ନୟାଗଡ଼ ଅଫିସ/ଭାପୁର (ଡି.ଏନ.ଏ.),୨୮।୮: ମହାନଦୀରେ ଜଳସ୍ତର ବଢ଼ିବାରୁ ନୟାଗଡ଼ ଜିଲାର ଗଣିଆ ଓ ଭାପୁର ବ୍ଲକ ଅଞ୍ଚଳରେ ବନ୍ୟା ପରିସ୍ଥିତି ଦେଖାଦେଇଛି। ଗୁରୁବାର ରାସ୍ତାରେ ମହାନଦୀର ବନ୍ୟାଜଳ ଲହଡି ମାରିଥିଲା। ବଡମୂଳ-କୁତୁରୀ ରାସ୍ତାରେ ୩ରୁ ୬ ଫୁଟ ଓ ଭାପୁର ବ୍ଲକର ମଣିପୁର ରାସ୍ତାରେ ୩ ଫୁଟର ବନ୍ୟାଜଳ ପ୍ରବାହିତ ହେଉଛି। ଏହା ଦ୍ୱାରା କୁତୁରୀ ଓ ମଣିପୁର ଗଁା ବାହ୍ୟଜଗତରୁ ବିଚ୍ଛିନ୍ନ ହୋଇରହିଛି। ଗଣିଆ ବ୍ଲକର ରାସଙ୍ଗ-କାଦୁଆ ରାସ୍ତାରେ ଅଢ଼େଇଫୁଟ, କଳାପାଟ-ବୃତ୍ତଙ୍ଗ ରାସ୍ତାରେ ୨ ଫୁଟ ବନ୍ୟାଜଳ ପ୍ରବାହିତ ହେଉଛି। ବର୍ଷା କମିଥିଲେ ମଧ୍ୟ ବନ୍ୟା ଯୋଗୁ ଲୋକେ ଭୟଭୀତ ଅବସ୍ଥାରେ ଅଛନ୍ତି। ପନିପରିବା ଓ ଧାନ ଜମିରେ ପାଣି ଜମିରହିଛି। ସାପ କାମୁଡ଼ାରେ ଛାମୁଣ୍ଡିଆ ପଞ୍ଚାୟତ ମହନପଦା ଦଳିତସାହିରେ ଲିଜା ନାୟକ ନାମ୍ନୀ ଜଣେ ଦଶମ ପାସ୍ କରିଥିବା ଛାତ୍ରୀଙ୍କ ମୃତ୍ୟୁ ହୋଇଛି। ସେହିପରି ଭାପୁର ବ୍ଲକ ଫତେଗଡ ପଞ୍ଚାୟତର ମଣିପୁର ଗଁା ବିଚ୍ଛିନ୍ନ ହୋଇରହିଛି। ମଣିପୁର ଗଁା ରାସ୍ତାରେ ୩ ଫୁଟର ପାଣି ପ୍ରବାହିତ ହେଉଛି। ବର୍ଷାରେ ଗଣିଆ ବ୍ଲକ ବେଲପଡାପାଟଣା ପଞ୍ଚାୟତ ରାଉତପଡାର ପବିତ୍ର ବେହେରାଙ୍କ ୨ ବଖରା ଭାଙ୍ଗି ଯାଇଛି। ବନ୍ୟାଜଳରେ ଭାପୁର ବ୍ଲକ ଫତେଗଡ ପଞ୍ଚାୟତର ପ୍ରାୟ ୫୦୦ ଏକର, କରବର ପଞ୍ଚାୟତର ୩୦୦ ଏକର ଓ ପଥରଚକଡା ପଞ୍ଚାୟତର ପ୍ରାୟ ୫୦ ଏକର ଧାନଜମି ବୁଡି ରହିଛି।
