ଲଣ୍ଡନ: ବିଶ୍ୱର ବିଭିନ୍ନ ପ୍ରାନ୍ତରେ ପ୍ରାକୃତିକ ବିପର୍ଯ୍ୟୟର ମାତ୍ରା ବଢ଼ିବାରେ ଲାଗିଛି। ବନ୍ୟାରେ ପାକିସ୍ତାନ ସ୍ଥିତି ଶୋଚନୀୟ ହୋଇପଡ଼ିଥିବାବେଳେ ପଶ୍ଚିମ ଆମେରିକାରେ ଗ୍ରୀଷ୍ମ ପ୍ରବାହ ଏବଂ ବନାଗ୍ନି ମାତ୍ରା ବୃଦ୍ଧି ପାଇଛି। ସେହିପରି ଅଷ୍ଟ୍ରେଲିଆ ଏବଂ ଇଣ୍ଡୋନେସିଆରେ ଆବଶ୍ୟକତାଠାରୁ ଅଧିକ ବର୍ଷା ସାଙ୍ଗକୁ ବ୍ରାଜିଲ୍ ଓ ଆର୍ଜେଣ୍ଟିନାରେ ମରୁଡ଼ି ଲୋକଙ୍କୁ କଲବଲ କରିବାରେ ଲାଗିଛି। ଜଳବାୟୁ ପରିବର୍ତ୍ତନର ବଡ଼ ପ୍ରଭାବ ପାଣିପାଗ ଉପରେ ପଡ଼ିଥିବା ବିଶେଷଜ୍ଞମାନେ ଦାବି କରିଛନ୍ତି। ୨୦୨୦ରୁ ବିଶ୍ୱରେ ଘଟୁଥିବା ପ୍ରାକୃତିକ ବିପର୍ଯ୍ୟୟର ମୁଖ୍ୟ କାରଣ ଲା ନିନାକୁ ଦିଆଯାଇଛି। ଲା ନିନା ଯୋଗୁ ଆଉ ଗୋଟିଏ ବର୍ଷ ଅର୍ଥାତ୍ ୨୦୨୩ ପର୍ଯ୍ୟନ୍ତ ବିଶ୍ୱବାସୀଙ୍କୁ ପ୍ରାକୃତିକ ବିପର୍ଯ୍ୟୟର ସାମ୍ନା କରିବାକୁ ପଡ଼ିବ। ବନ୍ୟା, ଜଙ୍ଗଲପୋଡ଼ି, ମରୁଡ଼ି ଦ୍ୱାରା ବହୁ ଘର ସାଙ୍ଗକୁ ଫସଲ ନଷ୍ଟ ହେବ। ଏହାସହ ବହୁ ଧନ ଓ ଜୀବନ କ୍ଷତିଗ୍ରସ୍ତ ହେବାର ଆଶଙ୍କାଙ୍କୁ ମଧ୍ୟ ଏଡ଼ାଇ ଦିଆଯାଇ ନ ପାରେ। ଲା ନିନା ଦ୍ୱାରା ଓସେନ୍ ସାଇକେଲ୍ରେ ମଧ୍ୟ ବିରାଟ ପରିବର୍ତ୍ତନ ଘଟିବା ସହ ପାଣିପାଗରେ ମଧ୍ୟ ଏହାର ପ୍ରଭାବ ଖୁବ୍ ଅଧିକ।
୧୯୯୮ରୁ ୨୦୦୧ ମଧ୍ୟରେ ଶେଷଥର ପାଇଁ ୩ଟି ଲା ନିନା ଅନୁଭୂତ ହୋଇଥିବାବେଳେ ଏହାପୂର୍ବରୁ ୧୯୭୩-୭୬ରେ ଲା ନିନା ପ୍ରଭାବ ଦେଖିବାକୁ ମିଳିଥିବା ଆମେରିକାର ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି। ବିପର୍ଯ୍ୟୟର ବେଗ ଅତି ପ୍ରଖର ହୋଇଥିବାବେଳେ ଏହାକୁ ହିସାବ କରିବା କଠିନ ବୋଲି ବିଶେଷଜ୍ଞ କହିଛନ୍ତି। ପ୍ରାକୃତିକ ବିପର୍ଯ୍ୟୟ କାରଣରୁ ୨୦୨୦ରେ ବିଶ୍ୱରେ ୨୬୮ ବିଲିୟନ୍ ଡଲାର ସମ୍ପତ୍ତି ନଷ୍ଟ ହୋଇଥିବାବେଳେ ୨୦୨୧ରେ ଏହାର ପରିମାଣ ଥିଲା ୩୨୯ ବିଲିୟନ୍ ଡଲାର। ତେବେ ଏ ପ୍ରକାର ସ୍ଥିତି ବଜାୟ ରହିଲେ ୨୦୨୩ରେ ବିଶ୍ୱକୁ ୧ ଟ୍ରିଲିୟନ୍ ଡଲାର କ୍ଷତି ସହିବାକୁ ପଡ଼ିବ ବୋଲି ଆଶଙ୍କା କରାଯାଉଛି। ଲା ନିନା ସାଙ୍ଗକୁ ଜଳବାୟୁ ପରିବର୍ତ୍ତନ ଏହାର ପ୍ରମୁଖ କାରଣ ବୋଲି କୁହାଯାଇପାରିବ।
ଲା ନିନା କ’ଣ
ଏହା ହେଉଛି ଏକ ପ୍ରତିସାଗରୀୟ ଧାରା। ଏହାର ଆବିର୍ଭାବ ପଶ୍ଚିମ ମହାସାରୀୟ କ୍ଷେତ୍ରରେ ସେତେବେଳେ ହୋଇଥିଲା ଯେତେବେଳେ ପୂର୍ବ ପ୍ରଶାନ୍ତ ସାଗର କ୍ଷେତ୍ରରେ ଏଲ୍ ନିନୋ ସମ୍ପୂର୍ଣ୍ଣ ଭାବେ ସମାପ୍ତ ହୋଇଯାଇଥିଲା। ଏଲ୍ ନିନୋର ବିପରୀତ ଧର୍ମୀ ହେଉଛି ଲା ନିନା। ଏଲ୍ ନିନୋ ପଶ୍ଚିମ ମହାସାଗରୀୟ ଅଞ୍ଚଳରେ ସୁଖିଲା ଜଳବାୟୁ ଉତ୍ପନ୍ନ କରିଥିବାବେଳେ ଲା ନିନା ତାକୁ ଆର୍ଦ୍ର ଜଳାବାୟୁରେ ପରିଣତ କରିଦିଏ। ସ୍ପେନ୍ ଭାଷାରେ ଲା ନିନାର ଅର୍ଥ ଛୋଟ ଝିଅ।
