ଚେନ୍ନାଇ,୨୬।୭(ପି.ଟି.): ପୂର୍ବତନ ବିଶ୍ୱ ଚାମ୍ପିୟନ ତଥା ଭାରତୀୟ ଗ୍ରାଣ୍ଡମାଷ୍ଟର ବିଶ୍ୱନାଥନ ଆନନ୍ଦଙ୍କ ଖରାପ୍ ଫର୍ମ ଜାରି ରହିଛି। ଦେଢ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଲିଜେଣ୍ଡ୍ସ ଅଫ୍ ଚେସ୍ ଅନ୍ ଲାଇନ୍ ଟୁର୍ନାମେଣ୍ଟରେ ଆନନ୍ଦ କ୍ରମାଗତ ପଞ୍ଚମ ପରାଜୟ ବରଣ କରିଛନ୍ତି। ପଞ୍ଚମ ରାଉଣ୍ଡ ମୁକାବିଲାରେ ସେ ହଙ୍ଗେରୀର ପିଟର ଲେକୋଙ୍କଠାରୁ ୨-୩ ବ୍ୟବଧାନରେ ପରାସ୍ତ ହୋଇଛନ୍ତି। ବେଷ୍ଟ ଅଫ୍ ଫୋର ଗେମ୍ସର ପ୍ରଥମ ଗେମ୍ ଜିତି ଆନନ୍ଦ ଭଲ ଆରମ୍ଭ କରିଥିଲେ। ଏହାପରେ ବାକି ଦୁଇଟି ଗେମ୍ ଡ୍ର ରହିଥିଲା। ତେବେ ଚତୁର୍ଥ ଗେମ୍ରେ ଲେକୋ ବିଜୟୀ ସ୍ଥିତି ସମାନ କରିଥିଲେ। ଏହାପରେ ଟାଇବ୍ରେକରରେ ଲୋକେ ବାଜି ମାରିଥଲେ। ଫଳରେ ଆନନ୍ଦ ବିନା ବିଜୟରେ ପଏଣ୍ଟ ତାଲିକାର ସର୍ବନିମ୍ନ ସ୍ଥାନରେ ରହିଛନ୍ତି।
ମାଗ୍ନସ କାର୍ଲସେନ ଟୁରରେ ଆନନ୍ଦ ପ୍ରଥମଥର ପାଇଁ ଅଂଶଗ୍ରହଣ କରିବାର ସୁଯୋଗ ହାସଲ କରିଛନ୍ତି। ଏହାପୂର୍ବରୁ ସେ ପିଟର ସ୍ବୀଡଲର, ମାଗ୍ନସ କାର୍ଲସେନ, ଭ୍ଲାଡିମିର କ୍ରାମନିକ ଓ ଅନିଶ ଗିରିଙ୍କଠାରୁ ପରାସ୍ତ ହୋଇଥିଲେ।
ଅନ୍ୟଏକ ମୁକାବିଲାରେ ମାଗ୍ନସ କାର୍ଲସେନ ଦୃଢ ପ୍ରତ୍ୟାବର୍ତ୍ତନ କରି ଅଳ୍ପକେ ପରାଜୟରୁ ବର୍ତ୍ତିବା ସହ ୩-୨ରେ ଅଭିଜ୍ଞ ଭାସିଲ ଇଭାନଚୁକ୍ଙ୍କୁ ପରାସ୍ତ କରି ପଏଣ୍ଟ ତାଲିକାର ଶୀର୍ଷରେ ରହିଛନ୍ତି। ବଶ୍ୱର ଶ୍ରେଷ୍ଠ ତଥା ଅଭିଜ୍ଞ ଖେଳାଳିମାନଙ୍କୁ ନେଇ ଏହି ଟୁର୍ନାମେଣ୍ଟ ଆୟୋଜନ ହେଉଛି। ଏହି ଟୁର୍ନାମେଣ୍ଟ ମଧ୍ୟ ମାଗ୍ନସ କାର୍ଲସେନ ଚେସ୍ ଟୁରର ଏକ ଅଂଶବିଶେଷ। ଏହି ଟୁର୍ନାମେଣ୍ଟର ବିଜେତା ୩ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଗ୍ରାଣ୍ଡ ଫାଇନାଲରେ ଅଂଶଗ୍ରହଣ କରିବାକୁ ସୁଯୋଗ ପାଇବେ। ଏହା ଅଗଷ୍ଟ ୯ରୁ ଆରମ୍ଭ ହୋଇ ୨୦ ତାରିଖରେ ଶେଷ ହେବ। ସେହିପରି ଅନ୍ୟ ଏକ ପଞ୍ଚମ ରାଉଣ୍ଡ ମୁକାବିଲାରେ କ୍ରାମନିକ ୨.୫- ୧.୫ରେ ଡିଙ୍ଗ ଲିରେନଙ୍କୁ ପରାସ୍ତ କରିଛନ୍ତି। ଅନିଶ ଗିରି ୨.୫-୧.୫ରେ ବୋରିସ୍ ଜେଲଫାଣ୍ଡ, ଇଆନ ନେପୋନିୟାଚି ପ୍ରତିପକ୍ଷ ପିଟର ସ୍ବୀଡଲରଙ୍କୁ ପରାସ୍ତ କରିଛନ୍ତି।
