ଗଞ୍ଜାମ, ୩।୭(ଡି.ଏନ୍.ଏ.): ଗଞ୍ଜାମ ବ୍ଲକ ପାଳିବନ୍ଧ ପଞ୍ଚାୟତ ପୁରୁଣାବନ୍ଧ ଗ୍ରାମରେ ରୁହନ୍ତି କୁନ୍ତୁଳା ବେହେରା(୫୨)। ମାଛ ବେପାରୀ କୁନ୍ତୁଳା ଅପା ନାମରେ ସେ ପରିଚିତା। ତାଙ୍କ ଘର ସୋରଳ ଗ୍ରାମରେ। ସେଠାରେ ବାପାଙ୍କୁ ମାଛ ବ୍ୟବସାୟରେ ସହଯୋଗ କରୁ କରୁ ନିଜେ ପାଲଟିଗଲେ ଜଣେ ବେପାରୀ। ତାଙ୍କ ପରିବାର କହିଲେ ସ୍ବାମୀ କୃଷ୍ଣଚନ୍ଦ୍ର ବେହେରା ଓ ତିନି ପୁଅ। ମାଛ ବିକ୍ରି ପରେ ଯାହା ଲାଭ ମିଳେ ସେଥିରେ ପିଲାଙ୍କୁ ପଢ଼ାଇବା ସହ ପରିବାର ପ୍ରତିପୋଷଣ କରିଥାନ୍ତି। ଜଣେ ପୁଅ ଏବେ ସୈନ୍ୟବାହିନୀରେ ଭର୍ତ୍ତି ହୋଇଛନ୍ତି। ବର୍ତ୍ତମାନ ଅଭାବ ନାହିଁ ତଥାପି ମାଛ ବେପାରରୁ ମୁହଁ ଫେରାଇ ନାହାନ୍ତି କୁନ୍ତୁଳା ଅପା। ଏହି ବ୍ୟବସାୟ ତାଙ୍କ ପରିଚୟ ସୃଷ୍ଟି କରିଛି ବୋଲି କୁହନ୍ତି ସେ। ସ୍ଥାନୀୟ ଜୟଶ୍ରୀ ଛକ ବସା ନିକଟ ରାସ୍ତାପାର୍ଶ୍ୱରେ ଛୋଟ ଚାଳିଆ କରି ବିଭିନ୍ନ ରକମର ମାଛ ବିକ୍ରି କରୁଛନ୍ତି। ରବିବାର, ମଙ୍ଗଳବାର, ବୁଧବାର ଓ ଶୁକ୍ରବାର ତାଙ୍କ ମାଛ ଦୋକାନରେ ଲୋକଙ୍କ ପ୍ରବଳ ଭିଡ଼ ଜମିଥାଏ। ସେ ସର୍ବଦା ତଟକା ମାଛ ଆଣୁଥିବାରୁ ସମସ୍ତଙ୍କ ପସନ୍ଦ କୁନ୍ତୁଳା ଅପା। ସମୁଦ୍ରରୁ ଡଙ୍ଗା ଦ୍ୱାରା ମାଛ ମାରୁଥିବା ଲୋକଙ୍କଠାରୁ ମାଛ କିଣି ସେ ଏଠାରେ ବିକ୍ରି କରିଥାନ୍ତି। ବେଳେବେଳେ ସ୍ଥାନୀୟ ଅଞ୍ଚଳର ପୋଖରୀ ମାଛ ମଧ୍ୟ ବିକ୍ରି କରନ୍ତି। ଏଥିସହ ଛତ୍ରପୁର, ବ୍ରହ୍ମପୁର ଅଞ୍ଚଳର ଲୋକେ ବଡ଼ ବଡ଼ ଭୋଜି ପାଇଁ ମାଛ, ଚିଙ୍ଗୁଡ଼ି ଓ କଙ୍କଡ଼ା ଆଦି ତାଙ୍କଠାରୁ କିଣିଥାନ୍ତି।
