ଭୁବନେଶ୍ୱର,୧୫ା୪(ବ୍ୟୁରୋ): ମହାବିଷୁବ ସଂକ୍ରାନ୍ତି ତଥା ଓଡ଼ିଆ ନବବର୍ଷ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ଭର୍ଚୁଆଲ ମୋଡରେ ଗୁରୁତର ରୋଗୀଙ୍କ ପରିବହନ ପାଇଁ ୪୭ଟି ଲାଇଫ ସପୋର୍ଟ ଆମ୍ବୁଲାନ୍ସର ଶୁଭାରମ୍ଭ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ଉନ୍ନତମାନର ଜୀବନ ସୁରକ୍ଷା ବ୍ୟବସ୍ଥା ଥିବା ଏହି ଆମ୍ବୁଲାନ୍ସ ରୋଗୀମାନଙ୍କୁ ନେବା ଆଣିବାରେ ବିଶେଷ ସହାୟକ ହେବ। ରାଜ୍ୟବାସୀଙ୍କୁ ନବବର୍ଷର ଶୁଭେଚ୍ଛା ଜଣାଇବା ସହ କୋଭିଡ-୧୯ର ଦ୍ୱିତୀୟ ଲହର ସଂକ୍ରମଣକୁ ଗତ ବର୍ଷ ଭଳି ଲୋକମାନଙ୍କ ସହଯୋଗରେ ହରାଯାଇ ପାରିବ ବୋଲି ମୁଖ୍ୟମନ୍ତ୍ରୀ ଆଶା ପ୍ରକଟ କରିଛନ୍ତି।
ସୂଚନାଯୋଗ୍ୟ, କୋଭିଡର ଦ୍ୱିତୀୟ ଲହର ସଂକ୍ରମଣକୁ ଦୃଷ୍ଟିରେ ରଖି ଜରୁରୀକାଳୀନ ରୋଗୀଙ୍କୁ ହସ୍ପିଟାଲ ନେବା ଲାଗି ଉନ୍ନତମାନର ଜୀବନ ସୁରକ୍ଷା ବ୍ୟବସ୍ଥା ଥିବା ଆମ୍ବୁଲାନ୍ସ ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହି ଆମ୍ବୁଲାନ୍ସ ପାଇଁ ଏମ୍ପି ଲ୍ୟାଡ, ସିଏସ୍ଆର, ଡିଏମ୍ଏଫ ଏବଂ ଓଏମ୍ବିଏଡିସିରୁ ଅର୍ଥ ବ୍ୟୟ ବରାଦ କରାଯାଇଛି। ୪୭ଟି ଆମ୍ବୁଲାନ୍ସ ମଧ୍ୟରୁ ୨୮ଟି ୧୦୮ ଜରୁରୀକାଳୀନ ସେବାରେ ନିୟୋଜିତ ହେବ ଏବଂ ୧୯ଟି ଗୁରୁତର ରୋଗୀମାନଙ୍କୁ ଜରୁରୀକାଳୀନ ସେବା ଯୋଗାଇ ଦେବାକୁ ମେଡିକାଲ କଲେଜ ଓ ହସ୍ପିଟାଲରେ ବ୍ୟବହାର କରାଯିବ।
ଉଲ୍ଲେଖନୀୟ, ୨୦୧୩ ମାର୍ଚ୍ଚ ୫ରୁ ରାଜ୍ୟରେ ଜରୁରୀକାଳୀନ ମେଡିକାଲ ଆମ୍ବୁଲାନ୍ସ ସେବା ଯୋଗାଇ ଦିଆଯାଉଛି। ରାଜ୍ୟରେ ଚାଲୁଥିବା ୫୯୬ ଆମ୍ବୁଲାନ୍ସ ମଧ୍ୟରୁ ୫୪୦ରେ ଅତ୍ୟାବଶ୍ୟକ ଜୀବନ ସୁରକ୍ଷା ବ୍ୟବସ୍ଥା ଥିବା ବେଳେ ୫୬ଟିରେ ଅତି ଉନ୍ନତମାନର ଲାଇଫ ସପୋର୍ଟ ସିଷ୍ଟମ ରହିଛି। ଏହାକୁ ମିଶାଇ ଅତି ଉନ୍ନତମାନର ଲାଇଫ ସପୋର୍ଟ ସିଷ୍ଟମ ଥିବା ଆମ୍ବୁଲାନ୍ସ ସଂଖ୍ୟା ୧୦୩ରେ ପହଞ୍ଚିଛି। ଏହି ସବୁ ଆମ୍ବୁଲାନ୍ସ ୩୦ ଜିଲାରେ ଉନ୍ନତମାନର ଜରୁରୀ ସେବା ମାଗଣାରେ ଯୋଗାଇ ଦେଉଛି। ସେହିପରି ୨୦୧୪ ଜୁଲାଇ ୧୪ରୁ ଗର୍ଭବତୀ ମହିଳା ଓ ଶିଶୁ ମାନଙ୍କ ପରିବହନ ସକାଶେ ରାଜ୍ୟରେ ୫୦୦ ଜନନୀ ଏକ୍ସପ୍ରେସ କାମ କରୁଛି। ଏହାଦ୍ୱାରା ଗର୍ଭବତୀ ମହିଳା ଓ ଶିଶୁଙ୍କୁ ମାଗଣାରେ ହସ୍ପିଟାଲକୁ ନେବା ଆଣିବା କରାଯାଉଛି। ରାଜ୍ୟର ୬୨ ଲକ୍ଷ ଲୋକ ୧୦୮ ଆମ୍ବୁଲାନ୍ସ ସେବା ଓ ଜନନୀ ଏକ୍ସପ୍ରେସ ଦ୍ୱାରା ଉପକୃତ ହେଉଛନ୍ତି। ଏଥିସହିତ କେନ୍ଦ୍ରାପଡା, କଳାହାଣ୍ଡି, କୋରାପୁଟ ଏବଂ ମାଲକାନଗିରି ଜିଲାରେ ନଦୀ ଅଞ୍ଚଳରେ ରହୁଥିବା ରୋଗୀ ଓ ଆହତଙ୍କୁ ସେବା ଯୋଗାଇ ଦେବାକୁ ୬ଟି ବୋଟ ଆମ୍ବୁଲାନ୍ସ କାର୍ଯ୍ୟ କରୁଛି।
