କଟକ, ୨୮।୯(ସ୍ପୋଟର୍ସ ବ୍ୟୁରୋ): ବାରବାଟୀ ଷ୍ଟାଡିୟମରେ ସୋମବାର ଅନୁଷ୍ଠିତ ଲିଜେଣ୍ଡ୍ସ ଲିଗର ନବମ ମ୍ୟାଚରେ ଭିଲୱାରା କିଙ୍ଗ୍ସ ୫୭ ରନରେ ଗୁଜରାଟ ଜାଏଣ୍ଟ୍ସକୁ ପରାସ୍ତ କରିଛି। କିଙ୍ଗ୍ସ ପ୍ରଥମେ ବ୍ୟାଟିଂ କରି ୨୦ ଓଭରରେ ୪ ଉଇକେଟ ହରାଇ ୨୨୨ ରନ୍ କରିଥିବା ବେଳେ ଗୁଜରାଟ ଜାଏଣ୍ଟ୍ସ ୧୯.୫ ଓଭରରେ ୧୬୫ ରନରେ ସୀମିତ ରହିଥିଲା। ଏଥି ସହିତ ବିଜୟ ଧାରାକୁ ଫେରିଛି ଇରଫାନ ପଠାନଙ୍କ ଭିଲୱାରା କିଙ୍ଗସ୍। ଗୁଜରାଟ ଅଧିନାୟକ ବୀରେନ୍ଦ୍ର ସେହ୍ବାଗ ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ। ସେହିପରି ବିସ୍ଫୋରକ ୱେଷ୍ଟଇଣ୍ଡିଜ ଓପନର କ୍ରିସ୍ ଗେଲ ଏହି ମ୍ୟାଚରେ ନିଜର ଲିଜେଣ୍ଡ୍ସ ଲିଗ୍ ପଦାର୍ପଣ କରିଥିଲେ।
ବାରବାଟୀରେ ଖେଳା ଯାଇଥିବା କ୍ରମାଗତ ଦ୍ୱିତୀୟ ମ୍ୟାଚରେ ଓପନିଂରେ ଶତକୀୟ ଭାଗୀଦାରି ଦେଖିବାକୁ ମିଳିଥିଲା। କିଙ୍ଗ୍ସ ପକ୍ଷରୁ ଓପନ କରୁଥିବା ଓ୍ବିଲିୟମ ପୋର୍ଟରଫିଲ୍ଡ (୬୪) ଓ ଭାନ୍ ୱିକ୍ (୫୦) ପ୍ରଥମ ଉଇକେଟରେ ଯୋଡିଥିଲେ ୧୧୭ ରନ୍। ପୋର୍ଟରଫିଲ୍ଡ ୩୩ ବଲ ଖେଳି ୧୦ ଚୌକା ଓ ୨ ଛକା ମାରିଥିଲେ। ଏହାର ପରବର୍ତ୍ତୀ ଓଭରରେ ଗ୍ରେମ୍ ସ୍ବାନ୍ ବିପଜ୍ଜନକ ଭାନ୍ ୱିକଙ୍କୁ ଆଉଟ କରିଥିଲେ। ୩ ନମ୍ବରରେ ବ୍ୟାଟିଂ କରିଥିବା ଇରଫାନ ପଠାନ ୩ ଛକା ଓ ୧ ଚୌକା ସହିତ ୩୪ ରନ୍ କରିଥିଲେ। ଜେସଲ୍ କେରିଆ(୪୩) ଓ ୟୁସୁଫ୍ ପଠାନ୍(୧୪) ଦଳକୁ ୨୦୦ ରନ୍ ପାର କରାଇଥିଲେ। ୨୯ ବଲ୍ ଖେଳିଥିବା କେରିଆ ୫ ଚୌକା ଓ ୧ ଛକା ମାରିଥିଲେ। ଜାଏଣ୍ଟ୍ସ ଓ ପକ୍ଷରୁ ଅଶୋକ ଦିଣ୍ଡା, ଗ୍ରେମ୍ ସ୍ବାନ, ଥିସାରା ପେରେରା ଓ କେ. ପି. ଅପନ୍ନା ଗୋଟିଏ ଲେଖାଏ ଉଇକେଟ ନେଇଥିଲେ।
୨୨୩ ରନର ଲକ୍ଷ୍ୟ କଷ୍ଟସାଧ୍ୟ ଥିବାରୁ ସେହ୍ବାଗ ଓ ଗେଲଙ୍କ ଠାରୁ ସ୍ଥାନୀୟ ଦର୍ଶକ ବଡ ଇନିଂସ ଆଶା କରୁଥିଲେ। ମାତ୍ର ନିରାଶ ହେବାକୁ ପଡିଥିଲା। ସେହ୍ବାଗ ୨୦ ବଲରୁ ୨୭ ଓ ଗେଲ ୨୦ ବଲରୁ ୧୫ ରନ କରି ଜେସଲ କେରିଆଙ୍କ ଶିକାର ହୋଇଥିଲେ। ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ଦଳ ୭୪ ରନରେ ୭ ଉଇକେଟ ହରାଇଥିଲା। ଶେଷ ଆଡକୁ ଯଶପାଲ ଶର୍ମାଙ୍କ ୨୯ ବଲ ୫୭ ରନ ବଳରେ ଦଳ ୧୬୫ ରନରେ ପହଞ୍ଚତ୍ ପାରିଥିଲା। କିଙ୍ଗ୍ସ ପକ୍ଷରୁ ଏସ୍.ଶ୍ରୀସନ୍ଥ ସର୍ବାଧିକ ୩ ଉଇକେଟ ନେଇଥିବା ବେଳେ ଜେସଲ କେରିଆ ଓ ଫିଦେଲ ଏଡୱାଡର୍ସ ୨ଟି ଲେଖାଏ ଉଇକେଟ ନେଇଥିଲେ। ପୋର୍ଟରଫିଲ୍ଡ ପ୍ଲେୟର ଅଫ୍ ଦ ମ୍ୟାଚ ବିବେଚିତ ହୋଇଥିଲେ।
ସଂକ୍ଷିପ୍ତ ସ୍କୋର
ଭିଲୱାରା କିଙ୍ଗ୍ସ ୨୦ ଓଭରରେ ୨୨୨/୪ (ପୋର୍ଟରଫିଲ୍ଡ-୬୪, ମର୍ନେ ଭାନ ୱିକ୍-୫୦, ଜେସଲ୍ କାରିଆ-୪୩, ଇରଫାନ ପଠାନ-୩୪, କେ.ପି. ଅପନ୍ନା-୧/୩୩, ଗ୍ରେମ୍ ସ୍ବାନ୍-୧/୩୪, ଅଶୋକ ଦିଣ୍ଡା-୧/୩୭, ଥିସାରା ପେରେରା-୧/୫୬ )। ଗୁଜରାଟ ଜାଏଣ୍ଟ୍ସ ୧୯.୪ ଓଭର ୧୬୫/ଅଲ୍ଆଉଟ (ଯଶପାଲ ଶର୍ମା-୫୭, ବୀରେନ୍ଦ୍ର ସେହ୍ବାଗ-୨୭, ଏସ୍. ଶ୍ରୀସନ୍ଥ-୩/୩୬, ଜେସଲ୍ କାରିଆ-୨/୨୨, ଫିଡେଲ ଏଡୱାଡର୍ସ-୨/୩୦)।
