ଢେଙ୍କାନାଳ ଅଫିସ,୧୪।୪: ଢେଙ୍କାନାଳ ସଦର ତହସିଲ କାର୍ଯ୍ୟାଳୟର ଦୁର୍ନୀତି ପିଛା ଛାଡୁନି। ୨୦୨୧ରେ ଚଞ୍ଚକତା କରି ଏକ ଜଳାଶୟର କିସମ ପରିବର୍ତ୍ତନ କରିବା ଘଟଣାରେ ଜଣେ ଅତିରିକ୍ତ ତହସିଲଦାରଙ୍କ ସମେତ ୨ କର୍ମଚାରୀ ଜେଲ ଯାଇଥିବାବେଳେ ଏବେ ଏହାର ପୁନରାବୃତ୍ତି ଘଟିଛି। ଜମି ମାଲିକଙ୍କ ଅଜାଣତରେ ଜାଲ୍ ଦସ୍ତଖତ କରି ଅନ୍ୟଜଣଙ୍କୁ ପଟ୍ଟା ପ୍ରଦାନ କରାଯାଇଛି। ଘଟଣା ଜଣାପଡ଼ିବା ପରେ ଭାରପ୍ରାପ୍ତ ତହସିଲଦାର ବୁଧବାର ୨ଜଣ କର୍ମଚାରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି।
ଅଭିଯୋଗରୁ ଜଣାପଡ଼ିଛି, ସଦର ବ୍ଲକ ମଧୁସାହୁପାଟଣାର ଅଭିଯୋଗକାରୀ ସନାତନ ସାହୁଙ୍କ ମଧୁସାହୁପାଟଣା ମୌଜାର ଖାତା ନଂ. ୧୬୩ ଏବଂ ପ୍ଲଟ୍ ନଂ. ୧୨ରେ ୧୫ ଡିସିମିଲ ୪ କଡି ଜମି ରହିଛି। ସନାତନଙ୍କ ଅଜାଣତରେ ଜଣେ ବ୍ୟକ୍ତି ଉକ୍ତ ଜମିକୁ ତାଙ୍କର ଜଣେ ସମ୍ପର୍କୀୟଙ୍କ ଜରିଆରେ ରେଜିଷ୍ଟ୍ରି କରିଦେଇଥିଲେ। ଏହା ଜଣାପଡ଼ିବା ପରେ ସେ ୨୦୧୪ରେ ବାଲ୍ୟାମ୍ବା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଏବଂ ସଦର ତହସିଲ କାର୍ଯ୍ୟାଳୟରେ ୩୧୮୧/୧୪ ମ୍ୟୁଟେଶନ ଖାରଜ ଲାଗି ଆବେଦନ କରିଥିଲେ। କିନ୍ତୁ ସନାତନଙ୍କୁ ନୋଟିସ୍ ନ କରି ତହସିଲ କାର୍ଯ୍ୟାଳୟରେ ୨୬୦୩/୨୦ରେ ନୂଆ ମ୍ୟୁଟେଶନ କେସ୍ କରି ଅଭିଯୁକ୍ତମାନେ ଜାଲ ଦସ୍ତଖତ ସହାୟତାରେ ପଟ୍ଟା କରି ନେଇଛନ୍ତି। ସନାତନ ଖଜଣା ପୈଠ କରିବାକୁ ଯାଇଥିବା ବେଳେ ଏହି ଘଟଣା ପଦାକୁ ଆସିଥିଲା। ନୂତନ ପଟ୍ଟାକୁ ଖାରଜ କରି ଉକ୍ତ ଜାଗାକୁ ପୁରୁଣା ପଟ୍ଟାରେ ମିଶାଇବା ନିମନ୍ତେ ସନାତନ ବୁଧବାର ସଦର ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ଭାରପ୍ରାପ୍ତ ସଦର ତହସିଲଦାର ଅନୁପମା ମୁର୍ମୁ କୁହନ୍ତି, ଅଭିଯୋଗ ପାଇଛୁ। ଏହାକୁ ସଂଶୋଧନ କରାଯିବ। ଯେଉଁ କର୍ମଚାରୀମାନେ ଏଭଳି କରିଛନ୍ତି, ସେମାନଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଏ ବିଷୟରେ ଉଚ୍ଚ ପଦାଧିକାରୀଙ୍କୁ ଅବଗତ କରାଯାଇଥିବା ସେ ସୂଚନା ଦେଇଛନ୍ତି।
