ମହାକାଳପଡା, ୭ା୯ (ଡି.ଏନ୍.ଏ.): ସର୍ବଶିକ୍ଷା ଅଭିଯାନ ଯୋଜନାରେ ସଭିଏଁ ପଢ଼ିବେ ସଭିଏଁ ବଢ଼ିବେ ନାରା ତୃଣମୂଳ ସ୍ତରରେ ଫେଲ୍ ମାରିଛି। ବିଦ୍ୟାଳୟଗୁଡ଼ିକର ବିକାଶ ପାଇଁ ସରକାର ଅର୍ଥ ବ୍ୟୟ କରୁଛନ୍ତି। ଛାତ୍ରୀଛାତ୍ରମାନେ କିପରି ବେସରକାରୀ ବିଦ୍ୟାଳୟ ମୋହ ତୁଟାଇ ସରକାରୀ ବିଦ୍ୟାଳୟ ପ୍ରତି ଆକୃଷ୍ଟ ହେବେ ସେଥିପାଇଁ ଶୈକ୍ଷିକ ପରିବେଶ, ସ୍ମାର୍ଟ କ୍ଲାସ ରୁମ୍, ବିଦ୍ୟାଳୟ ପରିସରରେ ଉଦ୍ୟାନ ନିର୍ମାଣ ହେଉଛି। ବିଦ୍ୟାଳୟର ଶ୍ରେଣୀଗୃହ ଅଭାବ ଥିବାରୁ ନିକଟରେ ଥିବା ଗଁା ଯଜ୍ଞ ମଣ୍ଡପରେ ଶିକ୍ଷାଦାନ ହେଉଛି। ଏହାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକଠାରୁ ୨ କିମି ଦୂର ଲୁଣା ନଦୀକୂଳରେ ଗୌଡ଼ବାଡପୁରସ୍ଥିତ ନଙ୍ଗୁଳି ମହାପୁରୁଷ ସରକାରୀ ପ୍ରାଥମିକ ବିଦ୍ୟାଳୟ ଛାତ୍ରୀଛାତ୍ରମାନଙ୍କ କ୍ଷେତ୍ରରେ। ଶ୍ରେଣୀଗୃହ ନ ଥିବାରୁ ଯଜ୍ଞ ମଣ୍ଡପରେ ପାଠ ପଢ଼ା ହେଉଥିବା ଦେଖିବାକୁ ମିଳିଛି। ଏଠାରେ ପ୍ରଥମରୁ ୮ମ ଶ୍ରେଣୀ ପର୍ଯ୍ୟନ୍ତ ୧୦୭ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ଶ୍ରେଣୀଗୃହ ଅଭାବରୁ ପ୍ରଥମରୁ ୩ୟ ଶ୍ରେଣୀ ପର୍ଯ୍ୟନ୍ତ କୁନି କୁନି ପିଲାମାନଙ୍କର ଭବିଷ୍ୟତ ଗଢ଼ାଯାଉଛି ଏହି ଯଜ୍ଞ ମଣ୍ଡପରେ।
ମଙ୍ଗଳବାର ପୂର୍ବାହ୍ନରେ ଏକ ଅଭାବନୀୟ ଦୃଶ୍ୟ ଯଜ୍ଞ ମଣ୍ଡପରେ ପଢୁଥିବା ପିଲାମାନଙ୍କ କ୍ଷେତ୍ରରେ ଦେଖିବାକୁ ମିଳିଛି। ପ୍ରବଳ ବର୍ଷା ହେବା ସହ ବିଜୁଳି ମାରିଥିଲା। ଫଳରେ ପିଲାମାନେ ଭୟଭୀତ ହୋଇପଡିଥିଲେ। ଯଜ୍ଞ ମଣ୍ଡପଟି ଚତୁଃପାର୍ଶ୍ୱ ଖୋଲା ଥିବାରୁ ବର୍ଷା ଛିଟିକାରେ ପିଲାମାନଙ୍କର ବହି ଓ ପୋଷାକ ଭିଜି ଯାଇଥିବା ଦେଖିବାକୁ ମିଳିଥିଲା। ବାଧ୍ୟ ହୋଇ ଶିକ୍ଷକମାନେ ଛାତ୍ରୀଛାତ୍ରମାନଙ୍କୁ ପ୍ରବଳ ବର୍ଷାରେ ମୁଣ୍ଡରେ ପଲିଥିନ ତଳେ ସୁରକ୍ଷିତ ସ୍ଥାନକୁ ନେଇଥିଲେ। ଏହି କୋମଳମତି ଶିଶୁମାନଙ୍କୁ କିଏ ସୁରକ୍ଷା ଦେବ ବୋଲି କେତେଜଣ ଅଭିଭାବକ ଅସନ୍ତୋଷ ପ୍ରକାଶ କରିଛନ୍ତି। ଅଦ୍ୟାବଧି ବ୍ଲକର ଅନେକ ବିଦ୍ୟାଳୟରେ ଶ୍ରେଣୀଗୃହ ଅଭାବ ଯୋଗୁ ଗୋଟିଏ ଗୃହରେ ପ୍ରଥମରୁ ୫ମ ଶ୍ରେଣୀ ପର୍ଯ୍ୟନ୍ତ ପିଲାମାନେ ପାଠ ପଢ଼ା ହେଉଥିବା ଦେଖିବାକୁ ମିଳିଛି। ଉକ୍ତ ଶ୍ରେଣୀ ଗୃହରେ ପ୍ରଥମ ଶ୍ରେଣୀ ପିଲାମାନଙ୍କୁ ପାଠ ପଢାଯାଉଥିବା ବେଳେ ଅନ୍ୟ ଶ୍ରେଣୀ ପିଲାମାନେ କଳାପଟାକୁ ଛାହିଁବା ସାର ହୋଇଥାଏ ବୋଲି ଶିକ୍ଷାବିତ୍, ବୁଦ୍ଧିଜୀବୀ ଓ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି। ଏହା ଶିକ୍ଷା ବ୍ୟବସ୍ଥା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେହେରାଙ୍କୁ ପଚାରିବାରେ ଉକ୍ତ ବିଦ୍ୟାଳୟ ଗୃହ ଅଭାବ ଥିବା ସମ୍ପର୍କରେ ଅବଗତ ଅଛୁ। ଆଗାମୀ ଦିନରେ ଗୃହ ନିର୍ମାଣ ସମସ୍ୟା ସମାଧାନ ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
