ଭୁବନେଶ୍ବର,୨୨।୨(ବ୍ୟୁରୋ): ନବ ଦାସଙ୍କ ହତ୍ୟା ଘଟଣାର ୨୩ ଦିନ ପରେ ଗୋପାଳ କେମିତି ମାରିଲା ତାହା ଏବେ ଭାଇରାଲ ହେବାରେ ଲାଗିଛି। ଏହାକୁ ନେଇ ଏବେ ରାଜନୀତି ସରଗରମ ହୋଇଛି। ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝି କହିଛନ୍ତି, ଏହି ହତ୍ୟାକାଣ୍ଡ ପ୍ରାୟୋଜିତ। ୨ଦିନ ହେଲା ଫଟୋ ଆସିବା ପରେ ନବ ଦାସଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ସ୍ପଷ୍ଟ ହୋଇଛି। ରାଜ୍ୟ ସରକାର ଏଥିରେ ସମ୍ପୃକ୍ତ ଥିବା ମଧ୍ୟ ସ୍ପଷ୍ଟ ହେଉଛି ବୋଲି ସେ କହିଛନ୍ତି। ପୂର୍ବତନ ପିସିସି ସଭାପତି ତଥା ବରିଷ୍ଠ କଂଗ୍ରେସ ନେତା ଜୟଦେବ ଜେନା କହିଛନ୍ତି, ଯିଏ ଏହି ଫଟୋ ଭାଇରାଲ କରୁ ଏବଂ ଯେଉଁ ବାଟରେ ଏହି ଫଟୋଟି ବାହାରକୁ ଆସୁ, କ୍ରାଇମବ୍ରାଞ୍ଚ ଦେଖାଉ ବା ବାହାରେ ବି ଯିଏ ଦେଖାଉ ଏହା ନିଶ୍ଚିତ ଭାବେ ସନ୍ଦେହ ଘେରକୁ ଯିବ। କାରଣ ୨୪ ଦିନ ମଧ୍ୟରେ କାହିଁକି ଏହା ପଦାକୁ ଆସୁ ନ ଥିଲା ବିଧାନସଭା ଥିବାବେଳେ କାହିଁକି ଏହାକୁ ଦେଖାଗଲା। ଯିଏ ଏହି ଫଟୋ ଭାଇରାଲ କରିଛି ତାଙ୍କୁ ତଦନ୍ତ ପରିସରଭୁକ୍ତ କରିବା ଦରକାର ବୋଲି ଜୟଦେବ କହିଛନ୍ତି। ଏ ପ୍ରସଙ୍ଗରେ ବରିଷ୍ଠ ବିଜେଡି ନେତ୍ରୀ ପ୍ରମିଳା ମଲ୍ଲିକ କହିଛନ୍ତି, କ୍ରାଇମବ୍ରାଞ୍ଚ ଠିକ୍ ବାଟରେ ତଦନ୍ତ ଚଳାଇଛି। ତଦନ୍ତକୁ ଦିଗହରା ଏବଂ ଏହାକୁ ରାଜନୀତୀକରଣ କରିବା ଲାଗି ଯେଉଁଭଳି ଭାବେ ବିରୋଧୀ ଦଳ ପକ୍ଷରୁ ଚେଷ୍ଟା କରାଯାଉଛି ତାହା ନ କରାଯାଇ ତଦନ୍ତରେ କ୍ରାଇମବ୍ରାଞ୍ଚକୁ ସମ୍ପୂର୍ଣ୍ଣ ସହଯୋଗ କରନ୍ତୁ ବୋଲି ସେ କହିଛନ୍ତି।
