୍ମାର୍ଟଙ୍କୁ ଶେଷ ଥର ପାଇଁ ଦେଖାଯାଇଥିଲା ଯେତେବେଳେ ସେ ଏକ ଅଫ୍-କ୍ୟାମ୍ପସ୍ ବାର୍ଥଡେ ପାର୍ଟରୁ ନିଜ ଡୋର୍ମିଟୋରିକୁ ଫେରୁଥିଲେ। ସାଙ୍ଗରେ ଥିଲେ ପାଉଲ୍ ଫ୍ଲୋରେସ୍ ଓ ତାଙ୍କ ଅନ୍ୟ ୨ ସହପାଠୀ। ସ୍ମାର୍ଟ କାଲିଫର୍ନିଆ ପଲିଟେକ୍ନିକ୍ ଷ୍ଟେଟ୍ ୟୁନିଭିର୍ସଟି ଛାତ୍ରାବାସରେ ରହିବାକୁ ପସନ୍ଦ କରୁ ନ ଥିଲେ। ଫଳରେ ଫ୍ଲୋରେସ୍ ଏଥିରୁ ଫାଇଦା ନେବାକୁ ଉଦ୍ୟମ କରିଥିଲେ। ସ୍ମାର୍ଟ ଏକ ଅଘୋଷିତ ଛୁଟିରେ ଥିବାବେଳେ ତାଙ୍କୁ ଅପହରଣ ପରେ ହତ୍ୟା କରାଯାଇଥିଲା। ଫୋରେସ୍ ପରିବାରର ଦୁଇଟି ସ୍ଥାନରେ ପୋଲିସ ଛାନ୍ଭିନ୍ କରିବାରୁ ହତ୍ୟାର ପ୍ରମାଣ ମିଳିଛି ବୋଲି ଏହି ବହୁଚର୍ଚ୍ଚିତ ନିଖୋଜ ହେବା ମାମଲାର ତଦନ୍ତ କରୁଥିବା ଅଧିକାରୀମାନେ ସୂଚନା ଦେଇଛନ୍ତି। ଫ୍ଳୋରେସ୍ ଓ ତାଙ୍କ ପରିବାର ସଦସ୍ୟଙ୍କ ଫୋନ୍କୁ ଟ୍ରାକ୍ କରିବା ପରେ ପ୍ରମାଣ ମିଳିଥିବା ସେମାନେ କହିଛନ୍ତି। ନିର୍ଦ୍ଦିଷ୍ଟ ଭାବେ କି ପ୍ରମାଣ ହାତରେ ଲାଗିଛି ସେନେଇ ମୁହଁ ଖୋଲି ନାହାନ୍ତି। କିନ୍ତୁ ଦଶନ୍ଧି ଧରି ତାଙ୍କୁ ଉଦ୍ଧାର କରିବା ପାଇଁ ୧୯୯୬ରୁ ୨୦୦୭ ପର୍ଯ୍ୟନ୍ତ ଚାଲିଥିବା ଉଦ୍ୟମ ସଫଳ ହୋଇ ନ ଥିବାରୁ ସେ କେମିତି ହଠାତ୍ ଉଭାନ ହୋଇଗଲେ ସେନେଇ ତଦନ୍ତକାରୀମାନେ କେବଳ କଳ୍ପନାଜଳ୍ପନା ପ୍ରକାଶ କରୁଛନ୍ତି। ପୋଲିସ ଏବେ ତାଙ୍କ ମୃତଦେହ ଖୋଜିବା ପାଇଁ ତନାଘନା ଚଳାଇବ ବୋଲି ଜୋର୍ ଦେଇ କହିଛି। ସ୍ମାର୍ଟଙ୍କ ପରିବାର ପକ୍ଷରୁ ଏକ ବିବୃତିରେ ପୋଲିସ କାର୍ଯ୍ୟାନୁଷ୍ଠାନକୁ ‘ତିକ୍ତମଧୁର’ ଅଭିହିତ କରାଯାଇଛି। ସ୍ମାର୍ଟଙ୍କ ପ୍ରିୟ ଆମତ୍ା ଆମ ହୃଦୟରେ ସବୁବେଳେ ରହିଛି। ତାଙ୍କ ବିନା ଆମର ଆଲିଙ୍ଗନ, ହସଖୁସି ସବୁକିଛି ଉଭେଇଯାଇଛି ବୋଲି ପରିବାର ପକ୍ଷରୁ କୁହାଯାଇଛି। ଝିଅ ନିଖୋଜ ହେବା ପରେ ପରିବାର ଲୋକେ ପାଉଲ ଫ୍ଲୋରେସ୍ଙ୍କ ବିରୋଧରେ ୪୦ ନିୟୁତ ଡଲାରର ଏକ ମାମଲା ଦାଏର କରିଥିଲେ।
